وسى ورايدا ازيا چەمپيوناتىن قورىتىندىلاپ, دزيۋدوشىلارىمىزدىڭ الداعى قازان ايىندا بۋەنوس-ايرەستە (ارگەنتينا) وتەتىن جاسوسپىرىمدەردىڭ ءىىى جازعى وليمپيا ويىندارىنا دايىندىعى تۋرالى دزيۋدودان قازاقستان جاسوسپىرىمدەر قۇراماسىنىڭ اعا جاتتىقتىرۋشىسى عاينوللا ەسەنعاليەۆپەن از-كەم اڭگىمەلەسكەن ەدىك.
– بەيرۋتتا وتكەن ازيا چەمپيوناتىنداعى ناتيجەگە قانداي باعا بەرەسىز؟ ءاۋ باستاعى جوسپارىڭىز ورىندالدى ما؟
– جوسپار تولىق ورىندالدى دەپ ايتا الامىن. 2017 جىلى وتكەن ازيا چەمپيوناتىندا 2 التىن, 6 كۇمىس جانە 7 قولا مەدال العان بولاتىنبىز. بيىل سپورتشىلارىمىز 6 التىن, 5 كۇمىس جانە 4 قولا جۇلدەمەن ەلىمىزگە ابىرويمەن ورالدى. بۇل ءبىزدىڭ دزيۋدوشىلارىمىزدىڭ ەڭ ۇزدىك ناتيجەلەرىنىڭ ءبىرى دەپ تولىق سەنىممەن ايتا الامىن.
– بيىلعى كورسەتكىش بىلتىرعىعا قاراعاندا اجەپتاۋىر كوتەرىلگەنىن بايقاۋعا بولادى. بۇل قازاقستاندىق دزيۋدوشىلاردىڭ بابىندا ەكەنىن بىلدىرە مە؟
– مۇنداي ءىرى دودالارعا وسال سپورتشىلار كەلمەيدى. ءوز ەلىنىڭ كىلەڭ «سەن تۇر, مەن اتايىن» دەگەن سايدىڭ تاسىنداي ىرىكتەلگەن ۇزدىكتەرى جينالدى. ءوزىڭىز ايتىپ وتىرعانداي, جىلدىڭ ەڭ ماڭىزدى دوداسى بولعاندىقتان, بارلىق ەل نەگىزگى قۇرامداعى سپورتشىلارىن قاتىستىردى. سونىمەن قاتار باسقا تۋرنيرلەرگە قاراعاندا ازيا چەمپيوناتىنىڭ جەڭىمپازدارى مەن جۇلدەگەرلەرىنە ۇپاي بەرىلەدى. ال ۇپاي الداعى جاسوسپىرىمدەر اراسىندا وتەتىن وليمپيا ويىندارى ءۇشىن اۋاداي قاجەت. بۇل كورسەتكىش – سپورتشىلارىمىزدىڭ جىل باسىنان بەرگى ەڭبەكتەرىنىڭ جەمىسى.
– وليمپيا ويىندارى دەپ قالدىق قوي, بۇل دوداعا ەلىمىزدىڭ اتىنان كىمدەر قاتىسادى؟ ناقتى ليتسەنزيا العان دزيۋدوشىلار بار ما؟
– ەڭ كوپ ۇپاي بەرىلەتىن جارىس – ازيا چەمپيوناتى. ازيا چەمپيوناتىندا چەمپيون اتانعان دزيۋدوشىلارعا 200 ۇپايدان بەرىلەدى. ءدال قازىر وليمپياداعا مىنا سپورتشى بارادى دەپ ايتا المايمىز. دەسە دە, حالىقارالىق دزيۋدو فەدەراتسياسىنىڭ جاسوسپىرىمدەردى ىرىكتەۋگە ارنالعان وليمپيادا رەيتينگىندەگى ورىندارىنا سايكەس ۇلداردان شەرزود داۆلاتوۆ پەن بەكارىس سادۋاقاس, قىزداردان مارگاريتا گريتسەنكو مەن كريستينا سوتنيكوۆا ءۇمىتتى. قازىرگى تاڭدا شەرزود داۆلاتوۆ 55 كيلو سالماقتا ءۇشىنشى ورىندا تۇرسا, 90 كيلوعا دەيىنگى سالماقتاعى دزيۋدوشىمىز بەكارىس سادۋاقاس ءبىرىنشى ورىندا تۇر. ال قىزداردان مارگاريتا گريتسەنكو (70 كگ) الەمدىك رەيتينگتە ءۇشىنشى, ال كريستينا سوتنيكوۆا ەكىنشى ورىندا تۇر.
