ءتورتىنشى ويىندا مارين چيليچ پەن ميحايل كۋكۋشكين شىققان بولاتىن. الەمنىڭ ءۇشىنشى راكەتكاسى چيليچ وتانداسىمىزعا ەشقانداي مۇمكىندىك قالدىرمادى. ەسەپ 3:0. جالپى ەسەپ 3:1 حورۆاتتاردىڭ پايداسىنا. ەندى جارتىلاي فينالدا حورۆاتيا قۇراماسى اقش ۇجىمىمەن كەزدەسەدى.
ماتچتان كەيىن كۋكۋشكين مەن چيليچ جۋرنالستەرگە سۇحبات بەرىپ, ويىن تۋرالى پىكىرىن ايتتى.
– چيليچ الەمنىڭ ءۇشىنشى راكەتكاسى. ونىڭ جوعارى دەڭگەيدەگى تەننيسشى ەكەنىن ءبارىڭىز بىلەسىزدەر. بويى دا, تەحنيكاسى دا مەنەن جوعارى. الايدا بۇل ماتچتا مەنىڭ جالعىز عانا باسىمدىعىم بولدى. كورتتىڭ ارتقى جاعىنان سوققىلار جاساپ, ءچيليچتى ارلى-بەرى قيمىلداپ ويناۋعا ماجبۇرلەدىم. دوپتاردى بىردە سولعا, بىردە وڭعا, كەرەك كەزىندە قىسقارتىپ تا تاستاپ وتىردىم. بىراق مارين سونىڭ بارلىعىنا جەتىپ ۇلگەرىپ وتىردى, – دەيدى ميحايل كۋكۋشكين.
– ەكى بىردەي قازاقستاندىق تەننيسشىمەن كەزدەستىم. پوپكومەن بولعان ماتچتا كوپ گەيم بەردىم. بىراق بۇگىنگى ويىن مەن ءۇشىن ماڭىزدى ءارى اۋىر ءوتتى. كۋكۋشكين وتە شەبەر تەننيسشى. ول كەز كەلگەن ساتتە قاتەلىگىڭدى پايدالانىپ كەتەدى. ەگەر كەشە جۇپتاسۋ كەزىندە جەڭىلىپ قالعانىمىزدا بۇگىن مەن بۇلايشا ەركىنسىپ جۇرە الماس پا ەدىم؟ چوريچپەن وتكەن ويىندا ميحايل قاتتى شارشاپ قالىپتى. بورنا ونىڭ ءبىراز كۇشىن سارقىدى», دەدى مارين چيليچ.
سونداي-اق قازاقستان قۇراماسىنىڭ كاپيتانى دياس دوسقاراەۆ تا ويىن تۋرالى ءوز پىكىرىن ءبىلدىردى. ء«چيليچتىڭ مىقتى ەكەنىن بىلەمىز. بىراق ول بۇگىن ەمىن-ەركىن وينادى. سەبەبى تەكەتىرەستەگى جالپى ەسەپ 2:1 حورۆاتيانىڭ پايداسىنا ەدى. ەش قورىقپاي, اسپاي-ساسپاي ونەر كورسەتتى. ال ەگەر كەشە جۇپتاسۋدا جەڭگەنىمىزدە بۇگىن مۇلدە باسقاشا وينار ەدىك. چيليچ قوبالجىپ, قينالىپ شىعار ەدى. ءتىپتى ول جەڭگەن كۇننىڭ وزىندە ءبىز سوڭعى ويىنعا كۇش سالۋشى ەدىك. پوپكونىڭ ورنىنا نەدوۆەسوۆتى قوياتىن با ەدىك, كىم ءبىلسىن. ەندى وسى جۇپتىق كوماندامىزدى رەتتەۋىمىز كەرەك. الدا ازيا ويىندارى وتەدى, سوعان دايىندالامىز.
ەرمۇحامەد ماۋلەن,
«ەگەمەن قازاقستان» – ۆاراجديننەن (حورۆاتيا)
