سۋرەتتى تۇسىرگەن ەرلان ومار, «ەگەمەن قازاقستان»
استانانىڭ جيىرما جىلدىق مەرەكەسى كۇن سايىن, ساعات سايىن جاقىنداپ كەلەدى. ۇلى دالا ەلىنىڭ, قازاقستانىمىزدىڭ ءاربىر پاتريوت ازاماتى نۇر كەلبەتتى استانامىزدىڭ, بايتەرەكتى باس قالامىزدىڭ قارىشتاپ دامىعانىنا قۋانىپ, قۇتتى قادامدار تىلەيتىنى ايان. استانامىزدىڭ ابىرويى اسقاقتاپ, بەدەلى بيىكتەپ, بۇكىل الەم كوز تىگەتىن, قىزىعا قارايتىن, قازاقستاندىقتار شات-شادىمان سەزىمگە بولەنەتىن شاتتىق شاھارىنا اينالدى. ارقانىڭ اجارىنا, ازاتتىقتىڭ ايعاعىنا بالاندى. تاۋەلسىزدىگىمىزدىڭ تۇعىرىنا, تۇراقتىلىق پەن تاتۋلىقتىڭ تىرەگىنە, تۇرىك باۋىرلارىمىز جاپپاي جادىراپ جازىپ, ايتىپ جاتقانداي, تۇركى الەمىنىڭ جۇرەگىنە ۇقساتتى.
كۇللى دۇنيە ءجۇزى مويىنداپ وتىرعانداي, وسىنىڭ ءبارى دە – كوشباسشىمىزدىڭ كورەگەندىگى مەن كەمەڭگەرلىگىنىڭ, بولاشاقتى بولجاي بىلگەندىگىنىڭ, باتىل باستاماشىلدىعىنىڭ, ىزگىلىگى مەن ىزدەنىمپازدىعىنىڭ ناتيجەلەرى. جەڭىستەرى مەن جەمىستەرى.
قازىر قازاقستان رەسپۋبليكاسى الەمدەگى ەڭ وزىق وتىز ەلدىڭ قاتارىنا ەنۋگە ۇمتىلىس پەن قۇلشىنىس تانىتۋدا.
«كۇللى الەم تانىعان, قۇرمەتتەپ تورىنە وزدىرعان بەدەلدى مەملەكەتپىز. مۇنىڭ ءبارى ءبىر كۇندە, ءبىر ساتتە بولا سالعان جوق», دەيدى ەلباسىمىز نۇرسۇلتان ءابىش ۇلى ءوزىنىڭ ء«ومىر وتكەلدەرى» اتتى سۇحبات كىتابىندا. شىنىندا دا مەملەكەت باسشىسى نازار اۋدارعانداي, ادام بالاسى تەز ۇمىتۋعا بەيىم, حالقىمىزدىڭ ءبارى بىردەي بۇگىنگى بەيبىت, باقۋات ءومىردىڭ قاندايلىق قيىندىقتارمەن كەلگەنىن تەرەڭ تۇيسىنە بەرمەيدى, ەلدىڭ دامىپ كوركەيۋى, استانانىڭ اسقاقتاۋى – وزىنەن-ءوزى بولا سالعانداي, ۇيرەنشىكتى سەزىلەتىنى دە راس.
ەلوردامىز – ەلباسىمىزدىڭ ەرەن ەرلىگى. مۇنى جەر ءجۇزىنىڭ ەكى جۇزگە جۋىق مەملەكەتتەرىنىڭ بارشاسى مويىندايدى. بۇل – ايداي اقيقات. استانا ارقىلى, استانادا ءوتىپ جاتقان دۇنيەجۇزىلىك, حالىقارالىق الۋان ءتۇرلى, بەيبىتشىلىككە, تۇراقتىلىققا, تاتۋلىققا, ادامزاتتىڭ بۇگىنى مەن بولاشاعىنا, ىزگىلىكتىڭ ماڭگىلىگىنە قىزمەت ەتەتىن ءىرى-ءىرى, ماڭىزدى دا ءماندى شارالار ارقىلى ءبىزدىڭ كوشباسشىمىز جاھاندى تاڭعالدىرىپ كەلەدى.