حالىقارالىق دزيۋدو فەدەراتسياسىنىڭ ەرەجەسى بويىنشا جاسوسپىرىمدەر اراسىنداعى جازعى وليمپيا ويىندارىنا دزيۋدو بويىنشا ءار ەلدەن ەكى دزيۋدوشىعا (1 ەر, 1 قىز) جولداما بەرىلەدى. ال ءتورت جىلدىقتىڭ باستى دوداسىنا 2001 جانە 2003 جىلى تۋعان جاسوسپىرىمدەر قاتىسا الادى. 2018 جىلدىڭ 1 قاڭتارىندا باستالعان ىرىكتەۋ كەزەڭى شىلدەنىڭ 23-ىنە دەيىن جالعاسادى. وليمپياداعا ناقتى كىمدەر باراتىنى تامىزدىڭ 1-ىندە بەلگىلى بولادى. وعان دەيىن جاس دزيۋدوشىلار جارىستارعا قاتىسىپ, ۇپاي جيناي بەرەدى. الدىمىزدا ۇپاي بەرىلەتىن قىرعىزستاندا جانە گونكونگتا وتەتىن ازيا كۋبوكتارى بار.
– جاسوسپىرىمدەر قۇراماسىندا كىمنەن ءۇمىت كۇتەسىز؟ شاكىرتتەرىڭىزدىڭ اراسىنان ەلدوس سمەتوۆتىڭ ءىزباسارى بولادى دەپ كىمدى ايتا الاسىز؟
– شەرزود داۆلاتوۆ پەن بەكارىس سادۋاقاس ەكەۋى دە قاتارىنان ەكى رەت ازيا چەمپيونى اتانىپ جاتىر. ەگەر شەرزود پەن سادۋاقاس جاسوسپىرىمدەردەن جاستار كومانداسىنا اۋىسقاندا ءدال قازىرگى باپتارىن جوعالتپاسا, ۇلكەن بيىكتەردى باعىندىرادى دەپ ويلايمىن. جالپى, ءوز باسىم وسى ەكى ورەننەن كوپ ءۇمىت كۇتەمىن.
– قازىر قازاقستاندا اۋىر سالماققا قاراعاندا جەڭىل سالماقتاعى بالۋانداردىڭ بابى كەلىسىپ-اق تۇر. جاسوسپىرىمدەر قۇراماسىنان ماكسيم راكوۆ, يسلام بوزباەۆ جانە ەرجان شىنكەەۆتەردىڭ ورنىن باساتىن اۋىر سالماقتاعى دزيۋدوشىلار شىعا ما؟
– ارينە. كەشەگى وتكەن قۇرلىقتىق بىرىنشىلىكتە 6 التىننىڭ ەكەۋىن اۋىر سالماقتاعى دزيۋدوشىلار جەڭىپ الدى. اراسىندا كۇمىسپەن كۇپتەلگەندەر دە بار. جوعارىدا اتاپ وتكەنىمدەي, 90 كيلوعا دەيىنگى سالماقتا بەكارىس سادۋاقاس بيىل ەكى دۇركىن ازيا چەمپيونى اتانىپ, اۋىر سالماقتا ەل نامىسىن ابىرويمەن قورعاپ ءجۇر. 90 كيلودان جوعارى سالماقتاعى مۇحانبەت زۇلقارناەۆ تا ليۆان تاتاميىندە قارسىلاس شاق كەلتىرمەي, جارىس جەڭىمپازى اتاندى. 81 كيلودا ايان بايعازى دا ءوزىن جاقسى كورسەتە ءبىلدى. اتالعان جاس دزيۋدوشىلار ءبىر ورىندا توقتاماي, دايىندىقتارىن پىسىقتاپ, جاستار مەن ەرەسەكتەر ساپىنا اۋىسقاندا دا باپتارىن جوعالتپاسا, قازىرگى قۇراماداعى اۋىر سالماقتاعى بالۋانداردىڭ ورنىن جوقتاتپايتىنىنا سەنىمدىمىن.
اڭگىمەلەسكەن
ايگەرىم توقسانبەك,
جۋرناليست
