بۇگىنگى ءبىزدىڭ كەيىپكەرىمىز – يسپانيا فۋتبول قۇراماسىنىڭ جانە «چەلسي» كلۋبىنىڭ شابۋىلشىسى پەدرو رودريگەس ەشقاشان جارقىراپ كوزگە تۇسكەن ەمەس. قىلىشىن ءدوپ سەرمەيتىن سامۋرايلار سەكىلدى ءدال ۋاقىتىندا جوق جەردەن شىعا كەلەدى. سوسىن بۇلت قالقالاعان كۇن ءتارىزدى اتاقتى ارىپتەستەرىنىڭ تاساسىنا قايتا ەنىپ كەتەدى. ونىڭ ومىرىنە كوز جۇگىرتە وتىرىپ, تالاي قىزىقتىڭ كۋاسى بولعانىن, بيىك شىڭدى باعىندىرۋ ءۇشىن قاجىرلى ەڭبەكتىڭ قاجەت ەكەنىن تۇسىنەسىز.
اتاقتى سامۋراي ياماموتو تسۋنەتومو: «دىتتەگەن ماقساتىنان اداسپاس ءۇشىن ادام العان باعىتتان تايماۋى كەرەك, ءوزىن ءاردايىم جەتىلدىرىپ, ەشتەڭەنى نازاردان تىس قالدىرماعانى ءجون. مىنە, بۇل – ناعىز ماقسات!» دەپ ايتقان ەكەن. پەدرو وسى باعىتتى بەرىك ۇستانعان. ول جەتىستىككە جەتۋ ءۇشىن 1 پايىز تالانت پەن 99 پايىز ەڭبەكتىڭ قاجەت ەكەنىن ءجىتى تۇسىنگەن سايىپقىران. مەسسي, رونالدۋ سەكىلدى فۋتبول «جۇلدىزدارى» تۇرعاندا ەشكىمنىڭ پەدروعا «التىن ءتاج» كيگىزبەيتىنى بەسەنەدەن بەلگىلى. ءتىپتى ونىڭ بويىندا نەيماردىكىندەي تالانت تا جوق.
ءبىزدىڭ كەيىپكەر الا دوپتىڭ الىپپەسىن 1997 جىلى ءوزى تۋىپ-وسكەن كانار ارالدارىنداعى «سان-يسيدرو» كلۋبىنان ۇيرەندى. ۇيىنە جاقىن ورنالاسقان كلۋبتىڭ نەگىزگى قۇرامىندا الاڭعا شىعۋ ءۇشىن التى جىل كۇتۋىنە تۋرا كەلىپتى. كەلەر جىلى «دون پەدرونى» ۇلكەن سىناق كۇتىپ تۇرعان-دى. بىردە ليونەل مەسسيدى ارگەنتينادان تاۋىپ, ونىڭ «بارسەلوناعا» كەلۋىنە جاعداي جاساعان ايگىلى سكاۋت جوزەپ كولومەر كانار ارالىندا وتكەن جاسوسپىرىمدەر تۋرنيرىنە كەلەدى. ونىڭ كوزدەگەنى «تەنەريفتە» دوپ تەبەتىن جەففرەن سۋارەس بولاتىن. الايدا كولومەردىڭ قىراعى كوزى 17 جاستاعى پەدريتو ەسىمدى فۋتبولشىنى قالت جىبەرگەن جوق. كوپ ۇزاماي پەدرو «بارسەلونا» كلۋبىنان شاقىرتۋ الدى.
كاتالونيالىق كلۋبقا اۋىسا سالا كەيىپكەرىمىزدىڭ تاسى ورگە دومالادى دەۋگە كەلمەيدى. كلۋب اكادەمياسىنىڭ ءبىر ساتىسىنان ەكىنشىسىنە كوتەرىلۋ وڭايعا تۇسكەن جوق. ءتىپتى, باسقا كلۋبقا اۋىسىپ كەتۋى دە مۇمكىن ەدى. كاتالونيالىق كلۋبتىڭ قوسىمشا «بارسەلونا ب» كومانداسى 2006-2007 جىلعى ماۋسىمدا ءساتسىز ونەر كورسەتىپ, يسپانيانىڭ ءتورتىنشى دەڭگەيلى ليگاسىنا ءتۇسىپ قالادى. ال بۇل تۋرنيردە وينايتىن «بارسەلونا س» كومانداسى يسپانيا فۋتبول فەدەراتسياسىنىڭ ەرەجەسىنە ساي ايماقتىق ليگاعا اۋىسۋى ءتيىس. مۇنداي ماسەلەگە باس قاتىرعان كلۋب باسشىلارى ەكىنشى دەڭگەيلى قوسىمشا كلۋبتى تاراتىپ جىبەرەدى.
