ۆاحيد ءحاليلحودجيچتىڭ قىزمەتىنەن كەتەتىنىن جاپونيا فۋتبول اسسوتسياتسياسىنىڭ پرەزيدەنتى كودزو تاسيمۋ مالىمدەدى. تاسيمۋدىڭ ايتۋىنشا, بوسنيالىق ماماننىڭ قۇرامادان كەتۋىنە بيىلعى جولداستىق كەزدەسۋلەردە قۇرامانىڭ سۇرەڭسىز ويىن كورسەتۋى سەبەپ بولعان. سونداي-اق قۇراما فۋتبولشىلارى ونىڭ ويىن تارتىبىنە وزدەرىنىڭ نارازى ەكەندىگىن بىلدىرگەن.
ەندى جاپونيا قۇراماسىنىڭ جاڭا باپكەرىنە ەكى ايدىڭ ىشىندە فۋتبولشىلاردى الەم چەمپيوناتىنا دايىنداۋعا تۋرا كەلەدى. حاليلحودجيچ جاپونيا قۇراماسىن 2015 جىلدان بەرى جاتتىقتىرىپ, ەلدىڭ باس كومانداسىن الەم چەمپيوناتىنا شىعارعان ەدى.
ەريسلاندي بەلدىكتەرىنەن ايرىلدى
جەكسەنبى كۇنى كاسىپقوي بوكستىڭ ورتا سالماق دارەجەسىندەگى (69,9 كگ) WBA جانە IBO بەلبەۋى بويىنشا الەم چەمپيونى كۋبالىق اتاقتى بوكسشى ەريسلاندي لارا IBF بەلدىگىنىڭ يەگەرى امەريكالىق دجاررەتت حەردتەن جەڭىلىپ, ەكى بەلدىگىنەن دە ايىرىلىپ قالدى.
جەكپە-جەك باسى ەريسلاندي باسىمدىعىمەن وتكەن-ءدى. ونىڭ دجەب جانە سول قولىنىڭ سوققىسى قارسىلاسىنا نىق ءتيىپ جاتتى. ءتىپتى كەزدەسۋدىڭ 6-راۋندىندا لارانىڭ يەكتىڭ استىنان جاساعان سوققىسى قارسىلاسىن ەسەڭگىرەتىپ تاستاعانداي بولدى. دەگەنمەن حەرد تەز ەس جيىپ ۇلگەردى. ايقاستىڭ ەكىنشى بولىگى امەريكالىق بوكسشىنىڭ باسىمدىعىمەن ءوتتى. سوڭعى 12-راۋندتا دجاررەتت حەرد كۋبالىق بوكسشىنى ءبىر رەت نوكداۋنعا جىبەردى.
12-راۋندقا سوزىلعان جەكپە-جەكتە تورەشىلەردىڭ شەشىمى ەكىگە ءبولىندى. ءبىر تورەشى 114-113 ۇپايمەن جەڭىستى لاراعا بەرسە, ەكى تورەشى ءدال سونداي ەسەپپەن حەرد جەڭىسكە جەتتى دەپ ەسەپتەگەن. ءسويتىپ دجاررەتت حەرد IBF بەلدىگىنە WBA جانە IBO بەلبەۋىن قوسىپ الدى.
جەڭىس تۇعىرىندا – كىلەڭ افريكالىقتار
وتكەن دەمالىس كۇندەرى ەۋروپانىڭ بىرنەشە قالالارىندا مارافون جارىسى ءوتتى. كوپشىلىك جانكۇيەردىڭ نازارى ميلاندا وتكەن جۇگىرۋگە اۋعانى بەلگىلى. ويتكەنى الەمنىڭ ەڭ مىقتى مارافونشىلارى يتاليادا سايىسقا ءتۇستى.
ءبىر قىزىعى, مارافون جارىسىنىڭ جۇلدەلى ءۇش ورنىن دا افريكالىق جەلاياقتار يەلەندى. ەرلەر اراسىنداعى سايىستا جارىس جولىن ەكى ساعات توعىز مينۋتتا جۇگىرىپ وتكەن ەفيوپيالىق سەەفۋ تۋران جەڭىمپاز اتاندى. ەكىنشى ورىندى كەنيالىق يۋستاس كيمۋتاي كيپكوسگەي يەلەندى. ول جەڭىمپازدان ءبىر مينۋتقا ارتتا قالىپ قويدى. ءۇشىنشى ورىن تاعى ءبىر كەنيالىق بارناباس كيپتۋمعا بۇيىردى. ونىڭ ناتيجەسى – 2:10.17.
ال قىزدار اراسىنداعى مارافوندا دا العاشقى ءۇش ورىندى كەنيالىق سپورتشىلار جەڭىپ الدى.
دايىنداعان
ءالي بيتورە,
«ەگەمەن قازاقستان»