تۇڭعىش پرەزيدەنتىمىز نۇرسۇلتان ءابىش ۇلى نازارباەۆ استانا تۋرالى ۇلى باستاماسىن, ىزگىلىكتى يدەياسىن 1994 جىلعى 6 شىلدەدە قازاقستان رەسپۋبليكاسى جوعارعى كەڭەسىنىڭ وتىرىسىندا جاريالادى. كۇردەلى دە قيىن, بىراق كوكەيكەستى ءمانىسى بار سىندارلى شەشىمنىڭ نەلىكتەن قاجەت ەكەندىگىن از سوزبەن عانا ايتىپ بەرگەن بولاتىن. ارينە اركىم ءارتۇرلى قابىلدادى. قابىلداعىسى, ءتىپتى قۇلاق قويعىسى كەلمەگەندەر دە كوپتۇعىن.
1997 جىلعى 10 جەلتوقساندا مەملەكەت باسشىسىنىڭ باستاۋىمەن الماتىدان شىققان كوش-كەرۋەننىڭ ارقا توسىنە, ەسىل-نۇرا جاعالاۋلارىنا قاراي بەت تۇزەگەنى بەلگىلى. 1998 جىلعى 6 مامىر كۇنى پرەزيدەنتىمىزدىڭ جارلىعىنا سايكەس اقمولا استانا اتاۋىنا اۋىستىرىلدى.
ايتا بەرسەك, استانا شەجىرەسى تۋرالى شەرتىلەر سىر از ەمەس.
سول توقسان جەتىنشى جىلى نەگىزگى كوش-كەرۋەننىڭ جولعا شىعارىنان بىرازىراق ۋاقىت بۇرىن نۇرلان نىعماتۋلين باسقارعان توپ اقمولا قالاسىنا بارعانبىز. قازان ايىنىڭ اياعى بولاتىن. نەگىزگى ماقساتىمىز – الدىن الا دايىندىق جۇمىستارىن ۇيىمداستىرۋ, مەملەكەتتىك رامىزدەردى اپارۋ, مەملەكەتتىك ورگانداردىڭ العاشقى كەزەكتە كوشىرىلەتىندەرىنە مۇمكىندىگىنشە جاعداي جاساۋ جانە تاعىسىن-تاعىلار. پرەزيدەنت اكىمشىلىگىنەن بارعان بەس ادام ەدىك. وتە-موتە وزەكتى, مەملەكەتتىك ماسەلەلەر كوپ بولاتىن. ءبارىن بىردەن شەشپەك ءتىپتى دە وڭاي ەمەس. ان-24 ۇشاعىمەن جەتكەنىمىز ەسىمدە. موتورى بىرىلداڭقىراپ, ءۇش ساعاتتاي ۇشتىق قوي. ول كەزدەگى اقمولانىڭ قانداي ەكەنى بەلگىلى. جاي عانا جايداق قالا. تۇرعىندار سانى مۇلدە از.
ۇزىن ءسوزدىڭ قىسقاسى, جۇمىستارعا قىزۋ كىرىسىپ كەتتىك. الماتىدان كوپ ۇزاماي كوش-كەرۋەن شىعادى. ەكى جارىم ايعا دا جەتپەيتىن ۋاقىتتا تالاي تىرلىكتى تىندىرۋ كەرەك. ەلباسىمىزعا بايلانىستى اتقارىلار, دايىندالار جاعداياتتار جەتىپ ارتىلادى. مەملەكەتتىك رامىزدەر جاڭا استانادا ايشىقتانا مەنمۇندالاپ كورىنگەنى ءلازىم.
