KGIR-2018-گە الەمنىڭ ءىرى كومپانيالارىنىڭ جانە وتاندىق بيزنەستىڭ 600-دەن استام جەتەكشىلەرى, ۇلتتىق ەكونوميكا, قارجى, اۋىل شارۋاشىلىعى, ەنەرگەتيكا, ينۆەستيتسيا جانە دامۋ مينيسترلىكتەرىنىڭ باسشىلارى, الەمدىك ساياساتكەرلەر, ساراپشىلار مەن حالىقارالىق ۇيىمداردىڭ وكىلدەرى, ديپلوماتيالىق كورپۋس قاتىسۋدا. استاناعا قازاقستاننىڭ ينۆەستيتسيالىق دامۋىن تالقىلاۋ ءۇشىن تۇركيادان – 60 ينۆەستور, اقش-تان – 43, گەرمانيادان – 37, ۇلىبريتانيادان – 60, قىتايدان – 49, فرانتسيادان – 28, رەسەي فەدەراتسياسىنان – 30, ءباا-دەن – 74 جانە باسقا دا ەلدەردەن ينۆەستورلار كەلدى.
ءىس-شارانىڭ باستى ماقساتى – قازاقستاننىڭ ينۆەستيتسيالىق مۇمكىندىكتەرىن پاش ەتۋ, ينۆەستيتسيالىق, ەكونوميكالىق دامۋ جانە باسەكەگە قابىلەتتىلىك سالاسىنداعى ەل ساياساتىن تالقىلاۋ. سونىمەن قاتار بۇل باسقوسۋدا 2017 جىلدىڭ تامىزىندا قابىلدانعان قازاقستاننىڭ ۇلتتىق ينۆەستيتسيالىق ستراتەگياسىن ىسكە اسىرۋدىڭ العاشقى ناتيجەلەرى قاراستىرىلۋدا.
پرەمەر-مينيستر ب.ساعىنتاەۆ پلەنارلىق وتىرىستاعى سوزىندە ەلىمىزدىڭ ينۆەستيتسيالىق مۇمكىندىكتەرى تۋرالى اڭگىمە قوزعادى. «بۇل ءبىزدىڭ وسى فورماتتا ەكىنشى باسقوسۋىمىز. بىلتىرعى جەلتوقسانداعى ءبىرىنشى باسقوسۋدا نەگىزگى اڭگىمە قازاقستانعا نە ءۇشىن ينۆەستيتسيالايمىز دەگەن سۇراق اياسىندا وربىسە, بۇگىنگى كۇننىڭ سۇراعى قالاي ينۆەستيتسيالايمىزعا كەلىپ تىرەلىپ تۇر. وسى ماسەلەگە ءبىز دە ءوز تاراپىمىزدان ءبىراز ازىرلەندىك» دەگەن ۇكىمەت باسشىسى قازاقستان ەكونوميكاسىنىڭ قازىرگى جاعدايى مەن كۇشەيىپ كەلە جاتقان الەۋەتى تۋرالى بايانداپ بەردى. وتكەن جىلى مەملەكەت باسشىسى نۇرسۇلتان نازارباەۆ قازاقستاندى ءۇشىنشى جاڭعىرتۋدىڭ كەڭ كولەمدى باعدارلاماسىن جاريالاعان بولاتىن. سونىڭ اياسىندا ءبىراز شارۋا تىندىرىلدى. 2017 جىلدىڭ ەكونوميكالىق ءوسىمى 4 پايىزدى قۇرادى. ەلىمىز جاھاندىق بيزنەس رەيتينگىندە العا باسىپ, 32-ورىندى يەلەندى. شيكىزاتتىق ەمەس سەكتورعا كەلگەن ينۆەستيتسيالاردىڭ ۇلەسى 50 پايىزعا جەتتى. بيىلعى جىلى 3,9 ملرد دوللاردىڭ 54 جوباسى ىسكە اسىرىلماق. مۇندا ونەركاسىپتىك وڭدەۋدىڭ جوعارى شەگىنە ەكپىن تۇسىرىلۋدە.
سونىمەن قاتار بيزنەستىڭ الدىنداعى اكىمشىلىك كەدەرگىلەردى ازايتۋ بويىنشا كوپتەگەن پارمەندى شارالار جۇزەگە اسۋدا. بۇل جونىندە مەملەكەت باسشىسى قول قويعان ءتيىستى زاڭدا بيزنەسكە مەملەكەت تاراپىنان جاسالاتىن باقىلاۋ 30 پايىزعا ازايتىلدى. جەر قويناۋىن يگەرۋ تۋرالى جاڭا زاڭ قابىلدانىپ, ء«بىرىنشى كەلدى – ءبىرىنشى الدى» قاعيداسىمەن جۇمىس ىستەيتىن اۆستراليالىق ادىسكە جول اشىلدى. مەملەكەت پەن جەكەمەنشىك ارىپتەستىگى نىعايتىلىپ, كوشى-قون زاڭىنا وزگەرىس ەنگىزىلدى. شەتەلدىك تەحنولوگيانى اكەلسە, وعان كەدەندىك باج سالىعى سالىنبايتىن بولدى.
جالپى پلەنارلىق وتىرىستىڭ ءوزى سۇراق-جاۋاپ تارتىبىندە ءوربىدى. CNBC (سينگاپۋر) ارناسىنداعى Street Signs حابارىنىڭ بىرلەسىپ جۇرگىزۋشىسى وريەل مورريسون جيىندى وسىنداي تارتىپپەن جۇرگىزىپ وتىردى.
