سونىڭ ىشىندە پارتياعا جۇكتەلگەن مىندەتتەردىڭ ءبىرى – ەلدى جاڭعىرتۋ جولىنداعى ماڭىزدى باستامالاردىڭ, مەملەكەتتىك باعدارلامالاردىڭ ساپالى ىسكە اسىرىلۋىنا باقىلاۋدى, وسى باعىتتا پارتيانىڭ بەلسەندىلىگىن كۇشەيتۋ. پاۆلودار وبلىسىنا كەلگەن پارتيا توراعاسىنىڭ ءبىرىنشى ورىنباسارى ماۋلەن اشىمباەۆ وڭىردە اتقارىلىپ جاتقان جۇمىستاردىڭ باعىت-باعدارىمەن تانىستى.
ساپار بارىسىندا ماۋلەن اشىمباەۆ الدىمەن اليۋميني وندىرەتىن «قازاقستان ەلەكتروليز زاۋىتى» اكتسيونەرلىك قوعامىندا بولدى. 2010 جىلدىڭ ماۋسىم ايىندا ەلباسى كاسىپورىننىڭ ەكىنشى كەزەڭىن ىسكە قوسقانى بەلگىلى. بۇل كۇندەرى زاۋىت تولىق جوبالىق قۋاتتىلىعى بويىنشا جۇمىس جاساۋدا. سول كۇننەن باستاپ كاسىپورىن جىلىنا 250 مىڭ توننا اليۋميني وندىرۋدە.
ءوندىرىستىڭ ەڭبەك ۇجىمىمەن كەزدەسكەن م.اشىمباەۆ «پرەزيدەنتتىڭ بەس الەۋمەتتىك باستاماسىنىڭ» ءمانى مەن ماڭىزىنا كەڭىنەن توقتالىپ, جۇمىسشىلاردىڭ ءوتىنىش-تىلەكتەرىن تىڭدادى.
جالپى, «نۇر وتان» پارتياسى قازاقستاندىقتاردىڭ ەڭبەك قۇقىعىن قورعاۋعا ايرىقشا كوڭىل ءبولىپ كەلەدى. وسىعان بايلانىستى پارتيا ەلىمىزدىڭ كاسىپوداقتار فەدەراتسياسىمەن ءوزارا ىنتىماقتاستىق تۋرالى مەموراندۋم جاساسۋ ءجونىندە كەلىسىمگە كەلدى. بۇل قۇجاتقا «نۇر وتان» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆ پەن كاسىپوداقتار فەدەراتسياسىنىڭ توراعاسى باقىتجان ءابدىرايىم قول قويدى. ناتيجەسىندە تاراپتار قازاقستاندىقتاردىڭ مۇددەسى مەن ەڭبەك جانە الەۋمەتتىك-ەكونوميكالىق قۇقىقتارىن قورعاۋ ماقساتىندا پارتيالىق جانە قوعامدىق باقىلاۋدى ۇيىمداستىرۋ جونىندە ءوزارا كەلىسىمگە كەلدى. الداعى ۋاقىتتا اتالعان ەكى قوعامدىق ينستيتۋت مەملەكەتتىك ورگاندارمەن بىرلەسىپ الدىن الۋ جۇمىستارىن ودان ءارى جەتىلدىرۋدى, ەڭبەك داۋ-دامايلارى مەن الەۋمەتتىك باعىتتاعى توتەنشە جاعدايلاردى شۇعىل شەشۋدى, بۇل جۇمىستارعا بىلىكتى ساراپشىلار مەن تاجىريبەلى مامانداردى جۇمىلدىرۋدى جانە ەڭبەك ۇجىمدارىنداعى باستاۋىش پارتيا جانە كاسىپوداق ۇيىمدارىنىڭ ءرولىن كۇشەيتۋ جونىندە ۇسىنىستار دايىنداۋدى جوسپارلاپ وتىر.
بۇگىندە پارتيا توراعاسىنىڭ تاپسىرماسى بويىنشا «نۇر وتان» پارتياسى ءوز قىزمەتىن جاڭعىرتۋ جۇمىستارىن جۇرگىزۋدە. قازىرگى كۇندەرى حالىقتى الاڭداتقان ءماسەلەلەردى ناقتى شەشۋ ماقساتىندا 22 جاڭا پارتيالىق جوبا دايىندالۋدا. سونىڭ اياسىندا پاۆلودار وبلىسىندا دا جاڭا قاناتقاقتى جوبالار باستالدى. ياعني «نۇر وتان» مەن جەرگىلىكتى مەملەكەتتىك ورگاندار, وڭىرلىك كاسىپكەرلەر پالاتاسى جانە بيزنەس قاۋىمداستىق اراسىندا بىرقاتار مەموراندۋمعا قول قويىلدى. بۇل جوبالاردى جۇزەگە اسىرۋ ارقىلى بالالارعا ارنالعان تەگىن IT سىنىپتار اشۋعا, ارنايى IT مامانداردى دايارلاپ, حالىقتىڭ تسيفرلى ساۋاتتىلىعىن ارتتىرۋعا, وڭىرلىك كىتاپحانالار جۇيەسىن ترانسفورماتسيالاۋعا جانە كىتاپحانالاردى قازىرگى زامانعى ءبىلىم ورتالىعى رەتىندە قايتا قۇرۋعا جول اشىلادى.
