ەلباسى نۇرسۇلتان نازارباەۆ «قازاقستاننىڭ الەۋمەتتىك جاڭعىرتىلۋى: جالپىعا ورتاق ەڭبەك قوعامىنا قاراي 20 قادام» اتتى ماقالاسىندا «مىسالى, وتە كوكەيكەستى بولىپ تابىلاتىن «قازاقستان قۇقىعى» (ونىڭ بولماۋى جاستاردىڭ قۇقىقتىق نيگيليزمى مەن ساۋاتسىزدىعىنا سوقتىرادى), «ولكەتانۋ» (تۋعان جەرگە ماحاببات وتانشىلدىقتىڭ نەگىزى عوي), جەكە تابىسقا جەتۋدىڭ, جەكە تۇلعانىڭ الەۋمەتتانۋىنىڭ ادىستەمەسى سىندى «اكمەولوگيا» سياقتى پاندەر قايدا؟ ولاردىڭ جوقتىعى جاستاردىڭ ەداۋىر بولىگىنىڭ الەۋمەتتىك ينفانتيليزمىنە, ەرەسەك ومىرگە بەيىمدەلە الماۋىنا, باسقا دا كەلەڭسىزدىكتەرگە ۇرىندىرادى» دەگەن بولاتىن. قازىرگى كەزدە مەملەكەت تاراپىنان جاستاردىڭ ءبىلىم الۋىنا ءتيىستى جاعداي جاسالىپ كەلەدى. ۇمىت قالعان پاندەر قايتادان ءبىلىم جۇيەسىنە ەنگىزىلدى. مەكتەپ وقۋلىقتارىنىڭ مازمۇنى جاڭارىپ, بيىك دەڭگەيگە كوتەرىلدى.
بۇگىن جامبىل وبلىستىق ءبىلىم باسقارماسىنىڭ ءماجىلىس زالىندا اتالعان باسقارمانىڭ ۇيىمداستىرۋىمەن مەكتەپ وقۋشىلارىنىڭ 5, 6 جانە 7 سىنىپتارىنا ارنالعان «ولكەتانۋ. جامبىل وبلىسى» وقۋلىعىنىڭ تانىستىرىلىمى ءوتتى. ولكە تاريحىن قامتىعان كىتاپ ەلباسىنىڭ «بولاشاققا باعدار: رۋحاني جاڭعىرۋ» باعدارلامالىق ماقالاسى اياسىندا جارىق كورىپ وتىر. اتالعان شاراعا وقۋلىقتى قۇراستىرۋشى جەرگىلىكتى عالىمدار, ولكەتانۋشىلار, جازۋشىلار مەن قوعام قايراتكەرلەرى, ادىسكەرلەر مەن پراكتيك-مۇعالىمدەر قاتىستى.
«ولكەتانۋ» وقۋلىعىنىڭ باعدارلاماسى 2017 جىلى 10 تامىزدا قازاقستان رەسپۋبليكاسى ءبىلىم جانە عىلىم مينيسترلىگىمەن بەكىتىلدى. وقۋلىق ىبىراي التىنسارين اتىنداعى ۇلتتىق ءبىلىم اكادەمياسىنىڭ «ولكەتانۋ» كۋرسى وقۋلىعىن ازىرلەۋگە ارنالعان ادىستەمەلىك ۇسىنىمدارىنا سايكەس جازىلدى. «ولكەتانۋ» وقۋلىعىنىڭ جوباسى وبلىس اكىمدىگىنىڭ جانىنان قۇرىلعان رەداكتسيالىق كەڭەستە, قازاقستان رەسپۋبليكاسى ءبىلىم جانە عىلىم مينيسترلىگىنىڭ پاندىك جانە ەكسپەرتتىك كوميسسيالارىندا, اۆتورلىق جۇمىسشى توبىنىڭ وتىرىستارىندا قارالىپ, تالقىلاندى. وقۋلىقتىڭ ەلەكتروندى نۇسقاسى 2018 جىلدىڭ ناۋرىز