كورمەدە شىعىس قازاقستاندا ءبىر جىل مۇعدارىندا قولعا الىنعان جوبالار دا جان-جاقتى تانىستىرىلدى. شارا بارىسىندا اسىرەسە «موي رودنوي كراي» جانە ۇلى ابايدىڭ ءومىرى مەن شىعارماشىلىعىنا ارنالعان 3D كىتاپتار كوپشىلىكتىڭ قىزىعۋشىلىعىن تۋدىردى.
«بۇل 3D كىتاپتاردىڭ ءبىر قاراعاندا قاراپايىم كىتاپتاردان ەش ايىرماشىلىعى جوق سەكىلدى. دەسە دە قولىڭىزداعى سمارتفوننىڭ نەمەسە پلانشەتتىڭ كومەگىنە جۇگىنە وتىرىپ, ونىڭ ارتىقشىلىعىن بايقاۋعا بولادى. ول ءۇشىن Google Play-دەن قاجەتتى قوسىمشانى قوندىرعىڭىزعا جۇكتەپ العانىڭىز ءجون. اقىننىڭ ءومىرى مەن شىعارماشىلىعىنا ارنالعان كىتاپتان ولەڭدەرى مەن əندەرىن دە تىڭداۋعا بولادى. ءبىزدىڭ كىتاپتارىمىز ۇلكەندەردىڭ عانا ەمەس, بالالاردىڭ دا قىزىعۋشىلىعىن تۋدىرۋدا. 3D تەحنولوگيا وقۋ ۇردىسىندە وقۋشىلاردىڭ ماتەريالدى تولىق مەڭگەرۋىنە كومەكتەسەدى. باعدارلاما اياسىندا əزىرگە ەكى كىتاپتى əزىرلەدىك. قازىرگى كەزدە وڭىرىمىزدە تۇراتىن ۇلتتار مەن ۇلىستاردىڭ سالت-دəستۇرىنە ارنالعان تاعى ءبىر كىتاپتى باسپاعا دايىنداپ جاتىرمىز», دەيدى اتالعان جوبا جەتەكشىسى, شىعىس قازاقستاننىڭ ءبىلىم بەرۋدەگى جاڭا تەحنولوگيالار ايماقتىق ورتالىعىنىڭ ديرەكتورى سەرگەي كوۆالەنكو.
كورمەدە سەمەيدەگى شاكارىم اتىنداعى ۋنيۆەرسيتەت وقىتۋشىلارى كەلۋشىلەر نازارىنا «اباي قاراسوزدەرىن وقىتۋ ادىستەمەسى» جانە «لاتىنعا توتە جول» اتتى كومەكشى ادىستەمەلىك قۇرالداردى ۇسىندى. وقۋ ورنىنىڭ قازاق ادەبيەتى كافەدراسىنىڭ مەڭگەرۋشىسى, فيلوسوفيا دوكتورى (PhD) اراي جۇندىباەۆا اۋەلگى ادىستەمە ۇلى اقىننىڭ قاراسوزدەرىن از ۋاقىتتا ءارى ءتيىمدى مەڭگەرۋگە مۇمكىندىك بەرەتىنىن, ەكىنشى ادىستەمەلىك قۇرال لاتىن قارپىن ۇيرەنەمىن دەۋشىلەرگە تاپتىرماس دۇنيە ەكەندىگىن ايتادى. بۇل ادىستەمەلىك ەڭبەكتەردىڭ ەرەكشەلىگى – اۋديو ديسكىلەر مەن بەينەقۇرىلعىلاردىڭ پايدالانىلۋىندا. سونىمەن قاتار كورمەدە جاس عالىمنىڭ رويا تتسەزانىڭ «The Cuide ot the Future» (بولاشاققا جول نۇسقاۋ) اتتى ەڭبەگىن اعىلشىن جانە ورىس تىلدەرىنەن قازاقشاعا اۋدارعان كىتابى دا تانىستىرىلدى.
«بىلتىر ۋنيۆەرسيتەتىمىزدە ءبىلىم ورنىنىڭ باسشىسى مەيىر عاريفوللا ۇلىنىڭ باسشىلىعىمەن «اكمە» اتتى حالىقارالىق اعارتۋشىلار كلۋبى قۇرىلىپ, «ماڭگىلىك ەل» دەپ اتالاتىن كافەدرا اشىلعان ەدى. اكمە – كونە گرەك ءسوزى. رۋحاني تولىعۋ, ادامنىڭ جاڭا كەزەڭگە قادام باسۋى, بىلگەن-تۇيگەنىن وزگەلەرگە ۇيرەتۋى دەگەن ماعىنا بەرەدى. مىنا سايكەستىكتى قاراڭىز. وسىدان ءبىر عاسىر بۇرىن شاماسىندا, ياعني 1920-1924 جىلدار ارالىعىندا سەمەيدە احمەت بايتۇرسىنوۆ باستاعان الاش زيالىلارى حالىق اراسىندا اعارتۋ جۇمىستارىن جۇرگىزۋ ءۇشىن «اكمە» دەگەن ۇيىم قۇرعان ەكەن. وعان الاش ارىستارىنىڭ كوبى مۇشە بولعان. سول ۇيىمنىڭ ءجۇز جىلدان كە-
ءيىن قايتا جاڭعىرۋى ۇرپاقتار ساباقتاستىعىن اڭعارتسا كەرەك», دەيدى جاس عالىم.
