كەزدەسۋ «بىلىمدىمەن دوس بولساڭ...» تاقىرىبىندا Q4 Business School كاسىپكەرلەرلىك مەكتەبىنىڭ ۇيىمداستىرۋىمەن كاسىپكەرلەردى دايىندايتىن «تۇعىر» كۋرسى اياسىندا ءوتتى. جينالعان جاستار جانە ستۋدەنتتەر قاۋىمى الدىندا ءسوز سويلەگەن ارداق نازاروۆ اتا-بابالارىمىزدىڭ دانالىعى مەن دانىشپاندىعى, باتىرلىعى مەن قازاقتىڭ ادەت-عۇرپى مەن سالت-ءداستۇرى, يماندىلىق پەن يناباتتىلىق, ءبىلىم مەن عىلىم, ونەر مەن مادەنيەت, سپورت پەن سالاۋاتتى ءومىر سالتى, ادامزات قۇندىلىقتارى جانە تاعى باسقا وزەكتى ماسەلەلەر توڭىرەگىندە تارتىمدى اڭگىمەنىڭ تيەگىن اعىتتى. قازىرگى جاستاردىڭ كەلبەتى مەن بولمىسى, ورەسى مەن پاراساتى جانە وسكەلەڭ ۇرپاق كىمدەرگە قاراپ بوي تۇزەۋ قاجەتتىگى جايىندا ويعا قونىمدى پىكىرلەر ايتىلدى. بيزنەس توڭىرەگىندە دە ءبىراز اڭگىمە بولدى.
سونداي-اق بۇل جيىنعا Qazaq Spınners جوباسىنىڭ ينۆەستورى, «انار-فارم» ءدارىحاناسى مەن «اراي» كولىك جۋ جەلىلەرىنىڭ باسشىسى تالعات ساقان, «بولاشاق» باعدارلاماسىنىڭ تۇلەگى, Qazaq Spinners يدەياسىنىڭ اۆتورى, جوبانىڭ كرەاتيۆتى مەنەدجەرى دوسان قاۋمەن, ديدجيتال ماركەتينگپەن اينالىساتىن Tuyndy Media Group, Qbrands.kz ۇلتتىق ناقىشتاعى كۇندەلىكتى كيىپ جۇرۋگە ارنالعان ەرلەر جەيدەسى برەندىنىڭ شىعارۋشى ءارى باسشىسى يسمايل قۇلان, Q4 Business School مەنتورى, ءماسليحات دەپۋتاتى, THS GROUP كومپانياسىنىڭ نەگىزىن قالاۋشى, «اتامەكەن» ۇلتتىق كاسىپكەرلەر پالاتاسىنىڭ مۇشەسى قايرات قۇدايبەرگەن قاتىسىپ, كوپشىلىكتى تولعاندىرعان ساۋالدارعا جاۋاپ بەردى.
ەستەرىڭىزگە سالا كەتەيىك, Q4 Business School 2017 جىلدىڭ قازان ايىندا قۇرىلعان بولاتىن. ماقساتى – تاۋەلسىز ەلدە ەركىن ويلاپ, كاسىبىن ەركىن باسقاراتىن, بيزنەسىن وڭاي جۇيەلەيتىن الەمدىك دەڭگەيدەگى باسەكەگە قابىلەتتى كاسىپكەرلەر مەن كاسىبي مامانداردىڭ قارىمدى بۋىنىن قالىپتاستىرۋ. بۇگىندە بيزنەس مەكتەبىنىڭ 4 اعىم ستۋدەنتتەرى ارنايى كۋرستاردى ءبىتىردى. قازىرگى تاڭدا سول تۇلەكتەر ءارتۇرلى سالادا وزدەرىنىڭ قارىم-قابىلەتتەرىن كورسەتىپ, جەكە بيزنەستەرىمەن اينالىسىپ ءجۇر.
عالىم سۇلەيمەن,
«ەگەمەن قازاقستان»
الماتى
