مەموراندۋمعا بىرىككەن ۇلتتار ۇيىمى بالالار قورىنىڭ (يۋنيسەف) قازاقستانداعى وكىلى يۋري وكساميتنىي جانە تۇڭعىش پرەزيدەنت − ەلباسى قورىنىڭ اتقارۋشى ديرەكتورىنىڭ ورىنباسارى سۇلتان ايتجانوۆ قول قويدى. مەموراندۋمعا سايكەس ەكى تاراپ تا ەلىمىزدەگى بالالاردىڭ قۇقىقتارىن قورعاۋ ماقساتىندا قوعام ىشىندە قاجەت اقپارات بەرۋ سالاسىندا تىعىز جۇمىس ىستەمەك.
يۋري وكساميتنىي اتاپ وتكەندەي, بالالىق شاق – ادامنىڭ دامۋىنداعى ەڭ ماڭىزدى كەزەڭ. سالاماتتى, تابىستى جانە باقىتتى ءومىردىڭ ىرگەتاسى قالاناتىن كەزەڭدە جاس جەتكىنشەكتەردىڭ جالىنداعان وتتى يدەيالارىن ەل يگىلىگىنە جاراتا ءبىلۋىمىز قاجەت. ء«بىزدىڭ قور قازاقستانداعى ءار بالانىڭ دەنساۋلىعىنا, تاماقتانۋىنا, قورعانىسىنا جانە ءبىلىم الۋىنا قۇقىقتارىن جۇزەگە اسىرۋ ءۇشىن قىزمەت اتقارادى. تۇڭعىش پرەزيدەنت – ەلباسى قورىمەن تىعىز قارىم-قاتىناسىمىزدىڭ ارقاسىندا بالالاردى كىشكەنتاي كەزىنەن دامىتۋ, ۇلگىلى اتا-انا بولۋ, جاستار تاربيەسى, ينكليۋزيۆتى ءبىلىم بەرۋ ماسەلەلەرىنە قوعامنىڭ نازارىن اۋدارا الامىز دەگەن سەنىمدەمىن», دەيدى يۋ.وكساميتنىي.
ال سۇلتان ايتجانوۆتىڭ ايتۋىنشا قور بالالار مەن جاسوسپىرىمدەردىڭ ينتەللەكتۋالدى جانە شىعارماشىلىق الەۋەتىن اشۋعا كومەكتەسەتىن ءارتۇرلى جوبالاردى جۇزەگە اسىرىپ كەلەدى. جاس دارىنداردى قولداۋ – جالپىۇلتتىق ماڭىزى بار ءىس-شارا. الەۋمەتتىك جوبالار, سونىڭ ىشىندە بالالار ۇيلەرى مەن ينتەرناتتارمەن جىل سايىن بەلسەندى جۇمىس اتقارىلىپ كەلەدى. سونىمەن قاتار ينكليۋزيۆتى ءبىلىم بەرۋ سالاسىندا جۇمىس ىستەۋدە. رەسپۋبليكالىق بالالار پاراليمپيادالىق ستارتتارى, «مەيىرىم» ينكليۋزيۆتى بالالار شىعارماشىلىعى بايقاۋى, «امان كەلەشەك» فەستيۆالى ەرەكشە قاجەتتىلىكتەرى بار بالالاردى قوعامدا الەۋمەتتىك بەيىمدەۋگە باعىتتالعان.
«بۇدان بۇرىن تۇڭعىش پرەزيدەنت قورى يۋنيسەف جانە باسقا دا ۇيىمدارمەن بىرلەسىپ, بالالار كۇنىنە ارنالعان الەۋمەتتىك بەينەروليك جاريالاعان بولاتىن. بولاشاقتا يۋنيسەف-پەن بىرلەسكەن جوبالاردى شىعارماق جانە الەۋمەتتىك ناۋقانداردى قولداۋدى جوسپارلى تۇردە جۇزەگە اسىرىپ وتىرادى», دەيدى س.ايتجانوۆ.
مەموراندۋمعا قول قويىلعاننان كەيىن «KazRoboProject-2018» 10-21 جاس ارالىعىنداعى بالالار مەن جاستار اراسىندا ءبىلىم بەرۋ روبوت تەحنيكاسى بويىنشا رەسپۋبليكالىق عىلىمي-زەرتتەۋ جانە شىعارماشىلىق جوبالار بايقاۋى اشىلدى.
بايقاۋ قازاقستاندا بالالار مەن جاسوسپىرىمدەر اراسىندا ءبىلىم بەرۋ مەن سپورتتى, روبوت تەحنيكاسىن دامىتۋدى كوزدەيدى. ءىس-شارانىڭ ۇيىمداستىرۋشىلارى العا قويعان مىندەتتەرگە سايكەس, وڭىرلەردەگى ۇزدىك جوبالاردى انىقتاۋ جانە رەسپۋبليكالىق كونكۋرسقا قاتىسۋ ءۇشىن ۇزدىك كوماندالاردى قالىپتاستىرۋ, سونداي-اق دارىندى مەكتەپ وقۋشىلارىنا پروفيلدىك ۋنيۆەرسيتەتتەر مەن كومپانيالاردىڭ نازارىن اۋدارۋ – باستى باعدار.
29 مامىر – 9 ماۋسىم ارالىعىندا ەلىمىزدىڭ 16 ايماعىندا بايقاۋدىڭ ىرىكتەۋ كەزەڭدەرى ءوتىپ, وعان 200-گە جۋىق جوبا ۇسىنىلعان. بايقاۋ ەكى جاس كاتەگورياسى بويىنشا, ياعني ءبىرىنشى توپتا 10-15 جاسار بالالار, ەكىنشى توپتا 16-21 جاس اراسىنداعى جەتكىنشەكتەر ءوزارا باق سىناسقان. ەركىن تاقىرىپتاعى جوباعا قاتىسۋشىلارعا قويىلعان باستى شارت – جوبا قوعام ءۇشىن پايدالى بولۋى ءتيىس.
ايتا كەتەيىك, بايقاۋدى قازاقستاندىق ءبىلىم بەرۋ جانە سپورتتىق روبوت تەحنيكاسى «كازروبوتيكس» فەدەراتسياسى ۇيىمداستىردى. ءىس-شارانىڭ باس سەرىكتەسى – قر تۇڭعىش پرەزيدەنتى – ەلباسىنىڭ قورى, سونداي-اق بايقاۋدىڭ شەشۋشى كەزەڭىنىڭ رەسمي سەرىكتەسى «ينفوكوممۋنيكاتسيالىق تەحنولوگيالاردى دامىتۋ قورى» ەكەنىن ايتا كەتكەن ءجون.
جالپى وڭىرلەر بويىنشا ىرىكتەۋ كەزەڭدەرى بارىسىندا «نۇر وتان» پارتياسىنىڭ «جاس وتان» جاستار قاناتى, «قازپوشتا» اق, «زەردە» ۇلتتىق ينفوكوممۋنيكاتسيا حولدينگى» اق, ««استانا EXPO-2017» ۇلتتىق كومپانياسى» اق قولداۋ كورسەتتى.
ميراس اسان,
«ەگەمەن قازاقستان»
