عالىم اۋداندىق مادەنيەت ۇيىنە قازاقتىڭ كورنەكتى ايتىسكەر اقىنى, ولكەتانۋشى, شەجىرەشى, جۋرناليست قاليحان التىنباەۆ تالاي ايتىستا قولىنا ۇستاعان دومبىرانى تاپسىردى.
«وسكەمەندەگى جامبىل اتىنداعى مەكتەپ-ينتەرناتتى 1974 جىلى بىتىرگەن كەزدە بۇرىنعى شار اۋداندىق گازەتىنىڭ باس رەداكتورى مەرگەن تۇراروۆ مەنى قىزمەتكە شاقىردى. «بيىل مەكتەپتى بىتىرەدى ەكەنسىڭ. ءبىر ورىن ساعان دايىن» دەدى. ول كەزدە ءتىپتى كازگۋ-ءدى بىتىرگەن جۋرناليستەردىڭ وزىنە ورىن تابىلمايتىن. كەيىن وسى اۋداندىق گازەتتە جۇمىس ىستەدىم. اۋىل-اۋىلداردى ارالاپ ماقالا جازدىم. سول كەزدە قاليحان التىنباەۆ اعامىز كوكپەكتى اۋداندىق «جۇلدىز» گازەتىنىڭ رەداكتورىنىڭ ورىنباسارى قىزمەتىن اتقاردى. ءبىر كۇنى ول كىسى ماعان: «جازۋىڭ جاقسى. ءوزىڭ ءبىزدىڭ جاقتىڭ بالاسى ەكەنسىڭ. تالابىڭا نۇر جاۋسىن. قولدايمىن» دەپ حات جازىپتى. جاس بالاعا ۇلكەن مارتەبە عوي بۇل. سوسىن اعامەن ۇنەمى حات جازىسىپ جۇردىك. ءبىر حاتى – ءبىر تاريح ەدى. ال دومبىراعا كەلسەك, 1990 جىلى جازدا الماتىدا اۋەزوۆ اتىنداعى تەاتردا قازاق كسر-ءنىڭ قۇرىلعانىنىڭ 70 جىلدىعىنا وراي ۇلكەن ايتىس ءوتتى. ايتىستان سوڭ اقىن ءبىزدىڭ ۇيدە قوناقتا بولدى. سول جولى جان سەرىگى – ءوزىنىڭ ۇستاعان دومبىراسىن ماعان ەسكەرتكىش رەتىندە سىيعا تارتتى. دومبىرانى 28 جىل ۇيىمدە ساقتادىم. جارما اۋدانىنىڭ 90 جىلدىعى قارساڭىندا جانە «ۇلتتىق دومبىرا كۇنى» مەرەكەسىنە وراي دارا تۇلعانىڭ الاقانىنىڭ تابى قالعان قۇندى جادىگەردى تۋعان جەرىنە سىيعا تارتۋدى ءجون كوردىم. جاستارعا ۇلگى بولسىن, ايتىسكەردىڭ جولىن جاس ۇرپاقتارعا بەرسىن دەگەن نيەتپەن اكەلدىم», دەيدى س.قوراباي.
اۋداندىق مادەنيەت جانە تىلدەردى دامىتۋ ءبولىمىنىڭ باسشىسى امانجول داۋىتوۆ اقىن ۇستاعان دومبىرا جاقىندا اۋداندىق مۋزەيگە قويىلاتىنىن ايتادى.
ازامات قاسىم,
«ەگەمەن قازاقستان»
شىعىس قازاقستان وبلىسى,
جارما اۋدانى,
قالباتاۋ اۋىلى
