قازىلار القاسىنىڭ شەشىمىمەن ونلاين جۇيەسىندەگى اشىق داۋىس بەرۋ بارىسىندا شىعىس قازاقستان وبلىسىنىڭ ارۋى, سەمەيلىك ديانا بايجۇمانوۆا سۇلۋلىق كونكۋرسىنىڭ جەڭىمپازى اتاندى. ديانا قازاقستان رەسپۋبليكاسى ۇلتتىق ۇلانى «شىعىس» وڭىرلىك قولباسشىلىعىنىڭ 5511 اسكەري بولىمىندە تابىستى ەڭبەك ەتۋدە. سەمەي قالاسىندا تۋعان. ۇلتتىق ۇلان ساپىندا 2017 جىلدان باستاپ, قارجى قىزمەتىنىڭ باس مامانى رەتىندە جۇمىس ىستەپ كەلەدى. ايتا كەتۋ كەرەك, سەمەيلىك ارۋ وسى بولىمدە تابان اۋدارماي 15 جىل قىزمەت ەتكەن ءوز اناسىنىڭ ىزىمەن ءجۇرۋدى قۇپ كورىپ, اسكەري قىزمەتتى تاڭداپتى.
ورتا مەكتەپتى تامامداعاننان كەيىن ديانا سەمەي قالاسىنداعى قارجى-ەكونوميكالىق كوللەدجىن «ەسەپ جانە اۋديت» ماماندىعى بويىنشا بىتىرەدى. سودان كەيىن جاس مامان رەتىندە, ەلىمە ەڭبەك ەتسەم دەگەن ناقتى ماقساتتى ۇستانادى. ارميا قاتارىندا ءجۇرىپ, ديانا قازاق يننوۆاتسيالىق ۋنيۆەرسيتەتىندە نەگىزگى ماماندىعى بويىنشا جوعارى ءبىلىمدى سىرتتاي الىپ شىعىپتى.
– اسكەري قىزمەتتى جاقسى كورەمىن, – دەدى ديانا بايجۇمانوۆا, – ادامدى ءتارتىپ پەن جيناقىلىققا ۇيرەتىپ, وتانعا دەگەن سۇيىسپەنشىلىكتى ارتتىرادى.
ساپقا تۇرۋدىڭ, قارۋ-جاراق ۇستاۋدىڭ بارلىق قىر-سىرىن مەڭگەرگەن. ول مۇنىڭ ءبارىن الدىڭعىلاردىڭ قاتارىندا ورىندايدى.
راۋشان نۇعمانبەك,
جۋرناليست
سەمەي
