قالىڭ توپتا كەلەمىز

ۆانكۋۆەردە ءوتىپ جاتقان ءححى قىسقى وليمپيا ويىندارى بەل ورتادان اۋدى. جارىس كەستەسىنىڭ كوش باسىنداعى مەملەكەتتەر اراسىنداعى ايقاستىڭ ناعىز قىزاتىن تۇسى وسى. ويتكەنى, ازىرگە ەشبىر كوماندا ءوزىنىڭ ۇستەمدىگىن پاش ەتىپ, قالىڭ توپتان قارا ءۇزىپ كەتە العان جوق. ال سولاردىڭ ارقايسىنىڭ اياقالىسى جايىندا ايتار بولساق, تارتىستىڭ ءتورتىنشى تاۋلىگىندە ءبىرىنشى ورىنعا شىققان اقش ءالى دە الدىنا جان سالار ەمەس. امەريكالىقتاردىڭ قورجىنىندا 7 التىن, 7 كۇمىس جانە 10 قولا مەدال بار. كوش باسىنداعى كوماندانى تۇعىردان تايدىرۋعا گەرمانيا, نورۆەگيا جانە شۆەيتساريانىڭ مۇمكىندىگى زور. وسى كۇنگە دەيىن ولار باس جۇلدەنى بەس-بەستەن ولجا­لاپ, الداعى جارىستاردا العا قويعان ماقساتىمىزدى قالاي دا جۇزەگە اسىرامىز دەپ قۇلشىنىپ وتىر. وڭتۇستىك كورەيا مەن كانادا سپورت­شى­لارى ءتورت رەتتەن جەڭىس تۇعىرى­نىڭ ەڭ بيىك ساتىسىنا كوتەرىل­سە, شۆەتسيا­نىڭ قورجى­نىندا ءۇش التىن مە­دال بار. ەندى سوڭعى كۇندەرى وربىگەن جا­رىس­تار جايىندا اي­تايىق. سەنبى مەن جەكسەن­بى كۇندەرى 10 مەدال­دار جيىنتىعى ساراپ­قا سالىندى. بۇل رەتتە كوشباس­شى ەلدەردىڭ ورەندەرى تاعى دا شەبەر­لىكتىڭ شىنايى ۇلگىسىن كور­سەتتى. ادەتتەگىدەي اقش, نورۆەگيا, شۆەتسيا, گەرمانيا, گوللانديا, كانادا, شۆەيتساريا سىندى ازۋلى كوماندالاردىڭ قارقىنى كۇشتى بولدى. اتالمىش مەملەكەتتەردىڭ ءانۇراندارى كۇن سايىن شىرقالىپ, تۋلارى تاۋلىگىنە ءبىر ەمەس, بىرنەشە مارتە ۆانكۋۆەر اسپانىندا جەل­بىرەدى. سنوۋبوردشى تورا برايت­تىڭ الع­ىرلىعىنىڭ ارقاسىندا الىس­تاعى اۆسترا­ليا حالقى وليمپيادا التىنى­نىڭ سىڭعىرىن ەستىدى. سكەلەتونشى ەمي ۋيليامس باس جۇلدە ولجالاپ, ۇلىبريتانيانىڭ شىنايى الەۋەتىن بايقاتتى. ەستونيا, لاتۆيا, حورۆاتيا جانە سلوۆەنيا سىندى شاعىن عانا ەلدەردىڭ ۇل-قىزدارى دا جارىس جو­لىن­د­ا جانكەشتىلىك تانىتىپ, جەڭىس تۇعىرىنان قول بۇلعادى. ول از دەسە­ڭىز, بۇل كۇندەرى وڭتۇستىك كورەيا وع­لان­­دارىنىڭ ايى وڭىنان تۋىپ تۇر. بۇعان دەيىن كارىستەر ءۇش التىنعا يەلىك ەتسە, جەكسەنبىدەگى شورت-ترەك سايى­سىندا لي دجۋن سۋ شاشاسىنا شاڭ جۇقتىرماي, وليمپيادالىق رەكوردتى جاڭارتتى. قازاقستاننىڭ سپورتشىلارى وتكەن اپتا سوڭىندا اۋىز تولتىرىپ ايتارلىقتاي ناتيجە كورسەتە العان جوق. تاۋ شاڭعىسىنان (سۋپەر­گيگانت) يگور زاكۋرداەۆ باق سىناپ, 60-ورىندى قاناعات تۇتتى. شاڭعى­دان (دۋاتلون) ايەلدەر 15 شاقى­رىم­عا جۇگىردى. قورىتىندى ەسەپتە جەرلەستەرىمىز مىناداي ورىندارعا جايعاستى: سۆەتلانا مالاحوۆا­ – 25, وكسانا ياتسكايا – 33, ەلەنا كولو­مينا – 28 جانە مارينا ماترو­سوۆا – 48. دۋاتلوننان ەرلەردىڭ 30 شاقىرىمدىق باسە­كەسىندە ەۆگەني ۆەليچكو مەن سەرگەي چەرەپانوۆ كۇش