وتاندىق جانە حالىقارالىق IT-ماماندار قاتىسقان شارا بارىسىندا ستارتاپتاردىڭ دامۋى بويىنشا جاڭا باعدارلامالار لەگى ىسكە قوسىلدى. اتاپ ايتقاندا, تەحنوپاركتىڭ ەكىنشى اكسەلەراتتاۋ باعدارلامالارى باستاۋ الدى, جاس ءىت-جوبالاردى كەشەندىك دامىتۋمەن اينالىساتىن «100 ستارتاپ» جاڭا جوباسى ىسكە قوسىلدى.
تەحنوپاركتىڭ مۇمكىندىكتەرى جۇرت نازارىنا ۇسىنىلعان شاراعا پرەمەر-ءمينيستردىڭ ورىنباسارى اسقار جۇماعاليەۆ, اقپارات جانە كوممۋنيكاتسيالار ءمينيسترى داۋرەن اباەۆ قاتىسقانىن ايتا كەتەيىك. اسقار جۇماعاليەۆ جاستارعا ارناعان قۇتتىقتاۋ سوزىندە ولاردىڭ قولىنان شىققان IT-جوبالارعا ەرەكشە ماڭىز بەرۋ كەرەكتىگىن, ەلىمىزدە وسى تەكتەس يننوۆاتسيالىق جوبالاردى دامىتۋعا جان-جاقتى مۇمكىندىك جاسالىپ جاتقانىن اتاپ ءوتتى.
– جاڭا عانا بالالار وزدەرى ويلاپ تاپقان, ءوز قولدارىمەن جاساعان جۇمىستارىن كورسەتتى. پرەزيدەنتتىڭ يننوۆاتسيالىق ەكوجۇيە قۇرۋ تۋرالى يدەياسى, ارمانى ومىرشەڭ ەكەنىن, ونىڭ شىندىققا اينالا باستاعانىن بىلدىرەدى. ارينە, بىزگە ءالى بىرقاتار زاڭنامالارعا وزگەرىس ەنگىزۋ كەرەك. قازاقستاننىڭ جانە شەتەلدىك بىلىكتى IT-ماماندارىنىڭ باسىن بىرىكتىرۋ قاجەت. مەن بۇل جەردە ۇلكەن دۇنيە جاسالىپ جاتقانىن ايقىن سەزىنىپ تۇرمىن. جالىنداپ تۇرعان جاستار كوپ ەكەن, – دەدى ا.جۇماعاليەۆ.
سونداي-اق ا.جۇماعاليەۆ «تسيفرلى قازاقستان» باعدارلاماسىنىڭ يننوۆاتسيالىق تەحنولوگيالاردى دامىتۋعا ىقپال ەتىپ, مۇمكىندىكتەردى مولايتاتىنىنا دا توقتالدى.
– مەملەكەت باسشىسى «تسيفرلى قازاقستان» باعدارلاماسىن ماقۇلدادى, اتالعان باعدارلاما نەگىزگى بەس باعىتتان تۇرادى: ادامي كاپيتال, تسيفرلى مەملەكەت قۇرۋ, تسيفرلى ەكونوميكا, تەلەكوممۋنيكاتسيالىق ينفراقۇرىلىم قالىپتاستىرۋ جانە ەڭ باستىسى – يننوۆاتسيالىق ەكوجۇيە قۇرۋ. بۇل جاڭا يدەيالار دۇنيەگە كەلەتىن جانە اقيقاتقا اينالاتىن سالا. ونى ىسكە اسىرۋ ءۇشىن الدىمەن ءتيىستى زاڭنامالارعا تۇزەتۋ ەنگىزۋ كەرەك. قازىرگى تاڭدا ۇكىمەت ۆەنچۋرلىك قارجىلاندىرۋ بويىنشا بەلسەندى جۇمىس ىستەۋدە. سالىقتىق جەڭىلدىكتەر تۇرعىسىنان العاندا, ءبىز بۇگىندە ۆەنچۋرلىك قارجىلاندىرۋ ماسەلەلەرى بويىنشا بارلىق قىزمەتتەرمەن تىزە قوسىپ ارەكەت ەتۋدەمىز, – دەدى ا.جۇماعاليەۆ.
ۇكىمەت باسشىسىنىڭ ورىنباسارى اتاپ وتكەندەي, سالىق جەڭىلدىكتەرى IT سالاداعى ماماندارعا, ستارتاپ جوبالاردىڭ يەلەرىنە ءتيىمدى بولۋى ءۇشىن بارلىق مۇمكىندىكتەردى قولعا الىپ وتىر. مامانداردى مەكتەپتەردە, ينستيتۋتتاردا ازىرلەۋ ىسىنە دە كوڭىل بولىنەدى. ا.جۇماعاليەۆ العاش باستاۋىش سىنىپتاردا باعدارلامالاۋ, روبوت تەحنيكاسى ۇيرەتىلەتىنى تۋرالى ايتىلعان كەزدە ونى تۇسىنبەۋشىلىكتەر بولعانىن, قازىر بارلىعى تۇسىنىستىك تاپقانىن تىلگە تيەك ەتتى.
اقپارات جانە كوممۋنيكاتسيالار ءمينيسترى داۋرەن اباەۆ تا IT-ستارتاپتار تەحنوپاركىنىڭ جۇمىسىن جوعارى باعالادى.
– ءبىز تاريحي وقيعانىڭ, ايرىقشا ۇلتتىق يننوۆاتسيالىق ەكوجۇيەنىڭ قالىپتاسۋىنا كۋا بولىپ وتىرمىز. مەن بۇگىنگى كىشكەنتاي قادامنىڭ بولاشاق ۇلكەن سەرپىنگە نەگىز بولاتىنىنا سەنىمدىمىن. كەلەشەكتە Astana Hub الەمدەگى وزىق تەحنولوگيالار مەن دارىندى ماماندار شوعىرلانعان ۇلكەن ورتالىققا اينالادى. جوبانى ىسكە قوسۋ ارقىلى ءبىز مەملەكەت باسشىسىنىڭ قازاقستاندى تسيفرلى-يننوۆاتسيالىق شەشىمدەر ورتالىعىنا اينالدىرۋ جونىندەگى باستى يدەيالارىن جۇزەگە اسىراتىن بولامىز. قازىرگى زاماندا بۇل ادامي كاپيتالعا ينۆەستيتسيا سالۋ ارقىلى عانا ورىندالاتىنى بەلگىلى» دەپ اتاپ ءوتتى د.اباەۆ مىرزا.
اقپارات جانە كوممۋنيكاتسيالار ءمينيسترى ءوز سوزىندە ەلىمىزدەگى ستارتاپتار مەن IT-جوبالاردى قارجىلاندىرۋعا اتسالىسىپ جاتقان ينۆەستورلارعا العىسىن ءبىلدىردى.
وسى ءىس-شارا اياسىندا بيىك بەلەستەردى باعىندىرعان ستارتاپتاردىڭ نەگىزىن قالاۋشىلار, حالىقارالىق ساراپشىلار ستارتاپتاردىڭ قالىپتاسۋ جولى مەن يننوۆاتسيالىق ەكوجۇيەنى دامىتۋ بويىنشا ويلارىن ورتاعا سالدى.
ارنۇر اسقار,
«ەگەمەن قازاقستان»
