پرەزيدەنت ۇندەۋىندە ايتىلعان بەس باستامانىڭ اربىرىنە جەكەلەي توقتالعان اسسامبلەيا وكىلدەرى حالىقتىڭ الەۋمەتتىك جاعدايىن جاقسارتۋعا باعىتتالعان بۇل جوبا دەر شاعىندا قولعا الىنعان يگى قادام دەپ باعالادى. بۇل جۇمىستاردى ىسكە اسىرۋدا قازاقستان حالقى اسسامبلەياسى دا بارىنشا كۇش سالاتىنى, ول ءۇشىن باستامانى حالىققا دۇرىس جەتكىزۋدىڭ ماڭىزى زور ەكەنى ءسوز بولدى. ماسەلەن, الداعى جاز ايلارىنان باستاپ قازاقستان حالقى اسسامبلەياسىنىڭ مۋلتيمەديالىق پورتالى ىسكە قوسىلادى. وندا ءتۇرلى ەتنومادەني ورتالىقتاردىڭ جاڭالىقتارى جاريالانىپ تۇرماق. پورتال جۇمىسىنىڭ باستى باعىتىنىڭ ءبىرى پرەزيدەنتتىڭ بەس الەۋمەتتىك باستاماسىن جاستارعا جەتكىزۋگە ارنالادى.
– مەملەكەت باسشىسى ءبىرىنشى كەزەكتە حالىقتى قولجەتىمدى باسپانامەن قامتۋ ماسەلەسىنە توقتالدى. «7 – 20 – 25» باعدارلاماسى جۇرتشىلىقتى باسپانامەن قامتۋ جۇمىستارىن وڭتايلى شەشۋگە جول اشاتىن بولادى. پرەزيدەنت ەكىنشى باستاماسىندا ستۋدەنت جاستارعا بارىنشا جاعداي جاساۋ جايىن نەگىزگە الىپ, مەملەكەتتىك گرانت سانىن تاعى دا 20 مىڭعا ۇلعايتۋدى تاپسىردى. جاستارىمىز وسىنى جاقسى ءتۇسىنىپ, جاقسى ءبىلىم الىپ باسەكەگە قابىلەتتى مامان بولۋعا تالپىنۋى ءتيىس. مەملەكەتىمىزدى دامىتاتىن نەگىزگى تەتىكتەردى انىق كورسەتىپ بەرگەن پرەزيدەنت ءسوزىنىڭ قورىتىندىسىندا مۇنىڭ بارلىعى ويداعىداي ىسكە اسۋى ءۇشىن بارىنەن دە بىرلىك پەن تاتۋلىقتىڭ ماڭىزدى ەكەنىن ايتتى. وسىناۋ ايقىن ماقساتتاردىڭ جولىندا ءبارىمىز كۇش بىرىكتىرىپ, مەملەكەتىمىزدىڭ دامۋىنا وزىندىك ۇلەسىمىزدى قوسۋىمىز كەرەك, – دەدى قحا توراعاسىنىڭ ورىنباسارى ل.پروكوپەنكو.
باسقوسۋدا پرەزيدەنت ۇندەۋىندە قامتىلعان شاعىن نەسيەلەردىڭ جالپى سوماسىن ۇلعايتۋ جايى دا ايتىلدى. بۇل باستاما ازاماتتاردىڭ كاسىپكەرلىكپەن اينالىسۋىنا جول اشىپ, ەكونوميكالىق الەۋەتىمىزدىڭ ارتۋىنا سەرپىن بەرەدى دەگەن «احىسكا» تۇرىك ەتنومادەني ورتالىعى توراعاسىنىڭ ورىنباسارى شاحيسلام اسيەۆ: «ەلىمىزدە ءوز ءىسىن دوڭگەلەتەمىن دەگەن ازاماتتارعا مۇمكىندىك مول. مەملەكەت كاسىپكەرلەردى جان-جاقتى قولداپ كەلەدى. ەلباسى شاعىن نەسيەلەردىڭ جالپى سوماسىن 62 ميلليارد تەڭگەگە دەيىن كوبەيتۋدى تاپسىردى. وسى ارقىلى ازاماتتارىمىز ءوز ماقساتىن جۇزەگە اسىرىپ, حالىقتى جۇمىس ورىندارىمەن قامتۋعا, وتاندىق ونىمدەر سانىن كوبەيتۋگە ءوز ۇلەستەرىن قوسا الادى» دەدى.
«ەلىمىزدىڭ گۇلدەنۋى – ءاربىرىمىزدىڭ جاقسى ءومىر ءسۇرۋىمىزدىڭ كەپىلى» دەگەن اسسامبلەيالىقتار, ۇندەۋدە ايقىندالعان ماقساتتاردى جۇزەگە اسىرۋ بارىمىزگە ورتاق مىندەت دەپ تارقاستى.
ارمان وكتيابر,
«ەگەمەن قازاقستان»
