كەشە ورتالىق كوممۋنيكاتسيالار قىزمەتىنىڭ الاڭىندا «باسپانا» يپوتەكالىق كومپانياسىنىڭ باسشىسى قايرات التىنبەكوۆ «7 – 20 – 25» يپوتەكالىق باعدارلاماسىنىڭ ىسكە اسىرىلۋ بارىسىنا توقتالدى.
− بۇگىندە سولتۇستىك قازاقستان مەن تۇركىستان وبلىستارىندا «7 – 20 – 25» باعدارلاماسى بويىنشا بەرىلگەن يپوتەكانىڭ كولەمى تىم از. سەبەبى اتالعان وڭىرلەردە جاڭا تۇرعىن ۇيلەر سانى جەتكىلىكسىز. وسىعان بايلانىستى ۇلتتىق بانك «باسپانا» يپوتەكالىق كومپانياسىمەن بىرلەسە وتىرىپ, «7 – 20 – 25» باعدارلاماسىنا وزگەرىس ەنگىزدى. وعان سايكەس, ءبىز باعدارلاما اياسىندا سالىناتىن جاڭا ۇيلەردى ارتتىرۋ ءۇشىن شامامەن 150 ملرد تەڭگە بولۋگە ءازىرمىز, – دەدى ق.التىنبەكوۆ.
ونىڭ سوزىنە قاراعاندا, جاڭا باعدارلاماعا سۇرانىس جوعارى بولعانىمەن, بانكتەر بارلىق ءوتىنىشتى قابىلداۋعا اسىقپاي وتىر. ماسەلەن, وسى ۋاقىتقا دەيىن ەكىنشى دەڭگەيلى بانكتەرگە 26 ملرد تەڭگەگە وتىنىمدەر ءتۇسىپ, سونىڭ ىشىندە 18 ملرد تەڭگەنىڭ يپوتەكاسى ماقۇلدانعان. بۇل – شامامەن 1 500 پاتەر.
ايتا كەتەرلىگى, بۇگىننەن باستاپ «7 – 20 – 25»-كە قوسىمشا «باسپانا-حيت» اتتى جاڭا يپوتەكالىق باعدارلاما ىسكە قوسىلدى. وندا العاشقى جارنانىڭ كولەمى وزگەرمەيدى. الايدا پروتسەنتتىك مولشەرلەمە ۇلتتىق بانكتىڭ ستاۆكاسىنا بايلانىستى بولماق.
− ماسەلەن, ۇلتتىق بانكتىڭ بازالىق ستاۆكاسى 9 پروتسەنتتى قۇرايدى. وعان تاعى 1,7 پروتسەنت قوسىلادى. وسىلايشا, «باسپانا-حيت» باعدارلاماسى بويىنشا پروتسەنتتىك مولشەرلەمە 10,7 بولادى. يپوتەكانىڭ مەرزىمى – 15 جىل. ال باستاپقى جارنانىڭ مولشەرى 20 پروتسەنت بولىپ قالا بەرەدى, – دەيدى ق.التىنبەكوۆ.
«7 – 20 – 25» يپوتەكالىق باعدارلاماسىنا قاتىسۋشىلار سانى بويىنشا الماتى, استانا قالالارى, سونىمەن قاتار ماڭعىستاۋ وبلىسى كوش باستاپ كەلەدى. اقتوبە, شىعىس قازاقستان جانە اقمولا وبلىستارىندا دا نەسيە بەرۋ قارقىنى وسۋدە.
وسى جيىندا ايتىلعانداي, اتالعان باعدارلاما شەڭبەرىندە جاس وتباسىلار مەن بيۋدجەتتىك سالا قىزمەتكەرلەرى ءۇشىن «جاس ارمان» جانە «قامقور باسپانا» جوبالارى ازىرلەنىپتى. جەرگىلىكتى اتقارۋشى ورگاندار جوعارىدا اتالعان ساناتتاعى ازاماتتارعا باستاپقى جارنانى قىسقارتۋ ءۇشىن سۋبسيديا قاراستىرۋدا. بۇل رەتتە ءۇي كەزەگىنىڭ ءتىزىمىن جاساۋ, ونىمگە قاتىسۋ ءۇشىن ازاماتتاردى ىرىكتەۋ اكىمدىكتەردىڭ ەركىنە بەرىلگەن. تاياۋدا «باسپانا» ۇيىمى شىمكەنت قالاسى اكىمدىگىمەن بىرگە العاشقى جوبانى ىسكە قوستى. جوبا بويىنشا شىمكەنت اكىمدىگى 2 مىڭعا جۋىق تۇرعىنعا قولداۋ كورسەتۋ ءۇشىن 2 ملرد تەڭگە سۋبسيديا بولگەن.
بۇعان دەيىن اتالعان باعدارلاما نەگىزىندە تسەنتركرەديت بانكى, اتف بانك, تسەسنابانك, BankRBK, ەۆرازيالىق بانك ارقىلى نەسيە راسىمدەلەتىن بولسا, 11 قىركۇيەكتەن باستاپ, قازاقستان حالىق بانكى جانە ForteBank تە وسى تىزىمگە قوسىلىپ وتىر.
ەركەجان ايتقازى,
«ەگەمەن قازاقسان»