– جاڭا جوبالار پارتيا جۇمىسىنىڭ تيىمدىلىگىن ودان ءارى ارتتىرۋعا باعىتتالعان. ءبىزدىڭ ءاربىر باستامامىز بەن ۇيىمداستىرعان ءىس-شارالارىمىز ناقتى ناتيجە بەرىپ, حالىققا ءوز پايداسىن تيگىزۋى كەرەك. كوزدەگەن ماقساتىمىزعا قول جەتكىزۋ ءۇشىن ءبىز ۇكىمەتتىك ەمەس ۇيىمدارمەن, بيزنەس قاۋىمداستىقپەن جانە مەملەكەتتىك ورگاندارمەن تىعىز بايلانىستا جۇمىس ىستەيمىز, – دەدى ماۋلەن اشىمباەۆ.
پارتيا توراعاسىنىڭ ءبىرىنشى ورىنباسارىنىڭ ايتۋىنشا, ەلىمىزدە 1000 ءىت-سىنىپ اشىلماق. ونى ءۇش جىلدىڭ ىشىندە جۇزەگە اسىرۋ جوسپارلانعان. ءار جىلدا تەگىن كۋرستار ارقىلى 150 مىڭ بالا جانە 35 مىڭ ەرەسەك ادام باعدارلامالاۋ نەگىزدەرىن ۇيرەنەدى. سونىمەن قاتار ساپار بارىسىندا ماۋلەن اشىمباەۆ وبلىستىڭ بەلسەندى جاستارىمەن جانە «جاس وتان» جاستار قاناتىنىڭ IV سەزىنە قاتىسقان دەلەگاتتارمەن كەزدەستى. وبلىس ورتالىعىنداعى IT ورتالىق پەن «جاستار باستامالارىن دامىتۋ» ورتالىعىنىڭ جۇمىسىمەن تانىستى. بۇل ورتالىقتاردا جاستار ءموبيلدى قوسىمشا, ۆەب-سايت سياقتى IT-يندۋسترياعا قاتىستى جوبالارىن ۇسىنىپ, ونى جۇزەگە اسىرۋعا مۇمكىندىك الادى. سونداي-اق ورتالىققا كەلۋشىلەر ءار سالادا جاڭا اقپاراتتىق تەحنولوگيالار مەن باعدارلامالار دايىنداپ, ولاردى قولدانىسقا ەنگىزۋ ماقساتىندا جۇمىس ىستەيدى.
ال «جاستار باستامالارىن دامىتۋ» ورتالىعىندا ورنالاسقان IT ورتالىق ەلىمىزدە العاش بولىپ جاستارعا «ءبىر تەرەزە» قاعيداسى بويىنشا قىزمەت كورسەتۋدە. وندا جاستارعا جۇمىسقا ورنالاسۋ, مەملەكەتتىك باعدارلامالار ارقىلى باسپانالى بولۋ, جاستار اراسىندا كاسىپكەرلىكتى دامىتۋ, زاڭدىق جانە پسيحولوگيالىق قولداۋ كورسەتۋ جانە كاسىبي باعدارلاۋ جۇمىسى سياقتى قىزمەتتەر كورسەتىلەدى.
وڭىردە تسيفرلاندىرۋ باعىتىندا بىرقاتار جۇمىستار جۇرگىزىلۋدە. ماسەلەن, وبلىس ورتالىعىنداعى جاڭادان اشىلعان №37 ورتا مەكتەپتە تسيفرلى تەحنولوگيالار مەكتەپتىڭ كۇندەلىكتى تىنىس-ءتىرشىلىگىنە ەنگەن. وقۋشىلار مەكتەپكە ارنايى كارتا نەمەسە ساۋساق تاڭباسى ارقىلى كىرىپ-شىعادى. اتا-انالارعا ارنايى حابارلاما جولدانادى. بۇل اتا-انالاردىڭ بالالارىن باقىلاپ وتىرۋىنا مۇمكىندىك بەرىپ وتىر. مەكتەپكە ارنايى كەلگەن ماۋلەن اشىمباەۆ مۇعالىمدەرمەن جانە وقۋشىلارمەن كەزدەسىپ, زاماناۋي ءبىلىم بەرۋ جۇيەسىن دامىتۋ جايىندا پىكىر الماستى.
سونداي-اق «نۇر وتان» پارتياسى توراعاسىنىڭ ءبىرىنشى ورىنباسارى قارتتار مەن مۇمكىندىگى شەكتەۋلى جاندارعا ارنايى الەۋمەتتىك قىزمەت كورسەتەتىن «ارداگەرلەر ءۇيى» وڭالتۋ ورتالىعىندا بولدى.
فاريدا بىقاي,
«ەگەمەن قازاقستان»
پاۆلودار وبلىسى
سۋرەتتى تۇسىرگەن ۆالەري بۋگاەۆ
