ازيا ويىندارىنىڭ ءۇشىنشى جارىس كۇنىندە قازاقستاندىق سپورتشىلار التى جۇلدە جەڭىپ الدى. ونىڭ ۇشەۋى بالۋاندارعا تيەسىلى بولسا, ەكى مەدال تاەكۆوندوشىلارعا بۇيىردى. ال سۋ دوبىنان قازاقستان قۇراماسى ەل قورجىنىنا التىنشى مەدالدى سالدى.
گرەك-ريم كۇرەسىنەن 67 كيلودا بەلدەسكەن المات كەبىسپاەۆ ازيا ويىندارىنىڭ كۇمىس جۇلدەگەرى اتاندى. ول فينالدىق كەزدەسۋدە ەكى دۇركىن الەم چەمپيونى, وڭتۇستىككورەيالىق بالۋان ريۋ زان سۋدان 4:5 ەسەبىمەن جەڭىلدى. ال بىلتىر گرەك-ريم كۇرەسىنەن پاريجدە وتكەن الەم چەمپيوناتىندا كۇمىس جۇلدە العان مەيرامبەك ايناعۇلوۆ (57 كيلو) پەن قىزدار كۇرەسىنەن ريو وليمپياداسىنىڭ قولا جۇلدەگەرى اتانعان وتانداسىمىز ەلميرا سىزدىقوۆا (76 كيلو) ازيا ويىندارىندا قولا مەدال ەنشىلەدى. ايناعۇلوۆ ءۇشىنشى ورىن ءۇشىن كۇرەستە سولتۇستىك كورەيا سپورتشىسىنان 13:5 ەسەبىمەن باسىم تۇسسە, سىزدىقوۆا وڭتۇستىك كورەيا سپورتشىسىن 5:2 ەسەبىمەن جەڭدى.
سونىمەن قاتار ءۇشىنشى جارىس كۇنىندە ەكى بىردەي تاەكۆوندوشىمىز ازيادا جۇلدەسىنە قول جەتكىزدى. رۋسلان جاپاروۆ قولا مەدال يەلەنسە, جانسەل دەنيز فينالدا ۇتىلىپ, كۇمىستى قاناعات تۇتتى. سۋ دوبىنان قازاقستان قىزدار كومانداسى ازيا ويىندارىنىڭ كۇمىس جۇلدەگەرى اتاندى. ۆاتەرپولشى قىزدار ازيا چەمپيونى اتانعان قىتاي قۇراماسىنا عانا ەسە جىبەردى. ال ماۋنتينبايك سپورتىنان (كروسس-كانتري) كيريلل كازانتسەۆ ەل قورجىنىنا ازيا ويىندارىنىڭ قولا جۇلدەسىن سالدى.
● ال ءتورتىنشى جارىس كۇنىندە وتانداستارىمىز التى جۇلدە جەڭىپ الدى. سەمسەرلەسۋدەن ەرلەر جانە قىزدار قۇراماسى جارتىلاي فينالدا قارسىلاستارىنا ەسە جىبەرىپ, ەل قورجىنىنا قولا جۇلدەنى سالدى. ەرلەر جاپونيا قۇراماسىنان جەڭىلسە, قىزدار قىتاي سپورتشىلارىنان باسىم تۇسە المادى. سەمسەرلەسۋ سپورتىنىڭ ەرەجەسى بويىنشا, جارتىلاي فينالدا جەڭىلگەن كوماندا اۆتوماتتى تۇردە قولا جۇلدەگە يەلىك ەتەدى.
بايداركا مەن كانوە ەسۋدەن الەكساندر كۋليكوۆ ەسكەك ەسۋدەگى «سلالوم» باعدارلاماسى بويىنشا ءۇشىنشى ورىنعا تابان تىرەپ, ازيا ويىندارىنىڭ قولا جۇلدەگەرى اتاندى. سونداي-اق تاەكۆوندو سپورتىنان 80 كيلو سالماقتا سىنعا تۇسكەن نۇرلان مىرزاباەۆ جارتىلاي فينالدا كورەيالىق سپورتشىدان جەڭىلىپ, قولانى قاناعات تۇتتى. ازيا ويىندارىنىڭ ءۇش دۇركىن چەمپيونى, ريو وليمپياداسىنىڭ جەڭىمپازى دميتري بالاندين 100 مەترگە براسس ادىسىمەن جۇزۋدە ازيا ويىندارىنىڭ قولا جۇلدەگەرى اتاندى. بالاندين فينالدىق سايىستا جاپونيا جانە قىتاي سپورتشىلارىنا ەسە جىبەردى. گرەك-ريم كۇرەسىنىڭ بالۋانى ازامات قىستىباەۆ (87 كيلو) قولا ءۇشىن وتكەن بەلدەسۋدە ۇندىستاندىق سپورتشىنى جەڭىپ, قازاقستان قۇراماسىنا ازيا ويىندارىنداعى 19-شى جۇلدەنى اپەردى.
ءالي بيتورە,
«ەگەمەن قازاقستان»
