ارادا شيرەك عاسىردان ءسال اساتىن ۋاقىت وتكەندە قورعانىس سالاسىنداعى جاعداي تۇبەگەيلى وزگەرىپ, اتالعان ماسەلە تۇبىرىمەن جويىلدى. ەلباسى – قارۋلى كۇشتەردىڭ جوعارعى باس قولباسشىسى ن.نازارباەۆتىڭ تاپسىرماسىمەن قورعانىس سالاسىن ساپالى كادرلارمەن قامتاماسىز ەتۋ كەشەندى تۇردە جۇزەگە اسىرىلۋدا. وسىنىڭ ارقاسىندا ارميا ساپى بىلىكتى كادرلارمەن تولىقتى. سولاردىڭ ءبىرى – قورعانىس مينيسترلىگىنىڭ كادرلار جانە ءبىلىم دەپارتامەنتىنىڭ باستىعى قايرات كوپباەۆ.
مەملەكەت باسشىسىنىڭ جارلىعىمەن 7 مامىر – وتان قورعاۋشىلار كۇنى قارساڭىندا وسى سالاداعى ەرەن ەڭبەگىمەن, ۇزدىك قىزمەتىمەن ەرەكشەلەنگەن ازاماتتارعا جوعارى اسكەري اتاقتار مەن سىنىپتىق شەندەر بەرۋ داستۇرگە اينالعانى بەلگىلى. سول ءداستۇر بويىنشا بيىل قارۋلى كۇشتەر جوعارعى باس قولباسشىسى ن.نازارباەۆتىڭ قولىنان گەنەرال-مايور اسكەري اتاعىن العانداردىڭ ءبىرى – وسى قايرات راشيد ۇلى.
گەنەرال بولۋدى ارماندامايتىن جاۋىنگەر بولمايتىندىعىن ەسكەرسەك, دەپارتامەنت باستىعىنىڭ قىزمەت جولى تالاي جاس ساربازعا ۇلگى بولارلىق. قاراعاندى وبلىسىنا قاراستى وسپەن اۋىلىنىڭ تۋماسى – ق.كوپباەۆ قاراعاندى مەملەكەتتىك ۋنيۆەرسيتەتىنىڭ زاڭ فاكۋلتەتىن تامامداعان سوڭ 1991-2009 جىلدار ارالىعىندا اسكەري پروكۋراتۋرا, قارجى پوليتسياسى سالالارىندا, «نۇر وتان» پارتياسىنىڭ ورتالىق اپپاراتىندا قىزمەت اتقاردى. ال 2009 جىلى قورعانىس سالاسىنا ورالىپ, قارۋلى كۇشتەردىڭ باس باسقارماسىنىڭ باستىعى جانە بىرنەشە دەپارتامەنتتىڭ باستىعى قىزمەتىندە بولدى. مۇنان سوڭ استانا قالاسى اكىمى اپپاراتىندا مەملەكەتتىك قۇقىقتىق ءبولىمنىڭ باستىعى بولىپ جۇرگەن ۋاقىتىندا قورعانىس مينيسترلىگىنىڭ كادرلار جانە ءبىلىم دەپارتامەنتىنە شاقىرتۋ الىپ, كۇنى بۇگىنگە دەيىن اتالعان ۇجىمدى باسقارىپ كەلەدى.
ونىڭ ايتۋىنشا, بۇگىندە دەنساۋلىعى مەن مىنەزدەمەسى تالاپقا ساي ءاربىر ازاماتتىڭ اسكەري سالاعا جۇمىسقا ورنالاسۋىنا ەشقانداي كەدەرگى جوق. ونىڭ ۇستىنە قورعانىس سالاسىنا كەلۋگە ىنتالاندىراتىن جەڭىلدىكتەر دە جەتەرلىك. قورعانىس مينيسترلىگىنە قاراستى وقۋ ورىندارىندا اسكەري سالاعا قاجەتتى ماماندىقتاردى دايارلايتىن فاكۋلتەتتەر دە قاجەتتى دەڭگەيدە اشىلعان. ءتىپتى قىز-كەلىنشەكتەردىڭ دە اسكەري سالانىڭ ەسەپ, قارجى, مەديتسينا سالالارىندا جۇمىس ىستەۋلەرىنە مۇمكىندىكتەرى بار.
– سوڭعى جىلداردىڭ وزىندە اسكەري قىزمەتشىلەردىڭ جالاقىلارى جوعارىلاپ, تۇرمىستىق ماسەلەلەرىن شەشۋگە باسىمدىق بەرىلدى. ولاردى تۇرعىن ۇيمەن قامتاماسىز ەتۋدىڭ قاراپايىم ءارى ءتيىمدى جولى بەكىتىلدى. تيىسىنشە, مەملەكەت تاراپىنان اسكەري سالاعا تالاپ تا كۇشەيتىلدى. قازىرگى كۇنى وسى سالانى بىلىكتى ءارى جىگەرلى جاس ماماندارمەن تولىقتىرۋعا باسىمدىق بەرىلۋدە. وسىنداي جۇيەلى جۇمىستاردىڭ ارقاسىندا قازىر ماماندار تاپشىلىعى جويىلدى. بۇگىندە بۇل سالادا قىزمەت ەتۋ ازاماتتارىمىز ءۇشىن ۇلكەن مارتەبە سانالادى. جىل وتكەن سايىن زاڭنامالار دا جەتىلدىرىلىپ, سالانى قۇقىقتىق تۇرعىدان نىعايتۋدىڭ جان-جاقتى شارالارى دا جۇزەگە اسۋدا. ءبىلىمىن ودان ءارى تەرەڭدەتەمىن, بىلىكتىلىكتى ارتتىرامىن دەگەن قىزمەتكەرلەرگە ۇلكەن مۇمكىندىكتەر بار, – دەيدى ول.
بىلتىر عانا ەنگىزىلگەن تىڭ جاڭالىق رەتىندە بۇرىن اسكەري قىزمەتكە قاتىسى بولماعان, اسكەري ۋچيليششەدە, اسكەري وقۋ ورىندارىندا اسكەري دايىندىقتان وتپەگەن ازاماتتار تەك 32 جاسقا دەيىن اسكەري قىزمەتكە كىرە الاتىندىعىن ايتۋعا بولادى. ءبىر كەزدەرى قىزمەت ەتكەن نەمەسە اسكەري قىزمەتكە قاتىسى بار ادامداردىڭ 37 جاسقا دەيىن اسكەري قىزمەتكە كەلۋىنە مۇمكىندىك بار. بۇل – اسكەري قىزمەتكەرلەردى «جاسارتۋدىڭ» امالى.
قايرات راشيد ۇلى وسپەن اۋىلىنان شىققان تۇڭعىش گەنەرال رەتىندە ءوز ومىرىنە اكە تاربيەسىنىڭ ىقپالى زور بولعاندىعىن ايتادى. تۋعان ولكەسىندە تاس جولدار سالعىزىپ, كانال قۇرىلىسىنا جاۋاپتى بولىپ, پارتيادا جاۋاپتى قىزمەتتەر اتقارىپ, كەڭشار باسقارعان راشيد بۇركىتباي ۇلى ۇلىنىڭ قىزمەت جولىن, جەتىستىكتەرىن كورە الماي كەتتى. بىراق تال بەسىكتەن باستالعان اكەنىڭ ۇلاعاتتى تاربيەسى قايرات راشيد ۇلىنا ماقسات-مۇراتتارعا جەتۋ جولىندا ۇدايى تەمىرقازىق بولىپ كەلەدى.
سەرىك ابدىبەك,
«ەگەمەن قازاقستان»
