فوتو: راحىم قويلىباەۆ
ەلىمىزدىڭ ءبىرىنشى حانىمى جانە بارلىق بالالاردىڭ اناسى سارا الپىسقىزىنىڭ: ء«ومىر سۇرىڭىزدەر, جاقسى كورىڭىزدەر, كەشىرىمدى بولىڭىزدار. جۇرەكتەرىڭىزدەن سەنىم, ءۇمىت, ماحاببات وشپەسىن. سىزدەرگە باقىت, دەنساۋلىق تىلەيمىن», دەگەن ىزگى تىلەگى اتىراۋلىق بالالارعا قۋانىش سىيلادى.
«شاڭىراقتاعى» التى وتباسىندا 59 بالا بار. ولار بالالار اۋىلىنىڭ ديرەكتورى گۇلسارا بوتاتاەۆانى «ۇلكەن ماما» دەپ اتايدى. تىلىنە, دىنىنە بولىنبەي, ءبىر ۇيدە تاتۋ-ءتاتتى ءومىر ءسۇرىپ جاتقان بالالار ونەرگە دە جاقىن. ءتۇرلى ۇيىرمەلەرگە قاتىسىپ, شىعارماشىلىقتارىن شىڭداپ ءجۇر. ارالارىندا جاس اكتەرلەر دە بار. وبلىس اكىمدىگىنىڭ قولداۋىمەن ءدىن ىستەرى باسقارماسى «اقپاراتتىق-تالداۋ ورتالىعىنىڭ» تاپسىرىسى نەگىزىندە تۇسىرىلگەن «امانات» فيلمىندە وسى بالالار ءۇيىنىڭ تاربيەلەنۋشىلەرى رۋسلان دجابباروۆ, بەكزات سەرىكقالي, نۇرداۋلەت شۋداباي باستى رولدەردى وينادى. مەرەكەگە وراي ولارعا دا العىس حاتتار تابىستالدى.
ارينە ءار بالا ءوز وتباسىندا, اتا-اناسىنىڭ ايالى الاقانىندا وسكەنى جاقسى. بىراق ومىردە ارقيلى تاعدىر بار. بالالار اۋىلىن مەكەندەيتىن بالعىندار قاشاندا مەملەكەت قامقورلىعىندا. ۇلكەن جۇرەكتى ازاماتتار مەن وڭىردەگى مەكەمەلەر, كاسىپورىندار دا قايىرىمدىلىق جاساۋدان تىس قالىپ كورگەن ەمەس. وبلىستىق كامەلەتكە تولماعانداردىڭ ىستەرى جونىندەگى مامانداندىرىلعان اۋدانارالىق سوتىنىڭ توراعاسى ايگۇل تاشەنوۆا, سۋديالار ناعيما ىسقاقوۆا, عيزاتوللا وتار ۇلى, ءسانيا ايدارباەۆا, اتىراۋ قالالالىق سوتىنىڭ سۋديالارى لاۋرا لۇقپانوۆا, مەدينا سەرىكباەۆا, ايگەرىم قارشىعا سەكىلدى ابزال جاندار العىس ايتۋ كۇنىنە ارنالعان شاراعا ارنايى كەلىپ, بالالارعا سىيلىقتار تابىستادى. «باربانگ» كۇرد ەتنو-مادەني بىرلەستىگىنىڭ توراعاسى ءالي سەيدوۆ پەن «ەدىل-جايىق» قاراقالپاق ەتنو-مادەني بىرلەستىگى توراعاسىنىڭ ورىنباسارى جەتكەرباي پىشەنباي, قازاقستان حالقى اسسامبلەياسى جاستار قاناتىنىڭ توراعاسى الەكسەي يشين, «جاستار رەسۋرستىق ورتالىعى» باسشىسىنىڭ ورىنباسارى ايدانا بالاشەۆالار دا بالالارعا بازارلىقتارىن الا كەلدى. ەرىكتىلەر توبى كونتسەرتتىك باعدارلاما قويدى.
– مۇنداي شارالار بالالارعا مەرەكە سىيلايدى, – دەيدى گۇلسارا بوتاتاەۆا. – «ۇيىمىزگە قوناق كەلەدى» دەپ بالالار الدىن الا دايىندالادى. كىشكەنە كەزدەرىنەن وسى تاربيەنى الىپ وسكەننەن كەيىن ولارعا قوعامعا بەيىمدەلۋ, جەتىستىكتەرگە جەتۋ قيىنعا سوقپايدى. ءتۇرلى بايقاۋلاردا جەڭىمپاز اتانعان ماقتانىشتارىمىز بار. بالالار اۋىلىنىڭ قابىرعاسىنان كەتسە دە, ومىردەن ءوز ورىندارىن تاۋىپ, ەلگە پايداسىن تيگىزىپ جۇرگەن جاستاردى ۇلگى ەتىپ وتىرامىز. بالالار اۋىلى جانە جاسوسپىرىمدەر ۇيىنە وبلىس اكىمى نۇرلان نوعاەۆ تا ءجيى كەلەدى. بۇل جەردە باقىتتى بالالىق شاقتى قامتاماسىز ەتۋگە قاجەت جاعدايدىڭ ءبارى جاسالعان. بيىل جاڭا عيماراتتىڭ قۇرىلىسى باستالادى دەگەن قۋانىشتى جاڭالىعىمىز بار.
«قۋانتساڭ, بالانى قۋانت» دەگەن وسى. وزدەرىنە جاسالعان جاقسىلىققا ادەمى كيىمدەرىن كيىپ, دوڭگەلەنە بيلەپ, شاتتانا ءان شىرقاپ العىس ايتقان بالعىندارعا قاراپ وتىرىپ, وسىلاي ويلايسىڭ. تاعدىر ءتۇرلى بولسا دا, بالانىڭ ءبارى باقىتتى, ويتكەنى ولاردى ايالايتىن ەل بار, جانى ىزگى جاقسىلار بار.
باقىتگۇل باباش,
«ەگەمەن قازاقستان»
اتىراۋ
