6-7 ماۋسىم كۇندەرى وڭتۇستىك كورەيا, تۇركيا, رەسەي, وزبەكستان, قىرعىزستان مەن قازاقستاننىڭ جەتەكشى دارىگەرلەرى مەديتسينانىڭ ماڭىزدى باعىتتارىنىڭ ءبىرىن دامىتۋدىڭ وزەكتى ماسەلەلەرىن تالقىلادى. ءىرى شارا اقتوبە مەديتسينا ورتالىعى جانىنان ءوتىپ جاتىر.
- ەلباسى دەنساۋلىق ساقتاۋ سالاسىن دامىتۋعا ەرەكشە كوڭىل اۋدارادى, قازاقستان تاۋەلسىزدىك جىلدارى ىشىندە مەديتسينادا ايتارلىقتاي جەتىستىكتەرگە جەتتى, يننوۆاتسيالىق تەحنولوگيالار ەنگىزىلۋدە, كۇردەلى وتالار جاسالىپ جاتىر. پرەزيدەنت تاپسىرماسى بويىنشا ەلىمىزدە دەنساۋلىق ساقتاۋ سالاسىن تسيفرلاندىرۋدىڭ ءتيىمدى شارالارى قولدانىلۋدا. ماڭىزدى باعىتتاردىڭ ءبىرى - وتورينولارينگولوگيا تابىستى دامىپ كەلەدى. بۇعان قوسا, ءبىز الىس-جاقىن شەتەلدەردىڭ ماماندارىمەن تاجىريبە الماسۋ جانە حالىقارالىق ارىپتەستىك جۇمىستارىن كۇشەيتۋىمىز قاجەت. حالىقارالىق قاتىناستاردى نىعايتۋ ماقساتىندا وتكىزىلىپ جاتقان عىلىمي-تاجىريبەلىك كونفەرەنتسيا ەلدەگى وتورينولارينگولوگيانى دامىتۋعا جاڭا سەرپىن بەرەتىنىنە سەنىمدىمىن, - دەدى كونفەرەنتسيا جۇمىسىن اشقان وبلىس اكىمى بەردىبەك ساپارباەۆ.
ءوڭىر باسشىسى شەتەلدىك ساراپشىلارعا اقتوبەلىك دارىگەرلەرمەن تاجىريبەلەرىمەن جانە زاماناۋي كومەكتىڭ ادىستەرىمەن بولىسكەندەرى ءۇشىن, وبلىس تۇرعىندارىنا كۇردەلى وتالار جاساپ, تاجىريبەلىك كومەك بەرگەندەرى ءۇشىن العىس ايتتى. اتاپ ايتقاندا, تۇرىك دارىگەرلەرى «باقىتتى بالا» جوباسى اياسىندا ەستۋ قابىلەتى ناشار ءۇش بالاعا تەگىن وتا جاسايدى.
كونفەرەنتسيا كەزىندە وبلىستىڭ وتورينولارينگولوگيالىق قىزمەتىنە سۇبەلى ۇلەس قوسقان دەنساۋلىق ساقتاۋ سالاسىنىڭ ارداگەرلەرى ماراپاتتالدى.
شارا سوڭىندا دەلەگاتتار وسى باعىتتى دامىتۋعا جانە جەتىلدىرۋگە مۇمكىندىك بەرەتىن قاراردى قابىلدادى.
ەكى كۇن بويى وڭتۇستىك كورەيادان, تۇركيادان كەلگەن حيرۋرگ ساراپشىلار, قازاقستاندىق عىلىمي ورتالىقتاردىڭ جەتەكشى پروفەسسورلارى قۇلاق ميكروحيرۋرگياسى, ەندوسكوپيالىق رينوسينۋسوحيرۋرگيا, كومەي ميكروحيرۋرگياسى بويىنشا يننوۆاتسيالىق جوبالاردى قولدانا وتىرا شەبەرلىك ساباقتارىن وتكىزەدى.
تەمىر قۇسايىن,
«ەگەمەن قازاقستان»
اقتوبە
