رەجيسسەر سەرگەي دۆورتسەۆويدىڭ سوزىنشە, «ايكا» ءفيلمى التى جىل بويى تۇسىرىلگەن. فيلم بيۋدجەتى 2,5 ملن ەۋروعا جەتە قابىل. كارتينانىڭ تولىق نۇسقاسى ءبىر ايدان كەيىن رەسەي, قازاقستان اۋماعىندا كورسەتۋ جوسپارلانىپ وتىر.
«ماسكەۋدە 250-دەي قىرعىزستاندىق ايەل بالالارىنان باس تارتىپ, پەرزەنتحانادا قالدىرىپ كەتىپ جاتقانى تۋراسىندا ەستىپ قالدىم. قازاقستاندا تۋىپ-وسكەن مەن ءۇشىن ازياتتىق ايەلدەردىڭ ءوز بالاسىنان باس تارتۋى قاتتى تاڭ قالدىردى. وسى تاقىرىپتى زەرتتەي كەلە, كينو تۇسىرگىم كەلدى», دەدى رەجيسسەر سەرگەي دۆورتسەۆوي. ونىڭ ايتۋىنشا, فيلم ستسەناريى سامالدىڭ ىڭعايىنا قاراي يكەمدەپ جازىلعان. ءفيلمدى ءتۇسىرۋ كەزىندە سامال قىرعىز مادەنيەتى مەن ءتىلىن ۇيرەنۋ ءۇشىن بىرنەشە اي قىرعىزستاندا تۇرعان.
سەرگەي دۆورتسەۆويدىڭ ايتۋىنشا, فيلمدە بالانى ەمىزەتىن ساحنادا دۋبلەردىڭ كومەگىنە جۇگىنۋگە تۋرا كەلگەن. «سەبەبى بالانى كادىمگىدەي ەمىزۋ كەرەك ەدى. وسى سەبەپتى دۋبلەردىڭ كومەگىن پايدالاندىق. قاقاعان قىستا جالاڭاياق قاردىڭ ۇستىندە جۇرۋگە ءتوزۋ عانا كەرەك ەمەس, شەبەر ويناۋدى قاجەت ەتەدى. قالعانىن سامالدىڭ ءوزى ويناپ شىقتى. جالپى, سامالدىڭ بويىندا تۋا ءبىتتى قايسار مىنەز جاتىر, ىشكى قۋاتى مىقتى. سول سەبەپتى دە باستى رولگە سامالدى تاڭدادىم. جاڭا بوسانعان ايەلدىڭ قايعىسىن ءوز بويىنان وتكىزە وتىرىپ, كەلىستىرىپ ويناپ شىقتى», دەگەن رەجيسسەر ءفيلمنىڭ حالىقارالىق ماراپاتقا يە بولۋى قازاقستاندىق كينو ونەرىنىڭ دامۋىنا كوپتەگەن مۇمكىندىك اكەلەتىنىن ايتادى.
ايا ءومىرتاي,
سۋرەتتى تۇسىرگەن ەرلان وماروۆ,
«ەگەمەن قازاقستان»
