باۋىرلاس ەلدە بيىل شىڭعىس ايتماتوۆتىڭ 90-جىلدىق مەرەيتويى كەڭ كولەمدە اتاپ وتىلمەك. مەرەيلى مەرەكەگە ازىرلىك جۇمىستارى ازىردەن-اق باستالىپ كەتكەن. اتالعان ەڭبەك سول مەرەيتويعا جاسالعان تارتۋ دەپ تە اتاۋعا بولادى. كىتاپتا ايتماتوۆتىڭ ومىرلىك ونەگەسى, كوپشىلىككە بەيمالىم قىرلارى تۇسىنىكتى ءارى كوركەم تىلدە اسەرلى اڭگىمەلەنەدى. ءبىر سوزبەن ايتقاندا, قايراتكەر قالامگەردىڭ بالالىقتان دانالىققا دەيىنگى ءجۇرىپ وتكەن جولدارىن وسى ەڭبەكتىڭ اياسىنان تاباسىز. تۇركى اكادەمياسىنىڭ پرەزيدەنتى دارحان قىدىرالى ادامزاتقا ورتاق تۇلعا ايتماتوۆ مۇرالارىن زەرتتەۋ ءتۇبى ءبىر تۋىسقان حالىقتاردىڭ اراسىنداعى رۋحاني ساباقتاستىق پەن ادەبي بايلانىستاردى ودان ءارى نىعايتاتىنىن ايتىپ, وسپانقۇل يبرايموۆتىڭ اتالمىش ەڭبەگى وسى ماقساتتىڭ ۇدەسىنەن شىعا الاتىن تانىمدىق تۋىندى ەكەنىن جەتكىزدى.
– تۇركى اكادەمياسى ايتماتوۆتىڭ ايتقاندارىن امانات رەتىندە قابىلداپ, وسى باعىتتاردا ىرگەلى جۇمىستار باستاپ كەتتى. شوقتىعى بيىك شىعارمالارى ارقىلى ادامزاتتىق ماسەلەلەردى كوتەرگەن زاڭعار جازۋشىنىڭ مول مۇراسى ءتۇبى ءبىر تۇركى جۇرتىن ماڭگىلىك مۇراتتار توڭىرەگىندە توپتاستىرۋعا قىزمەت ەتەدى دەپ سەنەمىز, – دەدى دارحان قىدىرالى.
شارا بارىسىندا جازۋشىنىڭ ءىنىسى قىرعىز ەلىنە بەلگىلى گەولوگ يلگيز ايتماتوۆ پەن قارىنداسى روزا ايتماتوۆا ەستەن كەتپەس ەستەلىكتەرىمەن بولىسسە, جازۋشى-درامماتۋرگ سۇلتان راەۆ, اكادەميك ابدىلداجان اكماتاليەۆ, ارحەولوگ جۇمابەك تەنتيەۆ جانە ابىدگاني ەركەباەۆ, جۋماگۇل ساادانبەكوۆ , تاعى باسقا دا عالىمدار مەن ادەبيەتشىلەر ارنايى بايانداما جاسادى.
كىتاپ اۆتورى وسپانقۇل يبرايموۆ: « ۇلى جازۋشىنىڭ ازاماتتىق بولمىسىن, شىعارماشىلىق قۋاتىن, قايتالانباس ءومىر ورنەكتەرىن, كوزى تىرىسىندە ونىمەن رۋحاني بايلانىستا بولعان ادام رەتىندە قالامىما تۇتاس سىيعىزۋعا تىرىستىم. ەڭبەگىمدى باعالاپ, وقىرمانعا جول تارتۋىنا دەمەۋ بولعان تۇركى اكادەمياسىنا ايتار العىسىم شەكسىز» دەيدى.
باۋىرلاس ەلدەردى رۋح بيىگىندە بىرىكتىرگەن ايتۋلى شاراعا ەل جازۋشىلارى اتىنان بەكەن ىبىرايىموۆ, جۇماباي شاشتاي ۇلى, نۇرعالي وراز سىندى قابىرعالى قالامگەرلەر قاتىستى. قىرعىز عىلىم اكادەمياسىنىڭ پرەزيدەنتى, اكادەميك مۇرات جۇماتاەۆ باستاعان قىرعىز ەلىنىڭ زيالى قاۋىم وكىلدەرى تۋىستىق تۋىن بيىككە كوتەرىپ, باياندى ىسكە باستاماشى بولعانى ءۇشىن بارشا قازاق حالقىنا جانە حالىقارالىق تۇركى اكادەمياسىنا ريزاشىلىعىن ءبىلدىردى.
ارمان وكتيابر,
«ەگەمەن قازاقستان»
