وسپانوۆ ءوزىنىڭ شىعارماشىلىق ىزدەنىستەرىندە اسا جوعارى تالعامعا يە. ونىڭ كەسكىندەمەسىنە ءتان قولتاڭباسى اۆتورلىق ءستيلىن ايقىنداعان بىرقاتار ەرەكشە وزگەشەلىكتەرىنەن بىلىنەدى. بۇل كامەرالىق فورماتتاردى تاڭداۋ جانە ناتيۋرمورت جانرىنا دەگەن ايقىن ۇمتىلىس, سونداي-اق ەشكىممەن سالىستىرۋعا كەلمەيتىن تۋىندىنىڭ فورمالدى-تۇستىك قۇرىلىمى. كوزگە كورىنەتىن قاراپايىم زاتتاردىڭ ار جاعىنان سۋرەتشى «جانسىز تابيعات» پەن ادام بولمىسىنىڭ قۇشتارلىعى اراسىندا پاراللەل جۇرگىزۋ ارقىلى جاسىرىلعان درامانى كورۋگە ۇمتىلادى. اۆتور اسا ءمان بەرەتىن جەرگىلىكتى تۇستەر ونى ەموتسيامەن, مانەرلىلىكپەن, شىنايى سەزىمدەرمەن تولتىرا وتىرىپ زاتتىق الەمنىڭ «تىنىش ءومىرىن» بۇزادى.
– سۋرەتشى شىعارمالارىندا ادامدار الەمىندەگى سەكىلدى, زاتتار الەمى دە ءبىر-بىرىمەن جانە سىرتقى ورتامەن كۇردەلى قارىم-قاتىناستا قۇرىلادى. ۇلكەن جانە كىشى, تىعىز جانە ءمولدىر, ءتۇرلى-ءتۇستى, جاندى-جانسىز – بارلىعى دا زەرتتەۋگە جانە جالپى ەكزيستەنتسيالدىق زاڭدىلىقتاردى ۇعىنۋعا باعىتتالعان. سەزانن سياقتى, وسپانوۆ قاراپايىم نىسانداردىڭ شەكتەۋلى سانى ارقىلى الەمنىڭ الۋان تۇرلىلىگىن كورسەتۋگە تىرىسادى – وندا الما نەمەسە شابدالى, ۇستەلدىڭ گەومەتريالىق جازىقتىعى, المۇرتتىڭ نەمەسە ۆازانىڭ سوپاقتىعى «ۇمتىلاتىن» شەڭبەر بار. بىراق عالىم ءوز باعىتىن ىزدەيدى, جەمىستەردىڭ بەينەسىندە تىكەلەي تۇسىندىرمەدەن باس تارتۋ ارقىلى ءتۇستى نىعايتادى, فورمانى كەڭەيتىپ, جارىقتى كۇشەيتەدى, ول زاتتىق الەم مەن تازا دەرەكسىزدىككە كەتۋدىڭ اراسىنداعى نازىك شەكارا تەپە-تەڭدىگىن ساقتايدى, – دەيدى كورمە جەتەكشىسى ەكاتەرينا رەزنيكوۆا.
جارىق پەن كولەڭكە ويىنىن باقىلاپ, فورمالاردىڭ ورگانيكاسىن اڭعارۋ, كۇردەلى ءتۇس بوياۋلارىن پايدالانۋ ارقىلى سۋرەتشى الەمنىڭ سۇلۋلىعى مەن كەمەلدەنۋى تۋرالى تۇسىنىگىمەن ءبولىسىپ, كورەرمەندى باۋراپ اكەتەتىنى ويىمىزعا ورالادى.
سونداي ساتتە, كەنەپ بەتىندە ۋىلجىپ پىسكەن جەمىستەر...
ارمان وكتيابر,
«ەگەمەن قازاقستان»
الماتى