ەڭ باستى قيىندىق, جاسىراتىنى جوق, تاپ سول قازان-قاراشاداعى قاقاعان سۋىققا بايلانىستى ەدى. الماتىدان بارعاندار ءۇشىن اۋىر بولعانى راس. قاراشانىڭ باسىندا اياز 40 گرادۋستان استى. سەگىزىنشى قاراشا كۇنى مەملەكەتتىك رامىزدەردى الماتىدان اقمولاعا كوشىرۋ ءراسىمىن وتكىزدىك. سول كۇنى تەمپەراتۋرا 39 گرادۋس بولىپ تۇردى. پرەزيدەنت رەزيدەنتسياسىن ازىرلەپ ۇلگەرىپ, الماتىدان اپارىلعان گەربىمىز – ەلتاڭبامىز بەن مەملەكەتتىك تۋىمىزدى سالتاناتتى جاعدايدا ورنالاستىردىق.
ابىلاي حان كوشەسىندە جاتاقحانا سياقتى, بەس قاباتتى ەكى كوممۋنالدىق ۇيگە ورنالاستىق. ءار پاتەردە 3-5 ادامنان تۇردىق. تاڭ قىلاڭ بەرگەننەن باستاپ ءتۇن ورتاسىنا دەيىن جۇمىس. تاماقتانۋدىڭ ءوزى دە وڭاي ەمەس-ءتى. اقمولادا ساپالى اس ىشەتىن ورىندار دا جوقتىڭ قاسى عوي ول كەزدە.
العاشقىدا, ءتىپتى اقمولاعا كوشىپ بارعان كەزدە دە ادامداردا كۇدىك پەن كۇمان كوپكە دەيىن سەيىلگەن جوق. سەنبەدى. تالايلار. ءبارىن دە ەلباسىمىزدىڭ ەرلىگى جەڭدى. نۇرسۇلتان ءابىش ۇلىنىڭ قايران قالارلىقتاي قاسيەتتەرى ايتىلىپ, جازىلىپ ءجۇر. ول كىسىنىڭ ادامدى, جۇرتتى باۋراپ الاتىنى, ىشكى-سىرتقى مادەنيەتى, ەرۋديتسياسىنىڭ زاڭعار بيىكتىگى, ءوزى باستاعان ىسىنە ءوزى دە, وزگەنى دە سەندىرىپ, يلاندىرا الاتىنى تاڭعالدىرادى. بىرتە-بىرتە ەلباسى يدەياسىنا ءبارى دە سەندى. يلاندى. سەنىم سونشالىقتى ەرەكشە ەكپىنمەن نىعايدى. كوپ ۇزاماي مەملەكەتتىك ورگانداردىڭ ءبارى كوشىرىلدى, ارتىنشا ەلشىلىكتەر دە شەتىنەن قونىس اۋدارۋعا كىرىستى...
پرەزيدەنتىمىز نۇرسۇلتان ءابىش ۇلى نازارباەۆ – استانانىڭ اۆتورى, باس ساۋلەتشىسى. استانانىڭ ارحيتەكتۋراسى ايرىقشا بولسا, ول-داعى – ەلباسىمىزدىڭ ەرلىگى, ەڭبەگى. كوپتەگەن عيماراتتاردىڭ اۋەلگى جوباسىن ءوز قولىمەن سىزدى پرەزيدەنت. ءتىپتى تاماقتانىپ وتىرىپ-اق اسحانالاردىڭ اق مايلىقتارىنا سىزىپ كورسەتىپ, باستاپ بەرەتىن. ماسەلەن, پرەزيدەنتتىڭ مادەنيەت ورتالىعى, بايتەرەك سياقتى سان الۋان ساۋلەت ونەرىنىڭ تۋىندىلارى مەملەكەت باسشىسىنىڭ سىزبالارىنان باستاۋ العان.
