فوتو: ەلامان قابدىلاشىم
تويعا كەلگەن قاۋىم تورايعىر اۋىلىنىڭ جانىنداعى ەتنواۋىلدا جينالدى. ءار اۋداننىڭ ۇيلەرى تىگىلدى. بۇحار جىراۋ, ءماشھۇر ءجۇسىپ, مۇسا شورمانوۆتىڭ اتىمەن اتالعان اۋىلدار جانە «قازاق اۋىلى» قوناقتاردى قۇشاق جايا قارسى الدى.
اقىن سۇلتانماحمۇت حح عاسىردىڭ باسىنداعى قازاق قوعامىنىڭ شىندىعىن, جاڭاشىل وي-پىكىرىن جىگەرلى ولەڭدەرى ارقىلى ايتا ءبىلدى. بۇعان دەيىن «رۋحاني جاڭعىرۋ» باعدارلاماسى اياسىندا باياناۋىل اۋداندىق اكىمدىگى مەن «مادەنيەت پورتالى» سۇلتانماحمۇت تورايعىروۆتىڭ 125 جىلدىعىنا ارنالعان مادەني ءىس-شارالار شەڭبەرىندە رەسپۋبليكالىق اقىندار ءمۇشايراسىن جاريالاعان بولاتىن. ونلاين-مۇشايراعا ەلىمىزدىڭ تۇكپىر-تۇكپىرىنەن 36 اقىن قاتىستى, 108 شىعارما ۇسىنىلدى. ءار قاتىسۋشىنىڭ ولەڭدەرى «مادەنيەت پورتالىندا» جاريالانىپ وتىردى.
تابيعات اياسىندا قۇرىلعان ساحنا تورىندە رەسپۋبليكالىق ونلاين-ءمۇشايرانىڭ جەڭىمپازدارى ماراپتتالدى. قازىلار القاسىنىڭ توراعاسى, اقىن, قازاقستان جازۋشىلار وداعى باسقارما توراعاسىنىڭ ءبىرىنشى ورىنباسارى اقبەرەن ەلگەزەك شىعىس قازاقستان وبلىسىنان كەلگەن راۋان قابيدولدينعا باس جۇلدە تابىس ەتتى. شىمكەنتتىك اقىن باتىرحان سارسەنحان ءبىرىنشى, ەكىنشى ورىندى قارلىعاش قاباي مەن ۇمتىل زارىققان ۇلى يەلەندى. ءۇشىنشى جۇلدەنى الماتىلىق ايدانا قايساربەكقىزىن, كوكشەتاۋلىق قايرات سەيتقازين, پاۆلودارلىق جارقىنبەك امانتاي ۇلى الدى. «مادەنيەت پورتالى» سۇلتانماحمۇت تورايعىروۆ اتىنداعى ارنايى جۇلدە تاعايىندادى. بۇل جۇلدەگە جەرلەسىمىز جولامان ايتكەن يە بولدى.
توي سوڭى مادەني جانە سپورتتىق شارالارمەن جالعاستى.
فاريدا بىقاي,
«ەگەمەن قازاقستان»
پاۆلودار
