فيليال نۇسقاۋشىسى باقىت الدابەرگەنوۆانىڭ ايتۋىنشا, بالا ءۇشىن مەنتالدى اريفمەتيكانىڭ پايداسى وتە زور. تەز ەسەپتەۋگە ۇيرەتەدى, ەستە ساقتاۋ قابىلەتىن دامىتادى. ميدى شىنىقتىرىپ, جۇمىس ىستەۋ بەلسەندىلىگىن ارتتىرادى. ويشا ساناۋدىڭ ارتىقشىلىقتارىن سەزىنگەن اتا-انالار ۇل-قىزدارىنىڭ مەنتالدى اريفمەتيكانىڭ قىر-سىرلارىن ۇيرەنۋىنە مۇددەلى.
باقىتتىڭ شاكىرتتەرى ەكى جىلدىڭ ىشىندە ءۇش, ءتورت تاڭبالى سانداردى اۋىزشا ەسەپتەۋدە ۇزدىك ناتيجەلەر كورسەتىپ, توپ جارىپ ءجۇر. بىلتىر الماتىدا وتكەن حالىقارالىق وليمپياداعا 10 ۇمىتكەر قاتىسىپ, 6-ۋى ءبىرىنشى, 2-ءۋى ەكىنشى, 1-ءۋى ءۇشىنشى ورىندى يەلەندى. جۋىردا وڭتۇستىك استانادا ۇيىمداستىرىلعان مارتەبەلى جارىسقا 13 ورەندى ۇكىلەپ قوسقان بولاتىن. ولاردىڭ اراسىندا ەسلامبەك جانىبەك پەن سۇلتان سانسىزباي ءبىرىنشى, 6 وقۋشى ەكىنشى, 4 وقۋشى ءۇشىنشى ورىننان كورىندى. ال راحمان تۇرسىنقۇلوۆ جازدا بىرىككەن اراب امىرلىكتەرىنىڭ دۋباي قالاسىندا وتەتىن الەمدىك وليمپياداعا جولداما جەڭىپ الدى.
قازاقستان, قىرعىزستان, رەسەي, بەلارۋس, وزبەكستان مەملەكەتتەرىنەن 5-تەن 16 جاسقا دەيىنگى ءبىر مىڭنان استام بالا كەلىپ, ءوز بىلىمدەرىن ساراپقا سالدى. وقۋشىلارىمىز وبلىس نامىسىن ءوز دەڭگەيىندە قورعاپ شىقتى, دەدى سويلەسكەنىمىزدە باقىت ەرىكقىزى. ول بۇل ادىستەمەنى بالالارعا ءتورت جاستان باستاپ قولدانۋعا بولاتىنىن, مەنتالدى اريفمەتيكانىڭ قىر-سىرلارىن ساباقتان تىس كەزدەردە مەڭگەرەتىنىن, مۇنىڭ ءوزى ءبىر جاعىنان, بوس ۋاقىتتارىندا پايدالى ىستەرمەن اينالىسۋعا مۇمكىندىك بەرەتىنىن جەتكىزدى. قازىر مەكتەپكە كەلۋشىلەر ون دەڭگەيلى اۋىزشا ەسەپتەۋدىڭ ءۇشىنشى كەزەڭىنە جاتتىعىپ ءجۇر.
ءومىر ەسقالي,
«ەگەمەن قازاقستان»
سولتۇستىك قازاقستان وبلىسى,
قىزىلجار اۋدانى