ەلباسى ءاربىر عيماراتتىڭ سالىنۋ بارىسىن ءجىتى قاداعالاپ, تىنىمسىز تەكسەرەتىن. پرەزيدەنت اكىمشىلىگىنىڭ ەڭ العاش ورنالاسقان عيماراتى قالالىق اكىمشىلىكتىڭ ارتقى جاعىنداعى ءتورت قاباتتى جاي ەدى. ول جۋىق ارادا بىتە قويمادى. جەلتوقساندا پارلامەنت پالاتالارىنىڭ العاشقى بىرلەسكەن وتىرىسى ءوتۋى ءتيىس. مازاسىزدىق كۇشەيە ءتۇستى. توعىزىنشى جەلتوقسان كۇنى كەشكە تاعى دا باردىق. 600-700 ادام جۇمىس ىستەپ جاتىر. نەگىزگى بولىكتەرى سىلانىپ بىتكەن, سىرلاۋعا كىرىسكەن. ال ەرتەڭىنە ەلباسى سەنات پەن ءماجىلىستىڭ بىرىككەن وتىرىسىن اشۋى كەرەك. دايىندىقتاردىڭ دەڭگەيى الگىندەي. ءتۇن ورتاسى اۋا قايتتىق.
تاڭەرتەڭگى ساعات جەتىدە اسىعىپ جەتتىك. تاعى دا. جۇمىس ءالى جالعاسۋدا.
قارقىندى جان-جاقتى كۇشەيتىپ-اق باقتىق. قۇرىلىس ساتىلارى, باسقىش-باسپالداق تاقتايلار تەز جيناستىرىلا باستادى. باسقا دا نارسەلەر اسىعىس تۇردە اكەتىلىپ جاتىر. شىداي الماي ءار قاباتقا شىعامىز. ساعات تاڭعى توعىزدا كۇمبەزدى زالعا كوۆرولان توسەلە باستادى. جيھازداردىڭ شەتى كورىندى. «ۋھ!» دەدىك-اۋ.
ۇستەلدەر مەن ورىندىقتاردى قويىپ, مەملەكەتتىك تۋ قويىلدى. ساعات توعىزدان وتىز مينۋت وتكەندە قوس پالاتا دەپۋتاتتارىن وتىرعىزدىق. ساعات 9.50-دە ءبارى ساقاداي-ساي دايىن بولدى. ءبىر كەزدە: «قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ!» دەگەن سالتاناتتى داۋىس ەستىلدى. ء«سابي كۇلكىسى ساقتالعان كىسى» دەپ بەلگىلى جازۋشىمىز جازعانداي, اقەدىل ك ۇلىمسىرەپ, استانانىڭ اۆتورى, ۇلت ليدەرى كىرىپ كەلە جاتتى...
بۇل ءبىر عانا جاعدايدىڭ ەسكە الىنعانى عوي. مۇنداي-مۇنداي مانىستەر, ارينە از بولعان جوق. ءبارى ءا دەگەننەن, بىردەن, وزدىگىنەن وپ-وڭاي جۇيەلەنە سالمايدى.
بۇگىندە ءبىز استاناعا ءجيى بارامىز. سونىڭ وزىندە قايران قالامىز. ەلوردامىز جىل سايىن, اي سايىن ەمەس, كۇن سايىن كوركەيىپ كەلەدى.
ەلباسىمىزدىڭ ەڭبەكتەرىن قايتالاي قاراعاندى جاقسى كورەمىن. «ەۋرازيا جۇرەگىندە» اتتى كىتابى 2005 جىلى شىقتى. ىلعي دا ۇستەلىمدە تۇرادى. وسىناۋ تاڭعاجايىپ تۋىندىسىنا نۇرسۇلتان ءابىش ۇلى ءابۋ ناسىر ءال-ءفارابيدىڭ: «شىنايى باقىتقا جەتكىزەتىن ىستەردە تۇرعىندارى ءوزارا كومەكتەسۋ ماقساتىن العا قويعان قالا قايىرىمدى قالا بولىپ تابىلادى, ال ازاماتتارى باقىتقا جەتۋ ماقساتىمەن ءبىر-بىرىنە كومەكتەسىپ وتىراتىن قوعام – قايىرىمدى قوعام» دەگەن قاناتتى قاعيداتىن ەپيگراف ەتىپ العان.
