ەكى تاراپتىڭ ءوزارا ۋاعدالاستىعى بويىنشا يندۋستريالدى پارك قۇرىلىپ, سەگىز جوبا شەڭبەرىندە پەستيتسيدتەر مەن تىڭايتقىشتار, ماشينا جاساۋ زاۋىتتارى, لوگيستيكالىق ورتالىق, تاعى باسقا وندىرىستىك وشاقتار سالىناتىن بولادى. ول ءۇشىن قىزىلجار اۋدانى اۋماعىنان 400 گەكتار جەر تەلىمى ءبولىنىپ, قاعاز-تسەلليۋلوزا كومبيناتى مەن تەمىرجولدىڭ ەكى جەلىسىنىڭ قۇرىلىسى بيىل باستالادى. قارجىلىق جاعىنان قامتاماسىز ەتۋدى اسپاناستى ەلىنىڭ ينۆەستورلارى ءوز مىندەتتەرىنە العان. 1,5 مىڭ جۇمىس ورىندارى قۇرىلادى دەپ جوبالانۋدا.
جۋىردا كومپانيانىڭ باس ديرەكتورى جانگ كسيۋمينگ باستاعان دەلەگاتسيا وڭىرگە كەلگەن جۇمىس ساپارىندا م. قوزىباەۆ اتىنداعى سولتۇستىك قازاقستان مەملەكەتتىك ۋنيۆەرسيتەتىنىڭ باسشىلىعىمەن دە كەزدەسىپ, بىلىكتى كادرلار دايىنداۋ جايى قىزۋ تالقىلاندى. كەلەشەكتە ينجەنەر, اگرونوم, ماشيناجاساۋشىلار, ەلەكتروەنەرگەتيكتەر,بيوتەحنولوگتار ماماندىقتارىنا سۇرانىستىڭ ارتاتىنى ەسكەرىلىپ, ولاردى تاجىريبەدەن وتكىزۋدىڭ, باسەكەلەستىككە قارىمدىلىعىن ارتتىرۋدىڭ, جۇمىسقا ورنالاستىرۋدىڭ ناقتى قادامدارى اتاپ كورسەتىلدى. ۋنيۆەرسيتەتتىڭ رەكتورى سەرىك ومىرباەۆ ءوز سوزىندە قىتاي كومپانياسى سالاتىن ءوندىرىس ورىندارىن جەرگىلىكتى كادرلارمەن تولىقتىرۋعا ءازىر ەكەندىكتەرىن, ماتەريالدىق-تەحنيكالىق بازانى جاڭارتۋ, پروفەسسور-وقىتۋشىلار قۇرامىن ىرىكتەۋ جۇمىستارى جالعاسىپ جاتقانىن جەتكىزدى. وقۋلىقتار مەن وقۋ-ادىستەمەلىك جاعىنان كومەك بەرىلسە, قىتاي ءتىلىن وقىتۋدى قولعا الار ەدىك, دەدى ول. قارسى جاق وكىلدەرى ۇسىنىستى قابىل الىپ, جۇمىس كۇشى زارۋلىگى بىرىگىپ شەشىلەتىنىنە, بارلىق قاجەتتى جاعدايلار جاسالاتىنىنا سەندىردى. ولاردى ەڭسەلى وقۋ ورنىنىڭ اۋىل شارۋاشىلىق جانە تەحنيكالىق الەۋەتى دە قىزىقتىردى. اۋقىمدى جوبالار ءۇش كەزەڭنەنە تۇرادى. العاشقىسى جىل اياعىنا دەيىن پايدالانۋعا بەرىلەدى. وىلايشا ءوزارا كەلىسىمىمەن بەكىتىلگەن مەموراندۋم شەڭبەرىندە ءىرى قارا مالعا ارنالعان جەمشوپ ءوندىرىسى, اگروحيميا جانە اۋىر ونەركاسىپ سالاسىنداعى قولدانبالى عىلىمي-زەرتتەۋلەر كەشەندى تۇردە ىسكە اسىرىلادى. بۇعان قوسا الداعى ۋاقىتتا سولتۇستىكقازاقستاندىق ستۋدەنتتەر قىتايلىق وزىق كاسىپورىنداردا تاجىريبەدەن ءوتىپ, ينۆەستيتسيالىق باعدارلامالار بويىنشا سالىناتىن زاۋىتتاردا ەڭبەك ەتە الادى.
«پرەزيدەنتتىڭ بەس باستاماسى» ۇندەۋىندە اتاپ وتىلگەندەي ونەركاسىپتىك رەۆوليۋتسيا جاعدايىنداعى جاڭا ەكونوميكادا زور سۇرانىسقا يە جاڭا ماماندار دايارلاۋ–باستى تالاپتاردىڭ ءبىرى. مەموراندۋم نەگىزىندە «جول كارتاسى» جاسالىپ, جىلىنا 10-15 ستۋدەنت قىتايدا ءتىل ۇيرەنۋمەن قاتار بىلىكتىلىكتەرى مەن شەبەرلىكتەرىن شىڭداپ قايتادى. وزىمىزدە قىتاي ءتىلىن مەڭگەرۋ ءۇشىن دايىندىق كۋرستارى جۇرگىزىلەدى. اسپاناستى ەلىندە تۇرىپ جاتقان ەتنيكالىق قازاقتاردى قىزمەتكە شاقىرۋدىڭ جولدارى ويلاستىرىلعان», دەيدى حالىقارالىق ستراتەگيا جانە ىنتىماقتاستىق ماسەلەلەرى جونىندەگى پرورەكتور ايدوس مۇقاتاەۆ.
ءومىر ەسقالي,
«ەگەمەن قازاقستان».
سولتۇستىك قازاقستان وبلىسى.
