«مۇقاشەۆ سەرىكجان شايزادا ۇلى قر قك 367-بابى, 3-بولىگىنىڭ 1, 2-تارماقتارىندا كوزدەلگەن قىلمىستى جاساۋ بويىنشا ايىپتى دەپ تانىلىپ, وعان ءۇش جىلعا دەيىن باس بوستاندىعىنان ايىرۋ, ءومىر بويى مەملەكەتتىك قىزمەتتە لاۋازىم يەلەنۋ قۇقىعىنان ايىرۋ جازاسى بەلگىلەنسىن, جازانى قىلمىستىق-اتقارۋ جۇيەسىنىڭ قاۋىپسىزدىك دەڭگەيى ورتاشا مەكەمەسىندە وتەسىن», - دەپ ۇكىم وقىدى سۋديا ۋبايدۋللا قوشانوۆ.
ءىستىڭ باسقا قاتىسۋشىلارىنا دا جازا بەلگىلەندى. مۇقاشەۆتىڭ ورىنباسارى شامىشەۆكە مەملەكەتتىك قىزمەتتە لاۋازىم يەلەنۋ قۇقىعىنان ءومىر بويىنا ايىرا وتىرىپ, 2 جىلعا باس بوستاندىعىنان ايىرۋ جازاسى بەرىلدى. «قازاقاۆتوجول» رمك باسقارماسىنىڭ بۇرىنعى باستىعى ەلەمەسوۆتىڭ باس بوستاندىعى بەس جىلعا شەكتەلدى. «قازاقاۆتوجول» رمك مەملەكەتتىك ساتىپ الۋلار باسقارماسىنىڭ بۇرىنعى باستىعى اجىعۇلوۆ پەن «قازاقاۆتوجول» رمك قاراعاندى وبلىستىق فيليالىنىڭ بۇرىنعى ديرەكتورى مۇقانوۆ ەكى جىلعا باس بوستاندىعىنان ايىرىلدى.
ەسكە سالا كەتەيىك, بىلتىر 20 جەلتوقساندا سىبايلاس جەمقورلىققا قارسى ءىس-قيمىل ۇلتتىق بيۋروسىنىڭ ءباسپاسوز قىزمەتى رەسپۋبليكالىق بيۋدجەتتىڭ اتقارىلۋىن باقىلاۋ جونىندەگى ەسەپ كوميتەتىنىڭ باس مەملەكەتتىك اۋديتورلارى ب. كوپەباەۆا مەن ا. جاڭگىروۆا ءىرى مولشەردە پارا العانىن ءمالىم ەتكەن بولاتىن. لاۋازىمدى تۇلعالار جوسپارلى تەكسەرىس جۇرگىزۋ كەزىندە «قازاقاۆتوجول» رمك باس ديرەكتورى س. مۇقاشەۆ پەن ونىڭ ورىنباسارى ە. شامىشەۆتەن بيۋدجەت قاراجاتتارىن ورىنسىز پايدالانعانىن اۋديتورلىق ەسەپتە كورسەتپەۋى ءۇشىن 16 ميلليون تەڭگە مولشەرىندە پارا العان. وسى قىلمىستىق ىسكە «قازاقاۆتوجولدىڭ» وبلىستىق فيليالدارىنىڭ بارلىق باسشىلارى تارتىلىپ, مەملەكەتتىك اۋديتورلار ءۇشىن پاراعا اقشا جيناعان.