كىتاپتىڭ كىرىسپەسىندەگى بەتاشار سوزىندە ەلباسى: ء«داۋىردىڭ تابى مەن مانەرى ەكى-ءۇش ايشىقتى سىزبامەن بەينەلەنە بەرەدى. ەيفەل مۇناراسى, ۆەستمينستەر, كرەمل... بۇل استانالىق نىشاندار – الەم كارتاسىنىڭ ەڭ ۇزدىك جولباسشىلارى. ولار بۇل كۇندە سولاي جاراتىلعان سياقتى قابىلدانادى. الايدا ولار بەلگىلى ءبىر ادامداردىڭ دارىنىمەن جانە ەڭبەگىمەن جاسالعان. استانانى قۇرۋ – ۇلتتىق تاريحتىڭ جاڭا ءماتىنىن جازۋ. مۇنداي مارتەبە ءاربىر ۇرپاقتىڭ ماڭدايىنا بۇيىرا بەرمەگەن. ەكى مىڭجىلدىقتىڭ توعىسىندا ءبىز شەشىم قابىلداپ, ەۋرازيانىڭ جۇرەگىندە ءىس جۇزىندە جاڭا استانا قۇردىق», دەپ جازعان.
وسى كىتاپتا نەبىر قىزعىلىقتى, بۇكىل ومىرىڭە قىزمەتىڭە ونەگە بولارلىقتاي جاعداياتتار بايان ەتىلەدى. ەلباسى «شەنەۋنىك» دەگەن اتاۋ العان الەۋمەتتىك توپ تۋرالى اسەرلى اڭگىمەلەپ, تىڭ قورىتىندىلار جاسايدى, توسىن ويلار تۇيىندەيدى. «تاريحقا سەنسەك, العاشقى شەنەۋنىكتەر ەجەلگى قىتايدا پايدا بولىپتى. ولاي بولسا, الەمدەگى العاشقى استانا دا قىتايدا پايدا بولعانى داۋسىز», دەيدى پرەزيدەنتىمىز. ەلباسىنىڭ پاراساتتى پايىمىنشا, قالالاردى استاناعا اينالدىراتىن, مەملەكەتتىڭ مۇددەسى مەن كەلەشەگى ءۇشىن استانالىق وزگەرىستەر جاساي الاتىن ءبىر كۇش – وسى شەنەۋنىكتەر. «ناق وسى استانالىق شەنەۋنىكتىك قانا مەملەكەتتىڭ ساياساتىندا بەتكەۇستار بيلىك جۇرگىزۋشىلەر بولىپ تابىلادى. مەملەكەتتىك باسقارۋ مەن قۇرىلىستىڭ مول تاجىريبەسىن جيناقتاعان عۇمىرىمدا مەن استانالىق شەنەۋنىكتىكتىڭ تۇلعاسىنا, سولاردىڭ ىسكەرلىگىنە مەملەكەتتىڭ تاعدىرى تۇگەلىمەن تاۋەلدى ەكەندىگىنە كوز جەتكىزدىم», دەيدى مەملەكەت باسشىسى.
مىنەكي, وسى جولداردى قايتالاي قاراساق, ەلباسىمىزدىڭ جاس استانانىڭ جاڭا اكىمشىلىك كەلبەتىن قالىپتاستىرۋداعى العاشقى قادامداردىڭ ءبىرى رەتىندە مەملەكەتتىك اپپاراتتار ءۇشىن بىلىكتى قىزمەتكەرلەر مەن كاسىبي باسقارۋشىلاردى دايارلاۋعا ايرىقشا كوڭىل ءبولىپ, سول ماقساتتا مەملەكەتتىك قىزمەت سالاسىن سان الۋان قىرلارىنان جەتىلدىرىپ, ءىرى-ءىرى رەفورمالار جاساپ كەلە جاتقانىنا ءتانتى بولامىز.
