ءمينيستردىڭ ايتۋىنشا, ەلىمىزدە جىل باسىنان بەرى قىلمىس دەڭگەيى 8 پروتسەنتكە تومەندەگەن. الايدا ىشىمدىككە سالىنۋشىلىق, ناشاقورلىق, جۇمىسى نەمەسە وقۋى جوقتىق جانە وتباسىلىق كيكىلجىڭدەر ەلدەگى قىلمىستىق احۋالعا تەرىس اسەرىن تيگىزۋدە. ال ەلدەگى جالپى قىلمىستىڭ 70 پايىزى ۇرلىقتىڭ ۇلەسىندە.
ىشكى ىستەر مينيسترلىگى جىل باسىنان بەرى اۆتوكولىكتى ماس كۇيىندە جۇرگىزگەن 18 مىڭداي ادامنىڭ ۇستالعانىنا دا توقتالدى. شامامەن 26 مىڭداي ادام جۇرگىزۋشىلىك قۇقىنان ايىرىلعان. ال 2200 جۇرگىزۋشى اكىمشىلىك قاماۋعا الىنعان.
ق.قاسىموۆ وسىعان وراي, ءىس جۇرگىزۋ ۇدەرىسىندە زاماناۋي تەحنولوگيالاردىڭ ەنگىزىلىپ جاتقانىن ايتتى.
– اكىمشىلىك ءىس جۇرگىزۋدى ەلەكتروندى جۇيەگە اۋىستىرۋدامىز. پوليتسيا قىزمەتكەرلەرى پلانشەتتەر ارقىلى ءىىم دەرەكتەر قورىنا ەنىپ, جۇرگىزۋشىلەر مەن ولاردىڭ كولىكتەرىنىڭ بۇرىن-سوڭدى جاسالعان قۇقىق بۇزۋشىلىقتارعا قاتىسى بار-جوعىن سول مەزەتتە انىقتاي الادى. ءبىزدىڭ تاراپىمىزدان جولداعى ءتارتىپتى قاداعالاۋ كۇشەيتىلىپ, اكىمشىلىك شارالار قاتاڭداتىلسا دا جول قوزعالىسىنا قاتىسۋشىلاردىڭ تارتىپتەرى سىن كوتەرمەيدى, – دەدى ىشكى ىستەر ءمينيسترى.
قالمۇحانبەت قاسىموۆ, سونداي-اق جەرگىلىكتى اتقارۋشى ورگانداردىڭ كومەگىمەن قالا كوشەلەرىندە, حالىق كوپ جينالاتىن ورىنداردا بەينەباقىلاۋ جۇيەسىنىڭ كوپتەپ ورناتىلىپ جاتقاندىعىن اتاپ ءوتتى. ماسەلەن, «قاۋىپسىز اۋلا» باعدارلاماسى بويىنشا استانا, الماتى قالالارى مەن وبلىس ورتالىقتارىنداعى 15 مىڭ تۇرعىن ءۇيدىڭ اۋلاسىنا بەينەكامەرالار ورناتىلعان.
مينيستر بۇقارالىق اقپارات قۇرالدارى مەن الەۋمەتتىك جەلىلەردە ىشكى ىستەر جۇيەسىنە قاتىستى سىن-ەسكەرتپەلەرگە كوڭىل ءبولىپ وتىراتىندىعىن دا جەتكىزدى. وعان قوسا پوليتسيا قىزمەتكەرلەرىنىڭ ارەكەتتەرى نەمەسە ارەكەتسىزدىكتەرى بويىنشا جاۋاپكەرشىلىك ارتا تۇسكەندىگىن ايتتى. ماسەلەن, بيىلدىڭ وزىندە ىشكى ىستەر بولىمدەرىنىڭ 600 قىزمەتكەرى تەرىس قىلىقتارى ءۇشىن قىزمەتتەن قۋىلعان.
ال جىل باسىنان بەرى ىشكى ىستەر مينيسترلىگىنىڭ 4 قىزمەتكەرى قىزمەتتىك بورىشىن وتەۋ كەزىندە قازا تاۋىپ, 84 قىزمەتكەر جارالانعان.
ءباسپاسوز ءماسليحاتىندا ىشكى ىستەر ءمينيسترى سالانى رەفورمالاۋ جانە قوعام نازارىن اۋدارعان قىلمىستار بويىنشا قويىلعان ساۋالدارعا دا جاۋاپ بەردى. ونىڭ ايتۋىنشا, جۇمىس ۋاقىتىنىڭ ءتيىمدى پايدالانىلۋى, ارتىق ەسەپ بەرۋلەردەن ارىلتۋ, ارتىق وتىرىستار مەن وزىنە ءتان ەمەس قىزمەتتەردەن بوساتۋ ارقىلى پوليتسيا قىزمەتكەرلەرىنىڭ 10 پروتسەنتىن قىسقارتىپ, ۇنەمدەلگەن قاراجات ەسەبىنەن حالىقپەن تىكەلەي جۇمىس ىستەيتىن جول-پاترۋلدىك پوليتسياسى قىزمەتكەرلەرىنىڭ ايلىعىن 50 پروتسەنتكە كوتەرۋ جوسپارلانعان.
ىشكى ىستەر ءمينيسترى ىشكى ىستەر بولىمدەرىنىڭ زاماناۋي عيماراتقا, قىزمەتكەرلەرىنىڭ باسپاناعا مۇقتاج ەكەندىگىن ايتىپ ءوتتى.
ءمينيستردىڭ بايانداۋىنشا, 2018 جىلدىڭ 8 ايىندا 102 قىزمەتىنە 3,2 ملن قوڭىراۋ كەلىپ تۇسكەن. ونىڭ 40 پروتسەنتى عانا قۇقىق قورعاۋ ورگاندارىنىڭ قىزمەتىنە قاتىستى بولعان.
– بىزدە بارلىعى 220 وپەراتور تاۋلىگىنە 24 ساعات بويى جۇمىس ىستەيدى. الماتىدا بار-جوعى 24 وپەراتور, استانادا – 26. بۇگىندە ولاردىڭ سانىن ارتتىرىپ, 12 ساعاتتىق جۇمىس كۇنىنە اۋىستىردىق. 3,2 ملن قوڭىراۋدىڭ ىشىندە 40 پروتسەنتى عانا پوليتسيا جۇمىسىنا قاتىستى بولدى. ماسەلەن, الماتىدا ءبىر ازامات وپەراتورعا 3000 رەت حابارلاسىپ, ۇنەمى تۇرعىن ۇيىنە قاتىستى جانە باسقا دا سۇراقتارمەن شاعىمدانا بەرگەن, – دەدى ق.قاسىموۆ.
سەرىك ابدىبەك,
«ەگەمەن قازاقستان»
