DAILY NEWS
تۇركيا پرەزيدەنتى رەجەپ تايىپ ەردوعان ەلدە كەزەكتەن تىس پرەزيدەنتتىك جانە پارلامەنتتىك سايلاۋ وتەتىنىن مالىمدەدى. ول ۇلتتىق قوزعالىس پارتياسىنىڭ باسشىسى دەۆلەت باحچەليمەن كەزدەسكەننەن كەيىن وسىنداي شەشىم قابىلداعان.
پرەزيدەنتتىك سايلاۋ كەلەر جىلى ءوتۋى ءتيىس بولاتىن. الايدا مەملەكەت باسشىسىنىڭ شەشىمىمەن ءىس-شارا 2018 جىلدىڭ 24 ماۋسىمىنا جوسپارلانىپ وتىر.
ء«بىز باحچەلي مىرزانىڭ ۇسىنىسىن جان-جاقتى تالقىلادىق. بۇل وتىنىمگە وڭ جاۋاپ بەرۋ رەتىندە سايلاۋدى ەرتەرەك وتكىزۋدى ۇيعاردىق. كەزەكتەن تىس سايلاۋ تۇركيانىڭ ىشكى جانە سىرتقى ماسەلەلەرىنىڭ كۇشەيۋى بارىسىندا كەزدەسەتىن كەدەرگىلەردى جويۋعا كومەكتەسەدى», دەدى ر.ەردوعان.
Hurriet Daily news اگەنتتىگىنىڭ پايىمداۋىنشا, پرەزيدەنتتىك مودەلگە كوشۋدە الداعى سايلاۋدىڭ ماڭىزى زور. ال مەملەكەت باسشىسىنىڭ پىكىرىنشە, مەرزىمىنەن بۇرىن سايلاۋ وتكىزۋ ەل بولاشاعى ءۇشىن قاجەت.
«پرەزيدەنت پەن ۇكىمەت بارىنشا ىنتىماقتاسا جۇمىس ىستەگەنىنە قاراماستان, ەسكى جۇيە ءار قادام سايىن الدىمىزدان شىعا بەرەدى. سيرياداعى جانە باسقا ايماقتارداعى جاعدايدىڭ ءورشۋى جاڭا باسقارۋ جۇيەسىنىڭ قاجەتتىلىگىن كورسەتتى. سوندىقتان ەلىمىزدىڭ بولاشاعى ءۇشىن ناقتى قادامدارعا بارۋىمىز كەرەك», دەدى ر.ەردوعان حالىققا ۇندەۋىندە.
ءبىرىنشى اينالىمدا 50 پايىزدان استام داۋىس جيناعان كانديدات جەڭىمپاز بولىپ سانالادى. ەگەر ەشبىر ۇمىتكەر بۇل مەجەنى باعىندىرا الماسا, كوپ داۋىس جيناعان ەكەۋى ەكى اپتادان كەيىن ەكىنشى كەزەڭدە سايلاۋعا قايتا تۇسەدى.
ازىرگە ادىلەت جانە دامۋ پارتياسى (اكپ) مەن ۇلتتىق قوزعالىس پارتياسىنىڭ اليانسى اتىنان سايلاۋعا كىم تۇسەتىنى رەسمي ايتىلعان جوق. الايدا تۇركيا بۇقارالىق اقپارات قۇرالدارى دا, باتىس مەدياسى دا قازىرگى پرەزيدەنت ر.ەردوعاننىڭ كانديدات اتاناتىنىنا سەنىمدى. الدا-جالدا ول سايلاۋدا جەڭىسكە جەتسە, ەلدى 2023 جىلعا دەيىن باسقارىپ, ەكىنشى مارتە قايتا سايلانۋ قۇقىعىنا يە بولادى.
THE TELEGRAPH
سەرج سارگسيان پرەمەر-مينيستر بولىپ تاعايىندالدى
ۇلتتىق جينالىستىڭ ارنايى جيىنىندا ارمەنيانىڭ بۇرىنعى پرەزيدەنتى سەرج سارگسيان پرەمەر-مينيستر بولىپ تاعايىندالدى. ونى قولداپ 77 دەپۋتات داۋىس بەرسە, 17-ءسى قارسىلىق بىلدىرگەن.
بۇعان دەيىن 2015 جىلى ارمەنيادا كونستيتۋتسياعا وزگەرىستەر ەنگىزىلىپ, ەل باسقارۋ پرەزيدەنتتىك بيلىكتەن پارلامەنتتىك جۇيەگە اۋىسقان بولاتىن. سوعان سايكەس پرەمەر-مينيستر ەل تىزگىنىن ۇستايدى. ال پرەزيدەنت جەتى جىلعا عانا سايلانادى.
ايتا كەتۋ كەرەك, س.سارگسيان 2008-2018 جىلدارى ارمەنيانىڭ پرەزيدەنتى قىزمەتىن اتقارعان بولاتىن. جاڭا پرەزيدەنت بولىپ ارمەن ساركيسيان تاعايىندالدى. س.سارگسياننىڭ پرەمەر-مينيستر رەتىندە سايلانۋى ءىس جۇزىندە ونىڭ ەل تىزگىنىن ۋىسىنان شىعارماعانىن كورسەتەدى.
بيلىك جۇيەسىنىڭ وزگەرۋى مىڭداعان ادامنىڭ شەرۋگە شىعۋىنا تۇرتكى بولدى. ولار ەل استاناسى ەرەۆاننىڭ ورتالىعىندا نارازىلىعىن ءبىلدىرىپ, ۇكىمەت عيماراتتارىنا كىرۋگە مۇمكىندىك بەرمەگەن.
وپپوزيتسيا باسشىسى نيكول پاشينيان «بەيبىت بارقىت رەۆوليۋتسياسىنا» شاقىرىپ, ءوز جاقتاستارىن بۇكىل ەلدە رەۆوليۋتسيالىق ارەكەتكە ۇندەدى. سەيسەنبى كۇنى ورتالىق الاڭعا قىرىق مىڭ ادام جينالعان ەدى. مۇنداي ۇلكەن كولەمدەگى شەرۋ ارمەنيا تاريحىندا بۇرىن-سوڭدى بولماعان. ايتسە دە كۇن وتكەن سايىن نارازىلىق بىلدىرۋشىلەردىڭ قاراسى ازايىپ كەلەدى.
The Telegraph گازەتى شەرۋشىلەر قازىرگى بيلىكتىڭ تۇبەگەيلى وزگەرۋى قاجەت دەپ تالاپ قويعانىن ايتادى. بيلىك وكىلدەرى شەرۋدىڭ زاڭسىز ەكەنىن العا تارتىپ وتىر. ولار تاراتقان اقپاراتقا قاراعاندا, كەيبىر بەلسەندى توپ وكىلدەرى ۇستالعان كورىنەدى.
ارمەنياداعى جاعدايعا بايلانىستى ساراپشىلاردىڭ پىكىرى ەكىگە جارىلدى. ءبىرى سەرج سارگسياندى ايىپتاسا, كەلەسىسى شەرۋ ۇيىمداستىرۋشى نيكول پاشينياننىڭ ارەكەتى نەگىزسىز ەكەنىن ايتىپ وتىر.
