كونفەرەنتسيادا قازاقستاننىڭ ۇلتارالىق كەلىسىم مەن ديالوگ ورناتۋداعى تاجىريبەسىن تانىستىرۋ جانە تالقىلاۋ, مادەنيەتارالىق ديالوگتى قولداۋداعى ۇزدىك تاجىريبەلەردى انىقتاۋ, جاستار مەن حالىقارالىق ۇيىمداردىڭ ساراپشىلارى اراسىندا تۇسىنىستىك الاڭىن قۇرۋ, «رۋحاني جاڭعىرۋ» باعدارلاماسىن تانىستىرۋ تاقىرىپتارى كوتەرىلدى. ونىڭ جۇمىسىنا ازيا-تىنىق مۇحيتى ايماعىنداعى يۋنەسكو كلۋبتىق قوزعالىسىنىڭ, مەملەكەتتىك ورگاندار مەن حالىقارالىق ۇيىمداردىڭ وكىلدەرى, 200-گە جۋىق حالىقارالىق جانە ۇلتتىق ساراپشىلار قاتىسۋدا.
شارانى مادەنيەت جانە سپورت ۆيتسە-ءمينيسترى اقتوتى رايىمقۇلوۆا اشتى. ونىڭ ايتۋىنشا, كونفەرەنتسيادا كوتەرىلگەن ماسەلەلەر قازاقستان ءۇشىن وتە وزەكتى. «بۇگىنگى شاراعا بيلىك, ازاماتتىق قوعام وكىلدەرى جانە ءتۇرلى حالىقارالىق ۇيىمدار مەن يۋنەسكو-نىڭ 200-دەن استام مامانى قاتىسىپ جاتىر. ولاردىڭ قاتارىندا يۋنەسكو اياسىندا وتكىزىلگەن «The رlanet of ART» شاراسىنىڭ جاس جەڭىمپازدارى دا بار. تاۋەلسىزدىك العان ۋاقىتتان بەرى ەلىمىز اتا-بابالارىمىزدان قالعان مادەني مۇرالاردى قالپىنا كەلتىرۋ بويىنشا جۇيەلى جۇمىستار اتقارۋدا. بۇگىنگە دەيىن قازاق حالقىنىڭ كوپتەگەن مادەني ەسكەرتكىشتەرى, ەل اۋماعىنداعى ماتەريالدىق جانە ماتەريالدىق ەمەس مۇرالار جاڭعىرتىلدى. ال 2013 جىلدان باستاپ قازاقستان وزگە ەلدەردىڭ مۇراعاتىندا ساقتالعان ەل تاريحىنا قاتىستى قۇندى دەرەكتەردى جيناقتاۋ ۇستىندە. بۇل ورايدا, ەلىمىزدىڭ مادەني جاڭعىرۋىنىڭ ءۇشىنشى كەزەڭى, مەملەكەت باسشىسى ۇسىنعان «رۋحاني جاڭعىرۋ» باعدارلاماسى وتە ماڭىزدى. سونداي-اق وسى شارا اياسىندا قوناقتاردى 100-دەن استام مادەنيەت پەن ەتنوس وكىلدەرى بەيبىت ءومىر ءسۇرىپ جاتقان ەلىمىزدىڭ ۇزدىك تاجىريبەسىمەن تانىستىرۋ جانە وزىمىزگە شەتەلدىك قوناقتاردىڭ جۇمىس تاجىريبەسىمەن تانىسۋ مۇمكىندىگى بار. سەسسيالار جۇمىسىنىڭ سوڭىندا تۇراقتى دامۋ جانە قازاقستان مەن ازيا-تىنىق مۇحيتى ايماعى جاستارىنىڭ كوشباسشىلىق قاسيەتتەرىن دامىتۋ بويىنشا ناقتى ۇسىنىمدار ازىرلەنەدى دەپ كۇتەمىز. بۇگىنگى جيىن ارقىلى قاتىسۋشىلاردى يۋنەسكو-عا مۇشە ەلدەردىڭ مادەنيەتىن جاقىنداستىرۋ مەن بەيبىتشىلىككە قولداۋ بىلدىرۋگە شاقىرامىز», دەدى اقتوتى رايىمقۇلوۆا.
بۇدان كەيىن الماتىداعى قازاقستان, قىرعىزستان جانە تاجىكستان بويىنشا كلاستەرلىك بيۋروسىنىڭ ديرەكتورى كريستا پيككات, قازاقستاننىڭ تۇڭعىش پرەزيدەنتى – ەلباسى قورى اتقارۋشى ديرەكتورىنىڭ ورىنباسارى يگور روگوۆ, قازاقستان حالقى اسسامبلەياسى توراعاسىنىڭ ورىنباسارى – حاتشىلىق مەڭگەرۋشىسى لەونيد پروكوپەنكو, يۋنەسكو كلۋبتارى, ورتالىقتارى مەن اسسوتسياتسيالارىنىڭ بۇكىلالەمدىك فەدەراتسياسىنىڭ پرەزيدەنتى دحيرەندرا بحاتناگار, استانا قالالىق تىلدەردى دامىتۋ باسقارماسىنىڭ باسشىسى تىلەۋعالي قىشقاشباەۆ ءسوز سويلەپ, كونفەرەنتسيا جۇمىسىنا ساتتىلىك تىلەدى.
ۆەنەرا تۇگەلباي,
«ەگەمەن قازاقستان»
