شارا بارىسىندا, دياسپورا وكىلدەرى مەن فرانتسيا ازاماتتارى اسىراپ العان قازاق بالالارى, «قورقىت» مادەني ورتالىعىنىڭ جەتكىنشەكتەرى, ەلشىلىك قىزمەتكەرلەرى مەن ولاردىڭ وتباسىلارى بىرلەسە مەرەكەلىك كونتسەرتتىك باعدارلاما ۇسىندى. دومبىرادا ۇلى سازگەرلەردىڭ كۇيلەرى مەن تانىمال حالىق اندەرى ورىندالدى. سونداي-اق كورەرمەندەر قوبىز, جەتىگەن جانە باسقا دا مۋزىكالىق اسپاپتاردىڭ سۇيەمەلدەۋىمەن شىعارمالار تىڭدادى.
قازاقستاننىڭ فرانتسياداعى ەلشىسى جان عاليەۆ شارانىڭ اشىلۋىنداعى سوزىندە جينالعان قاۋىمدى قۇتتىقتاپ, ەلباسىنىڭ بۇل مەرەكەنى ەلىمىزدىڭ ۇلتتىق مادەنيەت پەن بىرەگەيلىكتى ساقتاۋ جانە قايتا جاڭعىرتۋ ماقساتىندا بەكىتكەنىن جەتكىزدى. ول, سونداي-اق 2014 جىلى ءداستۇرلى قازاق دومبىراسىنداعى كۇي ورىنداۋ ونەرى يۋنەسكو-نىڭ ادامزاتتىڭ ماتەريالدىق ەمەس مادەني مۇراسى تىزىمىنە ەنگىزىلگەنىن اتاپ ءوتتى.
سونىمەن قاتار ج.عاليەۆ فرانتسياداعى قازاق مادەنيەتىن ناسيحاتتاۋ بويىنشا بەلسەندى جۇمىسى ءۇشىن «قورقىت» ورتالىعىنا العىسىن ءبىلدىردى.
ەلشىلىكتە باس قوسقاندار دومبىرانى حالقىمىزدىڭ باي مادەني مۇراسىنىڭ نەگىزگى سيمۆولدارىنىڭ ءبىرى ەكەندىگىن اتاپ ءوتتى جانە جاڭا مەرەكە بارلىق قازاقستاندىقتاردىڭ ۇلتتىق بىرەگەيلىگى مەن بىرلىگىن نىعايتۋعا ىقپال ەتەتىن جاقسى ءداستۇردى قالىپتاستىراتىنىنا سەنىم ءبىلدىردى.
«ەگەمەن-اقپارات»
