سۋرەتتى تۇسىرگەن ەرلان ومار, «ەگەمەن قازاقستان»
«100 جاڭا وقۋلىق» قازاق جاستارىن كەمەل بىلىمگە جەتەلەۋمەن قاتار, دۇنيە جۇزىنە ايگىلى عالىمدارعا قازاقستان دەگەن عاجايىپ الەمدى اشتى. ءبىز اۋدارعان كىتاپتىڭ اۆتورى رەمي حەسس قازاقشا وقۋلىقتىڭ العىسوزىن ءوزى جازىپ بەردى. سول سوزىندە بىلاي دەيدى: «وزگە مادەنيەتكە بويلاپ, ونى انا تىلىڭدە سويلەتۋ – ەرەكشە كۇردەلى پروتسەسس. وسىعان دەيىن مەنىڭ ەڭبەكتەرىم 12 تىلگە اۋدارىلدى. مەن ءۇشىن ەندى قازاق ءتىلى تاعى ءبىر جاڭا مادەنيەتكە جول اشقان قاقپاعا اينالىپ وتىر».
استانادا وتكەن ارنايى كونفەرەنتسياعا العاشقى 18 كىتاپتىڭ اۆتورلارىنىڭ ءبىرى رەتىندە رەمي حەسس تە كەلىپ قاتىستى. ءبىز ءوزىمىز اۋدارعان كىتاپتىڭ اۆتورىمەن سۇحباتتاسىپ, وي بولىسۋگە مۇمكىندىك الساق, فرانتسۋز عالىمى قازاقستاندى كورىپ, اڭ-تاڭ بولدى. ونى ەلىنە بارعاننان كەيىن بىزگە جازعان حاتىندا اشىپ ايتتى. استانانىڭ بۇگىنگى تاماشا كەلبەتى, جاس عالىمداردىڭ ونىڭ كىتابىن قازاق تىلىنە تىكەلەي اۋدارىپ جاتقانى, جالپى قازاق جاستارىنىڭ ءبىلىمى مەن ءبىزدىڭ ەلدە ءجۇرىپ جاتقان رۋحاني جاڭعىرۋ فرانتسۋز ارىپتەسىمىزدى ەرەكشە تاڭعالدىردى. ونىڭ ءبىزدىڭ ەلگە ءسۇيسىنىپ, ءتانتى بولعانى سونشالىق, قازاقستاننىڭ زاماناۋي مادەنيەتى مەن ۇلى اباي حاقىندا كىتاپ جازۋعا بەل بۋدى. ەلباسىنىڭ باستاماسىمەن قازاق جازۋى لاتىن الىپبيىنە كوشىپ جاتقانىن دا ەستىپ, شىنايى تىلەكتەستىگىن ءبىلدىردى. ءوزىنىڭ قازاق تىلىندە جارىق كورەتىن كىتابىن وقۋ ارقىلى قازاق ءتىلىن دە ۇيرەنەتىنىن ايتتى.
مەن تالدىقورعانداعى جەتىسۋ مەملەكەتتىك ۋنيۆەرسيتەتىندە جۇمىس ىستەيمىن. ءبىزدىڭ ۋنيۆەرسيتەت «رۋحاني جاڭعىرۋ» باعدارلاماسىنىڭ جەتىسۋداعى عىلىمي-ساراپتامالىق ورتالىعىنا اينالدى. «رۋحاني جاڭعىرۋدى» جاستار وتە جىلى قابىلدادى. ەلباسىنىڭ ماقالاسى شىققاننان كەيىن, ستۋدەنتتەرگە تانىستىرۋ ماقساتىندا دارىستەر وقىدىق. ادەتتە ءبىر ساعاتتىق لەكتسيادا ارەڭ وتىراتىن الدىمداعى مىڭداعان ستۋدەنتتەر, قايتقىلارى كەلمەي, ساعاتتار بويى تالدادىق. مەنىڭ بۇل جەردەگى ايتپاعىم, رۋحاني جاڭعىرۋداعى قادامدار, قۇندىلىقتار, يدەيالار بۇگىنگى جاستاردىڭ شىنايى سۇرانىسىمەن ۇشتاسىپ, ولارعا رۋحاني سەرپىلىس اكەلدى, كۇش-قۋات بەرىپ, جىگەرلەندىردى.
الەمنىڭ ەڭ ۇزدىك ءجۇز وقۋلىعىن اۋدارۋعا قاتىسۋ – مەن ءۇشىن ۇلكەن جاۋاپكەرشىلىك, زور مارتەبە جانە تەڭدەسسىز مەكتەپ. مەن انا تىلىمنەن وزگە, اعىلشىن, فرانتسۋز, تۇرىك جانە ورىس تىلدەرىندە ەركىن سويلەيمىن. جوبانىڭ اياسىندا كىتاپتاردى اعىلشىن تىلىنەن دە اۋدارۋعا قاتىستىم. جۇمىس بارىسىندا قانشاما تاجىريبە جينادىق, اۋدارما جۇمىسىنىڭ كۇردەلىلىگى, تەحنيكاسى, تۇيتكىلدى تۇستارى, اۆتوردىڭ ويىن بۇزباي, مەيلىنشە انىق جەتكىزۋگە ۇمتىلۋ, ءتىلدىڭ جاتىقتىعى, وسىنىڭ ءبارى جاڭا ايتقانىمداي بىزگە كەرەمەت مەكتەپ بولدى. سونىڭ ارقاسىندا كاسىبي اۋدارماشىلاردىڭ تۇتاس جاڭا بۋىنى قالىپتاساتىنىنا شەكسىز قۋانىشتىمىن!
ايىمجان ابۋقىزى,
ءى.جانسۇگىروۆ اتىنداعى جەتىسۋ مەملەكەتتىك ۋنيۆەرسيتەتىنىڭ
شەت تىلدەرى مەن اۋدارما كافەدراسىنىڭ مەڭگەرۋشىسى
