كەزدەسۋ بارىسىندا گۇلشارا ابدىقالىقوۆا ەلىمىزدەگى ديپلوماتيالىق ميسسياسىن اياقتاعالى وتىرعان يتاليانىڭ توتەنشە جانە وكىلەتتى ەلشىسى س.راۆانيانعا قازاقستانداعى جەمىستى قىزمەتى ءۇشىن العىس ايتىپ, تىلەكتەستىك ءبىلدىردى.
گ.ابدىقالىقوۆا س.راۆانياننىڭ ديپلوماتيالىق ميسسياسى كەزىندە ميلانداعى «ەكسپو-2015» كورمەسىنە قاتىسۋ ءۇشىن قازاقستان پرەزيدەنتىنىڭ يتالياعا ساپارى ۇيىمداستىرىلعانىن اتاپ ءوتتى.
مەملەكەتتىك حاتشى قازاقستان مەن يتاليا اراسىنداعى ءوزارا سەنىمدى قارىم-قاتىناستىڭ 25 جىل ىشىندە ستراتەگيالىق سەرىكتەستىك دەڭگەيىنە كوتەرىلگەنىنە توقتالدى.
– ءبىز يتالياداعى پارلامەنت سايلاۋىنىڭ بارىسىن زور قىزىعۋشىلىقپەن باقىلاپ وتىردىق. سايلاۋ ناتيجەسىندە ەلدەرىڭىزدە پارلامەنت پەن ۇكىمەتتىڭ جاڭا قۇرامى جاساقتالاتىن بولادى, – دەدى مەملەكەتتىك حاتشى.
گۇلشارا ابدىقالىقوۆا يتاليانى ەۋروپاداعى قاۋىپسىزدىك جانە ىنتىماقتاستىق ۇيىمىنداعى قازىرگى توراعالىعىمەن جانە 2017 جىلى بۇۇ قاۋىپسىزدىك كەڭەسىندەگى تۇراقتى ەمەس مۇشەلىگىنىڭ تابىستى بولۋىمەن قۇتتىقتادى.
مەملەكەتتىك حاتشى يتاليا باسشىلىعىنا «ەكسپو-2017» كورمەسىنە قاتىسقانى ءۇشىن ريزاشىلىق ءبىلدىرىپ, وسى ەلدىڭ پاۆيلونىندا «جاسىل تەحنولوگيا» سالاسىنداعى ۇزدىك ازىرلەمەلەر ۇسىنىلعانىن ايتتى.
سونداي-اق, كەزدەسۋ بارىسىندا تاراپتار قازاقستان-يتاليا قارىم-قاتىناسىنىڭ قازىرگى جاعدايىن, ساياسي, ەكونوميكالىق جانە مادەني-گۋمانيتارلىق ىنتىماقتاستىقتىڭ پەرسپەكتيۆالارىن تالقىلادى.
***
يتاليا قازاقستان رەسپۋبليكاسىنىڭ الەمدەگى ساۋدا سەرىكتەسى سانالاتىن ەلدەردىڭ ىشىندە ءۇشىنشى ورىندا تۇر. ەكى ەل اراسىنداعى تاۋار اينالىمى 2017 جىلى 9,6 ميلليارد اقش دوللارىن قۇرادى. 2005-2017 جىلدار ارالىعىندا قازاقستان ەكونوميكاسىنا يتاليادان كەلگەن تىكەلەي ينۆەستيتسيانىڭ كولەمى 5,8 ميلليارد دوللارعا جەتتى. بۇگىندە ەلىمىزدە يتاليالىقتاردىڭ قاتىسۋمەن 228 بىرلەسكەن كاسىپورىن جۇمىس ىستەيدى.
