سۋرەتتى تۇسىرگەن تالعات تانىباەۆ
«رۋحاني جاڭعىرۋ» باعدارلاماسى اياسىندا تۇزىلگەن قاناتقاقتى جوبالاردىڭ قاي-قايسىسى بولسىن اتا-بابامىز بۇگىنگى ۇرپاققا اماناتتاپ قالدىرعان اسىل مۇرالارىمىز بەن ۇلتتىق قۇندىلىقتارىمىزدى كەڭىنەن ۇلىقتاۋعا ارنالىپ,ونىڭ ىشىندە قوس ىشەكتى قارا دومبىرانىڭ تىلمەن ايتىپ جەتكىسىز تىلسىم ءۇنىن ناسيحاتتاۋعا بارىنشا باسىمدىق بەرىلدى. وڭىردەگى كۇي ونەرىنىڭ دامۋ تاريحى جايلى ءسوز ەتسەك, ى. التىنسارين اتىنداعى توسبەلگىنىڭ يەگەرى سەرىكباي قۇسايىنوۆتىڭ ەسىمىن الدىمەن اتالادى. سەكسەننىڭ سەڭگىرىنە كوتەرىلسە دە قاتاردان قالماي, ەڭبەك ەتىپ كەلە جاتقان ابىز اقساقال كەڭەستىك كەزەڭ كەزىندە جامبىل, تيميريازەۆ, شال اقىن اۋداندارىندا, پەتروپاۆل قالاسىندا ۇلتتىق وركەسترلەردىڭ, مۋزىكالىق كوللەدجدە دومبىرا سىنىبىنىڭ قۇرىلۋىنا مۇرىندىق بولعان. العاش رەت تۇساۋى كەسىلگەن ۇلىق مەيرام رۋحىمىزدى وياتىپ, جىگەرىمىزدى قاناتتاندىرادى. وسكەلەڭ ۇرپاق داۋلەسكەر كۇيشىلەر قۇرمانعازى, داۋلەتكەرەي, تاتتىمبەت, دينا, قازانعاپ, سۇگىرلەردىڭ شىعارمالارىمەن تاربيەلەنىپ وسسە, ەلدىك مۇددەنى الدىڭعى ورىنعا قوياتىن ازاماتتار شوعىرى ارتا تۇسەرى كامىل. ويتكەنى, كۇي –حالقىمىزبەن بىرگە جاساسىپ كەلە جاتقان كيەلى دە قاسيەتتى ونەر. ونداعى ازاتتىققا, بوستاندىققا ۇمتىلدىراتىن ۇلى سارىندى تىلمەن ايتىپ جەتكىزۋ قيىن, دەيدى, بارلىق مادەني ءىس-شارالاردىڭ باسى-قاسىندا جۇرگەن سەرىكباي اعامىز.
«كۇدەر» دومبىراشىلار ءانسامبلى ەلىمىزدەگى تاڭداۋلى مۋزىكا ۇجىمدارىنىڭ ءبىرى سانالادى. ءانسامبلدىڭ جەتەكشىسى تويكەن كۇدەروۆا شيرەك عاسىرعا جۋىق ۋاقىت ىشىندە جارتى مىڭداي شاكىرتتىڭ ۇستازى اتانىپ, بولگاريادا 21 مەملەكەتتىڭ قاتىسۋىمەن وتكەن ايتۋلى دودادا توپ جاردى. گران-پريمەن قوسا قوس التىن مەدالدى يەلەندى. بۇل جولى دا ۇلتتىق مادەنيەت پەن بىرەگەيلىكتى ساقتاۋ جانە قايتا جاڭعىرتۋ شەڭبەرىندە ۇيىمداستىرىلعان يگى باستامانىڭ بەل ورتاسىنان تابىلىپ, ۇلتتىق ونەرىمىزدى اسقاقتاتتى. «راحمەت», «سەمەينىي» ءىرى ساۋدا ورتالىقتارىنىڭ ماڭىنا جينالعان جۇرتشىلىق ونەر ۇجىمدارىنىڭ كونتسەرتتىك باعدارلاماسىن قىزىعا تاماشالاسا, «ابىلايحان رەزيدەنتسياسى» مۇراجاي كەشەنىنە كەلۋشىلەر نازارىنا وسىدان 300 جىل بۇرىن جاسالىپ, كونەنىڭ كوزىندەي ىستىق كورىنەتىن دومبىرانىڭ تاريحى ۇسىنىلدى.
جەر-جەرلەردە «بابالاردىڭ كوزىندەي قاسيەتتى دومبىرا» اكتسياسى ۇيىمداستىرىلىپ, ءتۇرلى قايىرىمدىلىق شارالارى كورسەتىلدى. قازاقستان حالقى وبلىستىق اسسامبلەيا مۇشەلەرى مەن ەتنومادەني بىرلەستىكتەردىڭ وكىلدەرى پەريناتالدىق ورتالىقتا بولىپ, وسى كۇنى دۇنيەگە كەلگەن نارەستەگە باعالى سىيىلىق رەتىندە قوس ىشەكتى اسپاپتى تارتۋ ەتتى.
تاۋەلسىزدىك ستتەللاسى الاڭىندا كاسىبي دومبىراشىلاردىڭ قاتىسۋىمەن «كوڭىلاشار», «بالبىراۋىن», «اداي» سەكىلدى ايگىلى كۇيلەر ورىندالدى. جەكە ورىنداۋشىلار دا ءوز ونەرلەرىن ورتاعا سالدى.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى.