ايىنان باستاپ وبلىستىق ءبىلىم باسقارماسىنىڭ سايتىندا ورنالاستىرىلىپ, الدىن-الا پىكىرلەر جيناقتالدى», دەدى وبلىستىق ءبىلىم باسقارماسى باسشىسىنىڭ ورىنباسارى ءجاميلا بەكباتىروۆا تانىستىرىلىم بارىسىندا. بۇدان كەيىن وبلىستىق ءبىلىم باسقارماسىنا قاراستى وقۋ-ادىستەمەلىك كابينەتى باسشىسىنىڭ ورىنباسارى بيگەلدى تاجىباەۆ ءوڭىر پەداگوگتارىن «ولكەتانۋ. جامبىل وبلىسى» وقۋلىعىنىڭ مازمۇنىمەن تانىستىردى. وقۋلىقتىڭ قۇرىلىمى «قىمباتتى بالالار!», «كىرىسپە», «قورىتىندى» سياقتى بولىمدەردەن تۇرادى. ءوز سوزىندە ول اتالعان وقۋلىقتىڭ مازمۇنى وقۋشىلار بويىندا تۋعان ولكەنىڭ قالىپتاسۋى مەن دامۋىن كەشەندى سيپاتتايتىن تاريحي-مادەني, گەوگرافيالىق, ەستەتيكالىق, فيلولوگيالىق بىلىمدەرىنىڭ قالىپتاسۋىنا باعىتتالىپ, جاستاردى تۋعان ولكەسىن ايالاپ, قاستەرلەۋگە تاربيەلەيتىنىن جەتكىزدى.
سونداي-اق, جامبىل وبلىسىنىڭ قۇرمەتتى ازاماتى ەلەن ءالىمجان, م.ح.دۋلاتي اتىنداعى تاراز مەملەكەتتىك ۋنيۆەرسيتەتىنىڭ وقىتۋشىسى زيبا قۇلامانوۆا جانە وزگە دە رەداكتسيالىق كەڭەس مۇشەلەرى جارىق كورگەن جاڭا كىتاپ تۋرالى ءوز ويلارىمەن ءبولىستى. «الماتىكىتاپ» باسپاسىنان شىعىپ وتىرعان «ولكەتانۋ. جامبىل وبلىسى» وقۋلىعىندا اۋليەاتا وڭىرىنەن شىققان تاريحي تۇلعالار ءومىرى, تاراز توپىراعىنداعى تاريحي ەسكەرتكىشتەر, جەر-سۋ اتاۋلارىنىڭ تاريحى تولىقتاي قامتىلعان. سونداي-اق, اتالعان وقۋلىقتا شەرحان مۇرتازا, مىرزاتاي جولداسبەكوۆ, ءاسانالى ءاشىموۆ, ومىربەك بايگەلدى سياقتى جازۋشى, عالىم جانە مەملەكەت قايراتكەرلەرىمەن قاتار, ءان الەمىندەگى ءىليا جاقانوۆ, التىنبەك قورازباەۆ ەسىمدەرى دە بار. ەندىگى جەردە اۋليەاتا وقۋشىلارىنا «ولكەتانۋ» وقۋلىعى 5 سىنىپ وقۋشىلارىنا 5 ساعات, 6 سىنىپتارعا 7 ساعات جانە 7 سىنىپ وقۋشىلارىنا 8 ساعات بويى وقىتىلاتىن بولادى. كىتاپ تانىستىرىلىمىنا جينالعان كوپشىلىك اتالعان وقۋلىق وقۋشىلاردىڭ قازاقستان تاريحى, قازاق ادەبيەتى, گەوگرافيا, مۋزىكا ساباقتارىندا العان بىلىمدەرى مەن داعدىلارىن تەرەڭدەتۋگە ىقپال ەتەتىنىن ايتتى.
حاميت ەسامان,
«ەگەمەن قازاقستان»
جامبىل وبلىسى