ول كەزدە «بارسەلونا س»-دا تەر توگىپ جۇرگەن پەدرو جيىرماعا جەتكەن جىگىت بولاتىن. فۋتبولشى ءۇشىن بۇل ماقتانارلىق ناتيجە ەمەس. سالىستىرىپ كورىڭىز, لەو مەسسي مەن رايان گيگگز سەكىلدى «جۇلدىزدار» 17 جاسىنان باستاپ جاسىل الاڭدا ويقاستاپ, الەمگە تانىلىپ ۇلگەرگەن-ءدى. ەندەشە, جيىرما جاستا ءۇشىنشى دەڭگەيلى ليگادا ويناعان جىگىتتىڭ فۋتبول ءوليمپىن باعىندىرام دەگەن ارمانى ورىندالمايتىنداي كورىنەدى. الايدا ءبىزدىڭ كەيىپكەرىمىز العا قويعان ماقساتتىڭ ەڭبەكپەن كەلەتىنىن ءتۇسىندى ءھام بۇكىل قيىندىققا توزە ءبىلدى.
«ساباقتى ينە ساتىمەن» دەمەكشى, وسىنداي اۋمالى-توكپەلى تۇستا پەدريتوعا جول سىلتەپ, اقىل-كەڭەس ايتقان ءبىر ادام بار. بىلىققا باتقان «بارسەلونا ب»-عا باپكەر بولعان حوسەپ گۆارديولا پەدرونىڭ كوماندا ءۇشىن قاجەت ەكەنىنە ونىڭ كوزىن جەتكىزدى. باپكەردىڭ سوزىنەن قانات العان «دون پەدرو» 2007-2008 جىلعى ماۋسىمدا ءساتتى ونەر كورسەتتى. وعان قوسا, گۆارديولا مەن شاكىرتتەرى سەگۋنداعا (يسپانيانىڭ ەكىنشى دەڭگەيلى ليگاسى) قايتىپ ورالدى. سول جىلعى ماۋسىمنىڭ سوڭىندا گۆارديولانىڭ نەگىزگى كوماندانى جاتتىقتىراتىنى ءمالىم بولعان. بۇل – پەدروعا بەرىلگەن قايتالانباس مۇمكىندىك ەدى. كانار ارالىنىڭ وكىلى ونى بارىنشا پايدالانا ءبىلدى...
پەدرونىڭ «بارسەلونانىڭ» نەگىزگى قۇرامىنداعى كارەراسى 2008 جىلدىڭ 12 قاڭتارىنان باستالدى. كاتالونيالىق كلۋب ءوز الاڭىندا «مۋرسيامەن» كەزدەسۋى ءتيىس ەدى. شابۋىلشىسى سانتياگو ەسكەررونىڭ اۋىرىپ قالۋىنا بايلانىستى كەزدەسۋگە شىعا الماعاندىقتان, ونىڭ ورنىنا پەدرو شاقىرتۋ الدى. ول كەزدە «بارسانى» داڭقتى فرانك رايكاارد جاتتىقتىراتىن. گوللانديالىق باپكەرگە پەدرو قوسالقى قۇرامدى تولتىرۋ ءۇشىن عانا كەرەك ەدى. سول ماتچتا ءبىزدىڭ كەيىپكەرىمىز الاڭعا ويىن اياقتالۋعا ءبىر مينۋت قالعاندا شىعىپ, ءدۇبىرلى دودانىڭ العاشقى ءدامىن تاتتى.
حوسەپ گۆارديولا ءۇشىن 2008-2009 جىلعى ماۋسىم تابىستى اياقتالعانى ءمالىم. كلۋب ءوزى قاتىسقان ءتۋرنيردىڭ بارىندە جەڭىسكە جەتىپ, التى كۋبوكتى يەلەنەدى. مۇنداي رەكورد بۇرىن-سوڭدى تىركەلگەن ەمەس. اڭىزعا اينالعان وسى ماۋسىمدا پەدرو ءجيى-ءجيى نەگىزگى قۇرامعا شاقىرتۋ الىپ, رەكوردتىق جەڭىسكە ءوز ۇلەسىن قوستى. چەمپيوندار ليگاسى فينالىنىڭ سوڭعى مينۋتىندا الاڭعا شىققان «دون پەدرو» قوس قۇلاقتى كۋبوكتى باسىنان اسىرا كوتەرگەن ەۋروپاداعى ەڭ جاس ويىنشى اتاندى.