سىناستى. ەكەۋى دە قالىڭ توپتىڭ اراسىندا قالىپ قويدى. كونكيشىلەردىڭ 1500 مەترلىك باسەكەسىندە دەنيس كۋزين 23-ورىنمەن شەكتەلدى. تۇعىردان سەكىرۋدە (ك-125) الەكسەي كورولەۆ 39-ورىن السا, نيكولاي كارپەنكو ىرىكتەۋدەن وتە المادى. فريستايل­شىلار سايىسىندا (اكروباتيكا) جىبەك اراپباەۆا سىنعا ءتۇستى. الايدا قانداسىمىز ايگىلى سپورت­شىلارمەن يىق تىرەسە المادى. جىبەككە بۇيىرعانى – 23-ورىن. كۇنى كەشە ۆانكۋۆەردە ايدى اسپانعا شىعارىپ, قازاقستانعا وليم­پيادا ءجۇل­دەسىن سىيعا تارتقان ەلە­نا حرۋس­­تالە­ۆا­مەن جولىعىپ, از­دى-كەمدى سۇحبات­تاسۋ­دىڭ ءساتى ءتۇستى. ­– مەن رەسەيدە تۋىپ-ءوستىم. ونىڭ ساپىندا تالاي باي­راقتى باسەكەدە توپ جاردىم. الايدا كەيىننەن ۇلتتىق قۇراما باپكەر­لەرى­مەن ءتىل تابىسا ال­ماي, بەلارۋس ەلىنە قونىس اۋ­دارۋعا ءماج­بۇر بول­دىم. ول جاق­تا دا كوپ تۇراق­تامادىم. سو­دان ەكى ويلى بولىپ ءجۇردىم. بۇل – مەن ءۇشىن اۋىر كۇن­دەر بولدى. بىراق بويىمدا كۇش-قۋات باردا بيىك بەلەستەردى با­عىن­­دىرا الا­تى­نى­ما كامىل سەن­دىم. سول سە­نىم مەنى قازاق­ستانعا جەتە­لەپ اكەلدى. جەر­گى­لىكتى باپكەرلەر, سپورت باسشى­لارى, قارا­پايىم حالىق مەنىڭ تاسا­دا قالىپ قوي­ماي, جاۋاپ­تى جارىس­تار­دا جاسىنداي جارق ەتەتى­نى­مە ەش كۇمان كەلتىرگەن جوق. مىنە, وسىنداي ءتۇسى­نىستىكتىڭ ارقا­سىن­دا ايىم وڭى­نان تۋدى. مەن ءوز ورنىمدى تاپتىم دەپ ويلايمىن. سپورتشى رەتىندە باعىم­دى اشىپ, مىقتىلى­عىمدى مويىن­داتۋعا مۇمكىندىك بەرگەن قازاق ەلىنە دەگەن مەنىڭ العىسىم شەكسىز, – دەپ ەلەنا اعىنان جارىلدى. كەشە التى مەدالدار جيىن­تىعى ءۇشىن تالاس ءوربىدى. قازاق­ستاننىڭ سپورتشىلارى تاۋ شاڭ­عىسى مەن بياتلوننان سىنعا ءتۇستى. العاشقى سىناق يگور زاكۋرداەۆ ءۇشىن اسا ءساتتى بولمادى. ول قالىڭ توپتىڭ اراسىندا قالىپ قويدى. بياتلوننان ماسس-ستارت جارىسىنا تەك 30 ۇزدىك سپورتشى عانا قاتىسۋ مۇمكىندىگىنە يە بولدى. وكىنىشكە قاراي, ەرلەرىمىزدىڭ اراسىنان ونداي مىقتى شىقپادى. ال قىزدار باسەكەسىندە ەلەنا حرۋس­تالەۆا ءوز ونەرىن ورتاعا سالدى. 12,5 شا­قىرىم­دىق ماسس-ستارت باسە­كە­سىندە وتان­داسىمىزعا كىل مىق­تىلارمەن تايتالاسۋعا تۋرا كەلدى. الايدا, بۇل جارىستا ەلەنانىڭ جولى بول­مادى. ول نەبارى 27-ورىندى مىسە تۇتتى. سونداي-اق, شايبالى حوككەيدەن توپتىق باسەكەلەر اياقتالدى. ءۇش توپقا بولىنگەن كوماندالار اراسىن­دا ەڭ كوپ ۇپايعا يەلىك ەتكەن ءتورت ۇجىم جارىستىڭ پلەي-وفف باسەكە­لەرىنە شىقتى. قالعاندارى ءتورت-ءتورت جولداما ءۇشىن تالاسقا تۇسەدى. شيرەك فينالدىق ويىندار 25 اق­پان­دا وتەدى. ال بۇگىنگى بىزدەر ءۇشىن باستى دودا شاڭعىدان ەرلەر مەن ايەلدەر قۇراماسىنىڭ كوماندالىق ءسپرينتى. عالىم سۇلەيمەن, ارنايى “ەگەمەن قازاقستان” ءۇشىن – ۆانكۋۆەردەن.