«كاسپيدىڭ قۇقىقتىق مارتەبەسى تۋرالى كونۆەنتسياعا قول قويۋ - تاريحي ماڭىزدىلىققا يە. بۇل قۇجاتتى دايىنداۋدىڭ بارلىق كەزەڭىندە ازەربايجان تاراپى كونسترۋكتيۆتى تۇردە جۇمىس ىستەپ, وزگە دە كاسپي ماڭى ەلدەرى سەكىلدى ءوزىمىزدىڭ ۇلەسىمىزدى قوستىق. سوندىقتان بۇگىن اتالعان ماڭىزدى قۇجاتقا قول قويۋ ءۇشىن قولايلى جاعداي جاسالعانىنا ارىپتەستەرىمە العىسىمدى ايتامىن. نەگىزى, وسى كونۆەنتسياعا دەيىن دە كاسپي تۇراقتىلىق پەن قاۋىپسىزدىكتىڭ تەڭىزى بولدى. اتاپ ايتقاندا, كاسپيدەگى قاۋىپسىزدىككە ءبىزدىڭ قارىم-قاتىناستارىمىز كەپىلدىك بەردى, ياعني ەكىجاقتى ءارى كوپجاقتى بايلانىستاردى بارشامىز دوستىق نەگىزدە جۇرگىزدىك», دەدى ءازىربايجان پرەزيدەنتى.
ونىڭ ايتۋىنشا, كاسپي ماڭى ەلدەرى اراسىندا ىنتىماقتاستىقتىڭ, ءوزارا سەنىمنىڭ جوعارى دەڭگەيى قالىپتاسقان. سوندىقتان بۇل قاتىناستار ارى قاراي دا قاۋىپسىزدىك پەن تۇراقتىلىقتىڭ باستى كەپىلدىگى بولادى.
«ەندى كاسپيدەگى قاۋىپسىزدىك ءبىز قول قويعان كونۆەنتسيامەن ايقىندالادى. ارينە, بۇل ءوز كەزەگىندە ءوزارا تىعىز ءىس-قيمىلدارعا ءتيىمدى پەرسپەكتيۆالاردى اشادى. سونىمەن قاتار, ەكونوميكالىق ءارى كولىكتىك ماسەلەلەردى شەشۋگە تىڭ سەرپىن بەرىلەدى», دەدى ي. اليەۆ.
ونىڭ اتاپ وتۋىنشە, ازەربايجان ۇكىمەتى كاسپي تەڭىزىنىڭ لاستانۋىنا توسقاۋىل قويۋ شارالارىن ىسكە اسىرۋدا.
«اسىرەسە, مۇناي-گاز وپەراتسيالارىن ىسكە اسىرۋ كەزىندە ەكولوگيا تالاپتارىنا ءمان بەرىپ كەلەمىز. تاۋەلسىزدىك كەزەڭىندە ءبىزدىڭ ەل تاراپىنان جۇرگىزىلگەن جەر قويناۋىن پايدالانۋ شارالارى حالىقارالىق ستاندارتتارعا سايكەس اتقارىلىپ كەلەدى», دەدى ازەربايجان باسشىسى.