استاناداعى ۇلتتىق مۋزەيدەگى كورمەگە وسكەمەندەگى سارسەن امانجولوۆ اتىنداعى شىعىس قازاقستان مەملەكەتتىك ۋنيۆەرسيتەتى عالىمدارىنىڭ «100 مونوگرافيا» سەرياسىمەن جارىق كورگەن عىلىمي ەڭبەكتەرى دە قويىلدى. بۇل جوباعا ەلىمىزدىڭ وزگە وڭىرلەرىنەن كەلگەن عالىمدار قىزىعۋشىلىق تانىتتى.
«Əرينە ءبىزدىڭ م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىندە دە «رۋحاني جاڭعىرۋ» باعدارلاماسى اياسىندا ءبىرشاما شارۋالار اتقارىلىپ جاتىر. بىراق س.امانجولوۆ اتىنداعى شقمۋ بۇل جاعىنان وزىپ, كوش باسىندا تۇر ەكەن. شىنىندا دا بۇل – بىزگە ۇلگى بولارلىقتاي ءىس. سانانىڭ, قوعامنىڭ جاڭعىرۋى وسىنداي ىستەردەن باستاۋ الادى», دەيدى م.قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ پروفەسسورى جانار تالاسپاەۆا.
«رۋحاني جاڭعىرۋ» ايماقتىق جوبالىق كەڭسەسىنىڭ وكىلى ولگا شابالينانىڭ ايتۋىنشا, شىعىس قازاقستاندا «تۋعان جەر» ارنايى جوباسىنا 20 ملرد تەڭگەدەن استام قاراجات تارتىلىپ, شاعىن جانە ورتا بيزنەس وكىلدەرىنىڭ قولداۋىمەن 929 جوبا جۇزەگە اسىرىلىپتى. بۇل رەتتە وڭىردەگى 476 مەكتەپتىڭ سىنىپ بولمەلەرىن نازارباەۆ زياتكەرلىك مەكتەبىنىڭ ستاندارتى بويىنشا زاماناۋي قۇرال-جابدىقتارمەن قامتاماسىز ەتۋدى مۇرات تۇتقان «مەنىڭ مەكتەبىم» جوباسىن اتاۋعا بولادى. بىلتىرعى قازان ايىندا وسكەمەندە وتكەن «تۋعان جەر» فورۋمىندا ايماق كاسىپكەرلەرى وسى ماقساتقا 2,3 ملرد تەڭگە كولەمىندە قاراجات ءبولۋدى جوسپارلاپ وتىرعانى ايتىلعان-دى. قازىرگى ۋاقىتتا وبلىستا ارحەولوگيالىق قازبا جۇمىستارىنا دا ايرىقشا كوڭىل ءبولىنىپ, كونە قورىمدار جان-جاقتى زەرتتەلىپ جاتقانى ءمالىم.
ەلورداداعى كورمە كەزىندە «قاسيەتتى قازاقستان» عىلىمي-زەرتتەۋ ورتالىعىنىڭ جەتەكشىسى بەرىك ابدىعالي «رۋحاني جاڭعىرۋ» باعدارلاماسى اياسىنداعى جوبالاردى قارجىلاندىرۋ بويىنشا وزگە ايماقتارعا قاراعاندا, شىعىس قازاقستان وبلىسى كوش باسىندا تۇرعانىن, وڭىردە ارحەولوگيالىق قازبا جۇمىستارىنا ەرەكشە ءمان بەرىلىپ, قوڭىر اۋليە ۇڭگىرى, ىرعىزباي دوسحانا ۇلى مازارى, بەرەل, شىلىكتى سەكىلدى كيەلى ورىندار مەن حالىق ءجيى باراتىن باسقا دا تۋريستىك نىساندارعا اپاراتىن جولداردىڭ جوندەلىپ جاتقانىن ايتقان بولاتىن.
كيەلى ورىندار دەمەكشى, وبلىستىق تۋريزم جانە سىرتقى بايلانىستار باسقارماسىنىڭ باسشىسى جاسۇلان سارسەباەۆتىڭ ايتۋىنشا, «قازاقستاننىڭ كيەلى جەرلەرىنىڭ گەوگرافياسى» ارنايى جوباسى اياسىندا وبلىستا ءۇش ۇلكەن جوبا ىسكە اسىرىلىپ جاتقان كورىنەدى. بيىل بالالارعا ارنالىپ ايماقتاعى كيەلى ورىندار تۋرالى «شىعىس قازاقستان ەرتەگىلەرى مەن اڭىزدارى» اتتى كىتاپ جارىق كورىپ, قاسيەتتى مەكەندەردىڭ تۋريستىك مارشرۋتتارى ازىرلەنىپتى.
«وڭىرىمىزدەگى كيەلى ورىنداردىڭ ءبىرازى قالادان شالعاي جەردە ورىن تەپكەن. كەيبىرىندە تۋريستەرگە ءتۇسىندىرىپ بەرەتىن گيد تە جوق. مىنە, وسىنداي تۋريستەردىڭ توبىنا ارناپ قازىرگى كۇنى ءبىز اۋديوگيد ازىرلەپ جاتىرمىز. ولار اۋديوگيدتىڭ كومەگىنە جۇگىنىپ, وزدەرى بارعان كيەلى جەر تۋرالى اقپارات الا الادى. ونىڭ ءبارى تەگىن. تەك ينتەرنەتتىڭ كومەگىمەن ءبىزدىڭ toureast. kz سايتىنان اۋديوگيدتى تەلەفوندارىنا جازىپ السا بولعانى», دەيدى باسقارما باسشىسى.
ازامات قاسىم,
«ەگەمەن قازاقستان»
شىعىس قازاقستان وبلىسى
سۋرەتتى تۇسىرگەن تىلەۋبەك شاياحمەت