«كوپتەگەن مىسالدار كورسەتىپ وتىرعانداي, استانانى كوشىرۋ عانا ءىس جۇزىندە شەنەۋنىكتىكتىڭ بەلگىلى كونسەرۆاتيزمىن ەڭسەرۋگە جاردەمدەسىپ, جاڭا استاناداعى جۇرتشىلىقتىڭ وزىق وي اۋانىن كەيىپتەپ, بەينەلەي الاتىن شەنەۋنىكتەردىڭ جاڭا شوعىرىنىڭ كومەگىمەن بۇدان كەيىنگى وزگەرىستەرگە جول اشۋعا مۇمكىندىك بەردى», دەيدى پرەزيدەنتىمىز. وسىلايشا مەملەكەت باسشىسى ۋاقىت تالابىمەن جانە پروگرەسس پارمەنىمەن اشىلعان جاڭا استانا قالىپتاستىرۋداعى شەنەۋنىكتىك مەملەكەتتىك اپپارات نەگىزىن قالاي قۇرايتىنىنا تەرەڭ وي جىبەرەدى جانە ءاربىرىمىزدى تولعانىسقا تۇسىرەدى. مىقتى مەملەكەتتىك اپپاراتتى دا جاڭا استانا جاراسىمدى, جاڭاشا قالىپتاستىراتىنىنا, زامان جۇگىنىڭ اۋىر سالماعىنا بايلانىستى مەملەكەت جۇرەگى – استانا مەن ونىڭ ورنالاسقان جەرى تىڭعىلىقتى تۇردە ىشكى ساياسي سىلكىلەۋدەن وتپەسە, بۇل مەملەكەتتىڭ بۇگىنىنە عانا ەمەس, كەلەشەگىنە دە سالماق سالۋى مۇمكىن ەكەنىن كورەگەندىكپەن كەسكىندەيدى.
ەلباسىمىزدىڭ كەمەڭگەرلىگىنە بارعان سايىن ءتانتى بولا بەرەسىز. شىنىندا دا تۇڭعىش پرەزيدەنتىمىز تاۋەلسىز قازاقستانىمىزدا باتىلدىقپەن, باستاماشىلدىقپەن قولعا العان ستسەناريگە سايكەس ساياسي وزگەرىستەر ءداۋىرى استانانى رەسپۋبليكانىڭ گەوساياسي ورتالىعىنا كوشىرۋ اۋىرتپالىعىمەن تىعىز بايلانىستىرىلا وتىرىپ, كۇشتى پرەزيدەنتتىك بيلىكتىڭ قۇدىرەتىمەن جۇزەگە اسىرىلدى ەمەس پە؟!
2004 جىلعى ماۋسىمداعى جاعداي بويىنشا استانا قازاقستان رەسپۋبليكاسىنىڭ اكىمشىلىك ورتالىعى جانە 517300 تۇرعىنى مەن قوناقتارىنا جايلى تۇرمىستى, جاڭاشا ءومىردى قامتاماسىز ەتەتىن, قاۋىرت دامۋ ۇستىندەگى, ينفراقۇرىلىمى دامىعان ۇلكەن شاھار دەپ باعالاناتىن. تاپ وسىلاي ايتىلاتىن. جازىلاتىن. ەلباسىمىز «ەۋرازيا جۇرەگىندە» كىتابىندا دا تاماشا تۇرعىن ءۇي كەشەندەرىن, ەڭسەلى اكىمشىلىك عيماراتتارىن, گۇلزارلار مەن فونتانداردى, ەڭسەلى ەسكەرتكىشتەر مەن مونۋمەنتتەردى مەرەيلەنە سۋرەتتەپ, تىزبەلەي تىزىمدەيدى.
ودان بەرى دە, مىنەكي, ون ءتورت جىل ءوتتى. ەسىل بويىنداعى ەرەكشە ەلوردا ەكى ەسەدەن الدەقايدا ارتىق دەڭگەيگە دامىپ كەتتى. قارىشتاپ ءوستى. قارقىنداپ كوركەيدى.
ءبىز سوناۋ 1997 جىلعى قازان ايىندا بارعانىمىزدا اقمولادا 280 مىڭ عانا تۇرعىن بار ەدى. قازىر تەك وقۋشىلاردىڭ سانى 250 مىڭنان اسىپتى. استانانىڭ 20 جىلدىعى مەرەكەلەنەتىن بيىلعى جاز ءوتىپ, قىركۇيەك كەلگەندە ەلوردا مەكتەپتەرىنىڭ ءبىرىنشى سىنىبىنا 20 مىڭ بالدىرعان بارادى ەكەن. ستۋدەنتتەردىڭ سانى 53 مىڭعا جۋىقتاعان. ال استانامىزدىڭ حالقى 1 ملن 50 مىڭعا جاقىندادى.