مۇندا قاتىسۋشى ءاربىر ينۆەستوردىڭ, قازاقستان ۇكىمەتىنىڭ باسشىسىنا, باسقا دا سپيكەرلەر مەن قاتىسۋشىلارعا ءوزىن تولعاندىرعان سۇراقتى بىردەن قويا الۋى وتىرىستىڭ ءمانىن ارتتىرا ءتۇستى. وسىعان وراي پرەمەر-مينيستر وزىنە قويىلعان بىرنەشە سۇراققا جاۋاپ بەردى.
پرەمەر-مينيستردەن كەيىن ءسوز تىزگىنىن قولعا الۋشىلاردىڭ بارلىعى قازاقستاندا ينۆەستيتسيالىق احۋالدىڭ جىل وتكەن سايىن جاقسارىپ كەلە جاتقاندىعىن ايتىپ, وزدەرىنىڭ قازاقستانمەن ىستەس بولۋ تاجىريبەلەرىمەن ءبولىستى. ROTEC ديرەكتورلار كەڭەسىنىڭ توراعاسى ميحايل ليفشيتس ءبىزدىڭ ەلمەن 2011 جىلدان بەرى ىستەس بولىپ كەلە جاتقاندىعىن ايتا كەلە, «ەگەر مەنەن بىرەۋ «قازاقستاندا ينۆەستور ءۇشىن قانداي قولايسىزدىق بار؟» دەپ سۇراسا, مەن مۇندا ءبارى جاقسى دەپ جاۋاپ بەرگەن بولار ەدىم. ال قانداي ماسەلەلەردى جاقسارتۋ كەرەك دەسە, ءبىرىنشى كەزەكتە ينفراقۇرىلىمدار مەن لوگيستيكانى ايتار ەدىم», دەدى.
ال SUN Group باسقارما توراعاسىنىڭ ورىنباسارى شيۆ حەمكا سوڭعى جيىرما جىلدىڭ ىشىندە قازاقستاننىڭ كوپ وزگەرگەندىگىن ايتتى. «مەن اقمولاعا 1996-1997 جىلدارى كەلگەنىمدە بۇل كەڭەستىك بەينەدەگى ەسكىرگەن شاعىن قالا ەدى. ەندى استانانىڭ قازىرگى بەينەسىنە قاراڭىزدار, ايىرماشىلىق جەر مەن كوكتەي. بۇل قازاقستاننىڭ دامۋ قۋاتى مەن بولاشاق زور الەۋەتىن بىلدىرەدى. مۇندا كەلگەن ينۆەستورلار وكىنبەيدى, ولار قازاقستانمەن بىرگە وسەدى», دەدى.
ال پلەنارلىق وتىرىستا ءباا حالىقارالىق ينۆەستورلار كەڭەسىنىڭ «UAE International Investors Council» باس حاتشىسى دجامال سايف ال-جارۆان, قازاقستانداعى قازىرگى جۇرگىزىلىپ جاتقان وزگەرىستەردى بىرىككەن اراب امىرلىكتەرىندەگى جاعدايمەن سالىستىرىپ, ءبىزدىڭ ەلدى بيزنەس ءۇشىن تارتىمدىلىعى جونىنەن دۋباي سەكىلدى كەرەمەتتى اكەلگەن امىرلىك ەلىنىڭ جولىن قۋشى دەپ اتادى. ويتكەنى مۇندا قازىر سوعان ساي ارەكەتتەر جاسالىپ جاتىر.
Kazakhstan Global Investment Roundtable شەڭبەرىندە جالپى قۇنى 4,7 ملرد اقش دوللارىن قۇرايتىن 32 كوممەرتسيالىق قۇجاتقا قول قويىلدى, ول جوعارى تەحنولوگيالىق جوبالارعا ينۆەستيتسيا تارتۋعا جانە ەل ەكونوميكاسىنىڭ بارلىق سالالارىن قامتۋعا قولايلى مۇمكىندىكتەر بەرەدى. اتاپ ايتقاندا: فارماتسەۆتيكا سالاسىندا «Kazakh Invest» جانە «تنك Servier JSC» كومپانيالارىنىڭ اراسىنداعى فارماتسەۆتيكالىق پرەپاراتتاردى ءوندىرۋ جونىندەگى جوبانى جۇزەگە اسىرۋ تۋرالى ءوزارا تۇسىنىستىك مەموراندۋمى; ماشينا جاساۋ سالاسىندا قاراعاندى وبلىسىنىڭ اكىمدىگى مەن Hebei Hua Tong Cable كومپانياسى مەن ت.ب. اراسىندا كابەل ونىمدەرىن ءوندىرۋ بويىنشا جوبانى جۇزەگە اسىرۋدىڭ جول كارتاسى; جەڭىل ونەركاسىپ سالاسىندا ءبىرىنشى كەزەڭدە گوفرلەنگەن كارتون پاكەتتەرىن ءوندىرۋ بويىنشا ينتەگراتسيالانعان زاۋىت سالۋ جانە ەكىنشى كەزەڭدە اق جانە قوڭىر قاعازدار جاساۋ تۋرالى «Kazakh Invest» جانە «Cukurova Holding» تۇرىك كومپانياسى اراسىندا مەموراندۋم جاسالدى.
سۇڭعات ءالىپباي,
«ەگەمەن قازاقستان»
