قوعامدىق كەڭەس وتىرىسى بارىسىندا قالا قاۋىپسىزدىگى ماسەلەسىن شەشۋ جولدارى تالقىلاندى. ەندى الماتى قالاسىندا قىلمىستىڭ الدىن الۋ ءۇشىن 16 مىڭ سەرگەك كامەرا ورناتىلادى. بۇل تۋرالى قالالىق قوعامدىق كەڭەس وتىرىسىندا ىشكى ىستەر ءبولىمىنىڭ باسشىسى سەرىك كۇدەباەۆ ايتتى. ونىڭ ايتۋىنشا, سەرگەك كامەرالاردى جول بويىنا ورناتقاننان كەيىن جول-كولىك اپاتىنىڭ كورسەتكىشتەرى تومەندەگەن. ەندى وسى تاجىريبە جاياۋ جۇرگىنشىلەر جولى مەن كوپشىلىك ورىنداردا دا قولدانىلادى. قازىر مەگاپوليستەگى قوعامدىق ورىندارداعى كامەرالار ەسكىرگەن. ال, ءىرى مەگاپوليستىڭ شەت جاعىنداعى كەيبىر كوشەلەردىڭ بويىندا كامەرا ورناتىلماعان. سول سەبەپتى بارلىق كوشەلەرگە كامەرا ورناتىلىپ, ەسكىرگەن كامەرالار جاڭارتىلادى.
«تالداۋ جوباسى بويىنشا قالا اكىمدىگىنەن ءاربىر اۋدانعا 2000 سەرگەك كامەرا ورناتۋعا قارجى ءبولىندى. بۇل مەگاپوليستە قوعامدىق ورىندار مەن كوشە بويلارىنا 16 مىڭ بەينەباقىلاۋ كامەراسى ورناتىلادى دەگەن ءسوز. سول ارقىلى قوعامدىق ورىندارداعى قىلمىستى تومەندەتۋ ماقساتى قويىلىپ وتىر. ەگەر بۇل جوبا جۇزەگە اسسا شاھارداعى بارلىق تۇرعىن ۇيلەردىڭ اۋلالارىنداعى كامەرالاردى دا تالداۋ جوباسىنا قوسامىز. بۇل ءتارتىپ ساقشىلارىنا جەدەل ارەكەت ەتۋگە كومەكتەسەدى», دەدى قالالىق ىشكى ىستەر ءبولىمىنىڭ باسشىسى سەرىك كۇدەباەۆ.