يۋنەسكو-نىڭ ءوزى «بەيبىتشىلىك قالاسى» اتاعان زاۋ-زاڭعار باس قالامىز بۇكىل بايتاعىمىزدىڭ زاماناۋي دامۋىنا سەرپىن بەردى. كوشباسشىمىزدىڭ كورەگەندىگى مەن كەمەڭگەرلىگى ارقاسىندا كۇنى كەشە عانا شىرايلى شىمكەنت شاھارىنا رەسپۋبليكالىق قالا مارتەبەسى بەرىلىپ, ءۇشىنشى ءىرى مەگاپوليسكە اينالسا, ءوڭىر ورتالىعى قازاق حاندىعىنىڭ استاناسى بولعان, ۇلى جىبەك جولىنداعى ءجونى بولەك, جوسىعى ەرەك مەكەنگە, تۇركى دۇنيەسىنىڭ تەكتى تورىنە كوشىرىلەتىن بولىپ, وبلىسىمىزعا تۇركىستان اتاۋى بەرىلدى. ەكى اپتاداي بۇرىن عانا ماقتاارالدا جەتىساي, سارىاعاشتا كەلەس اۋدانى پايدا بولعان. جىلى جاقتىڭ جۇرتشىلىعى جان-جۇرەگىمەن قاتتى قۋانۋدا. تاريحي ماڭىزى وراسان زور وقيعالاردىڭ ءبارى دە – ەلباسىنىڭ ەرەن ەرلىگىمەن قولعا الىنعان رۋحاني جاڭعىرۋىمىزدىڭ ناقتىلى ناتيجەلەرى. بەرەكەلى بەتبۇرىستار. كەمەل كەلەشەكتى كورەگەندىكپەن بولجاي بىلمەكتىڭ جەمىستەرى مەن جەڭىستەرى.
ءيا, استانا – الەمدىك ايدىك شاھار. تۇركى الەمىنىڭ جۇرەگى. تۇركىستان – تۇركى دۇنيەسىنىڭ رۋحاني استاناسى, تەكتى ءتورى.
الدا – استانانىڭ مەرەيلى مەرەكەسى. وسى جىلدىڭ باسىندا تۇركىستان وبلىسىندا «استانانىڭ 20 جىلدىعىنا – 20 نىسان» اكتسياسىن باستاعان ەدىك. ولاردىڭ بىرقاتارى پايدالانۋعا بەرىلدى. ەندى جاڭاشا اتالعان ءوڭىردىڭ ورتالىعى تۇركىستاندا, شاردارا, ماقتاارال, تولە بي, بايدىبەك, تاعى باسقا اۋدانداردا تۇرعىن ۇيلەر, بيزنەستىك-كاسىپكەرلىك كاسىپورىندار, بالاباقشالار, دەمالىس ورىندارى اشىلىپ جاتىر. ەلوردا تويىنا تارتۋ مول.
تۇركىستان وبلىسىنىڭ تۇرعىندارى ۇلىستىڭ ۇيىتقىسى اتانعان قاسيەتتى قارا شاڭىراق ءوڭىردىڭ وزگەشە داستۇرلەرىن ساقتاپ, جاڭعىرتا ءتۇسىپ, بىرلىك پەن ىنتىماقتى نىعايتىپ, جۇمىلا جۇمىس ىستەي بەرەدى. ال ەجەلگى تۇركىستان شاھارى جاڭا ورتالىق رەتىندە تۇركى الەمىنىڭ جۇرەگى اتانعان استاناعا قاراپ بوي تۇزەيتىنى ءسوزسىز.
جانسەيىت تۇيمەباەۆ,
تۇركىستان وبلىسىنىڭ اكىمى