كەلەسى جىلعى ماۋسىمدا پەدريتو ءوزىن ءبىرجولا مويىنداتتى. اۋەلى يسپانيا سۋپەركۋبوگىنە تالاس كەزىندە گول سوعىپ كوزگە ءتۇستى. ال ەۋروپا سۋپەركۋبوگىندە «شاحتەرگە» سوققان گولى «بارسەلوناعا» جەڭىس سىيلادى. كەيىننەن ەل بىرىنشىلىگىندە, كۋبوكتىق دودادا جانە چەمپيوندار ليگاسىندا مەرگەندىگىمەن تانىلعان-دى. سول جىلعى جەلتوقساندا ۇيىمداستىرىلعان كلۋبتار اراسىندا وتكەن الەم چەمپيوناتىندا دا پەدرو قارسىلاس قاقپاشىسىن قاپى قالدىردى. ول ءبىر ماۋسىمدا رەسمي ءتۋرنيردىڭ بارىندە گول سالعان تۇڭعىش فۋتبولشى اتاندى. ناتيجەسىندە كلۋب باسشىلارى وعان كاسىبي كەلىسىمشارت ۇسىنىپ, جەيدەدەگى «پەدريتو» ەسىمىن «پەدروعا» اۋىستىردى. وسىلايشا جانكۇيەرلەردىڭ ىستىق ىقىلاسىنا بولەنىپ, «دون پەدرو» دەگەن قۇرمەتكە يە بولدى.
كەلەر جىلى ءبىزدىڭ كەيىپكەر ۇلتتىق قۇراماعا شاقىرتۋ الدى. وڭتۇستىك افريكا رەسپۋبليكاسىندا وتكەن الەم چەمپيوناتىندا يسپانيا ەشكىمگە دەس بەرمەي, چەمپيوندىق تاجگە يە بولعانى ءمالىم. سول فۋتبول تويىندا «روحو-فۋريانىڭ» ساپىندا پەدرو دا ونەر كورسەتتى. ءبىر جىل بۇرىن سەگۋندادا دوپ تەپكەن فۋتبولشى الەم چەمپيونى اتاعىن جەڭىپ الدى! ەكى جىلدان كەيىن ەۋروپا چەمپيوناتىندا دا پەدرو ۇلتتىق قۇرامامەن بىرگە «قارت قۇرلىقتىڭ» ۇزدىگى اتاندى.
«بارسەلونا» ساپىندا جەتى جىل تەر توككەن پەدرو جاڭا بەلەستەردى باعىندىرۋ قاجەت ەكەنىن جاقسى ءتۇسىندى. ونىڭ ۇستىنە كاتالونيالىق كلۋب نەيماردى ساتىپ العان بولاتىن. مەسسي, سۋارەس, نەيمار ۇشتىگىمەن تايتالاسۋ قيىنعا سوعاتىنىن باعامداعان ول «تۇماندى البيونعا» جول تارتىپ, «چەلسي» كلۋبىمەن كەلىسىمشارت جاساستى. قازىرگى تاڭدا پەدرو – لوندوندىق كوماندانىڭ نەگىزگى ويىنشىلارىنىڭ ءبىرى.
پەدرو ەشقاشان كوپ گول سوعىپ كوزگە تۇسپەگەن, ونداي قابىلەتكە يە بولۋى دا نەعايبىل. الايدا جوق جەردەن شىعا كەلىپ, قاقپاشىمەن بەتپە-بەت قالادى. ونىڭ بويىندا دوپتىڭ باعىتىن سەزەتىن كەرەمەت قابىلەت بار. پەدرونىڭ سوققان گولى كومانداسى ءۇشىن ءاردايىم ماڭىزدى. ءارى ونىڭ ءومىر جولى تالماي ەڭبەك ەتكەن ادامنىڭ كەز كەلگەن بيىكتى باعىندىراتىنىن كورسەتەدى. ەگەر شىدامدىلىق پەن توگىلگەن تەر بولماعاندا 25 جىل بۇرىن كانار ارالىندا باستالعان تاعدىر ءتىپتى باسقا ارناعا بۇرىلۋى مۇمكىن با ەدى, كىم ءبىلسىن...
اباي اسانكەلدى ۇلى,
«ەگەمەن قازاقستان»
