ەلباسى قازاقستاننىڭ اسپان تۇستەس كوك تۋى استانانىڭ قالىپتاسۋى مەن بۇكىل ەلىمىزدىڭ دامۋ جولىن ايشىقتايتىنىن ايتتى.
– باتىر بابالارىمىز ءبىزدىڭ زور جەڭىستەرگە جەتۋىمىزدى تىلەپ, ءاردايىم تۋدى تىك ۇستاۋدى وسيەت ەتتى. سودان بەرى ءبىز بارلىق جەتىستىككە كوك بايراقتىڭ استىندا قول جەتكىزىپ كەلەمىز. «قازاقستان, تاۋەلسىزدىك, استانا» دەگەن تۇسىنىكتەر ءبىزدىڭ مەملەكەتتىگىمىزبەن, بولاشاعىمىزبەن ءبىرتۇتاس ۇعىمعا اينالدى. قازاقستان – ءبىزدىڭ جالعىز وتانىمىز, تاۋەلسىزدىك – ورىندالعان ارمانىمىز. الەم ەلدەرى تۋلارىنىڭ ەشقايسىنا ۇقسامايتىن كوك تۋىمىزدى دۇنيەجۇزى مويىندادى, – دەدى مەملەكەت باسشىسى.
مەملەكەت باسشىسى ەلىمىزدىڭ سىرتقى ساياساتىنىڭ بەيبىتسۇيگىش سيپاتىن اتاپ ءوتىپ, قازاقستاننىڭ قارۋلى كۇشتەرى ءۇشىن اسكەري كادرلاردى ساپالى دايىنداۋدىڭ ماڭىزدىلىعىن ايتتى.
– سىزدەردىڭ اسكەري قىزمەتتەرىڭىز بەيبىت جاعدايدا ءوتسىن دەپ تىلەيمىن. بىراق مەملەكەت ءاردايىم ءوزىنىڭ قاۋىپسىزدىگى مەن شەكارا بۇتىندىگىن ويلاۋعا ءتيىس. سوندىقتان, ءبىز وفيتسەرلەرىمىزدى تاۋەلسىز قازاقستاننىڭ جاڭا جاعدايىندا, جاڭا قارۋلى كۇشتەرىمىز ءۇشىن وقىتىپ, تاربيەلەيمىز. اسكەري قىزمەتتى لايىقتى اتقارۋدىڭ ۇلگىسىن كورسەتىڭىزدەر, – دەدى قازاقستان پرەزيدەنتى.
نۇرسۇلتان نازارباەۆ جاس وفيتسەرلەرگە ارناعان سوزىندە مەملەكەتتىك تۋعا زور قۇرمەت كورسەتۋ وتاندى سۇيۋمەن بارا-بار ەكەنىن اتاپ ءوتتى. بۇل قازاقستاندىق پاتريوتيزم قۇندىلىقتارىن جانە ەلىمىزدەگى ۇلتتىق بىرەگەيلىكتى نىعايتا تۇسەدى.
– بۇگىن اسكەري وقۋ ورىندارىنىڭ ۇزدىك تۇلەكتەرى وفيتسەرلىك شەن الادى. سىزدەر ارقىلى وسى جىلى وقۋىن ءبىتىرىپ جاتقان جاس وفيتسەرلەردىڭ ءبارىن قۇتتىقتايمىن. وسى ساتتەن باستاپ سىزدەرگە وتان قورعاۋ, قازاقستان ازاماتتارىنىڭ بەيبىت ءومىرى مەن تىنىشتىعىن كۇزەتۋ ءۇشىن كۇردەلى دە مارتەبەلى ميسسيا جۇكتەلەدى. سىزدەر ۇلى بابالارىمىز امانات ەتكەن قاسيەتتى بورىشتى لايىقتى اتقارۋلارىڭىز كەرەك. بۇكىل ءومىر جولدارىڭىزدا وفيتسەرلىك اتاقتى ۇلكەن ابىرويمەن الىپ جۇرىڭىزدەر! – دەدى مەملەكەت باسشىسى.
سالتاناتتى ءراسىم بارىسىندا قازاقستان پرەزيدەنتى – قازاقستان رەسپۋبليكاسىنىڭ جوعارعى باس قولباسشىسىنىڭ قولىنان ەلىمىزدىڭ جوعارى اسكەري وقۋ ورىندارىنىڭ 12 ۇزدىك تۇلەگى قارۋلى كۇشتەردىڭ وفيتسەرلىك شەندەرىن الدى.
سوڭىندا نۇرسۇلتان نازارباەۆ بارشا جۇرتتى استانانىڭ 20 جىلدىعىمەن قۇتتىقتاپ, قازاقستان حالقىنا باق-بەرەكە تىلەدى.
