ەلباسىنىڭ سوڭعى جولداۋلارى ەكونوميكالىق سالالارعا باعىتتالسا, يدەولوگيالىق جاعىنان «رۋحاني جاڭعىرۋ» باعدارلاماسىنىڭ ورىنى ەرەكشە.
ءبىز اۋەلدەن الەۋمەتتىك ماسەلەلەردى ۇدايى الدا ۇستايتىن, مەملەكەتتىڭ نەگىزگى بايلىعى ادام جانە ونىڭ ءومىرى دەگەن قاعيدانى بەرىك ۇستاناتىن الەۋمەتتىك مەملەكەتپىز. ەلباسىنىڭ ۇندەۋى وسى قاعيدانى قانشالىقتى ۇستاناتىنىمىزدىڭ دالەلى دەۋگە بولادى.
ەلباسى ءوز ءسوزىن ناۋرىز ايىنىڭ كوپتەگەن جاقسىلىقتارمەن باستالاتىندىعىمەن بايلانىستىرىپ ايتتى, كوپتەگەن مەرەكەلەرمەن قاتار حالىقتىڭ رۋحىن كوتەرىپ, ەرتەڭگى كۇنگە دەگەن زور سەنىم ۇيالاتاتىن, ناقتى بەس الەۋمەتتىك باستاما كوتەردى. ول باستامالاردىڭ بارلىعى جان-جاقتى قاراستىرىلعان, ءارى ورىندالاتىنى انىق ەكەندىگىن ناقتى ايتتى. اتالعان بەس باستامانىڭ بارلىعى وزەكتى, دەگەنمەن حالىقتىڭ ەرەكشە كوڭىلىنەن شىققان, كوكەيىنە قونعان تۇرعىن ءۇي جانە ونىڭ قول جەتىمدىلىگى بولدى. قازاق ء«ۇيى باردىڭ كۇيى بار», دەگەندەي باسپاناسىز بوسىپ, سارىلا كەزەگىن توسىپ, وزگەنىڭ بوساعاسىن سىعالاپ جۇرگەن قانشاما جاستارىمىزدىڭ ءۇيلى-كۇيلى بولۋىنا زور مۇمكىندىك تۋىپ وتىر.
ەلەڭ ەتكىزەر جاڭالىقتىڭ ءبىرى تومەن ايلىق الاتىنداردىڭ جاعدايىنىڭ ەسكەرىلگەندىگى بولدى. جالاقىنى ارتتىرۋ ءۇشىن كورسەتىلگەن سالىق جۇكتەمەسىن كەلەر جىلدان باستاپ 10 ەسەگە ازايتۋ كەرەكتىگى ءسوز بولدى. ياعني, كەلەر جىلدان باستاپ ەڭ تومەنگى ەسەپتىك كورسەتكىشتىڭ 25 ەسەلەنگەن كولەمىنەن از جالاقى الاتىنداردىڭ جەكە تابىس سالىعى 1 پايىزدى عانا قۇرايتىن بولماق.
ەلباسى ەشقاشان جاس ۇرپاقتىڭ ساپالى ءبىلىم الۋ ماسەلەسىن نازاردان تىس قالدىرعان ەمەس. ادەتتە بولىنەتىن 54 مىڭ ءبىلىم گرانتىنا قوسىمشا 20 مىڭ گرانت ءبولۋدى, سونداي-اق جاتاقحانا جەتىسپەۋشىلىگىن جويۋدى مىقتاپ قولعا الىناتىنى ايتىلدى. جاستارىمىزعا مۇنداي زور مۇمكىنشىلىكتى تولىعىمەن پايدالانىپ, جايلى جەردە تۇرىپ, جان-جاقتى ءبىلىم الۋعا وراسان مۇمكىندىك تۋىپ وتىر.
نۇرسۇلتان نازارباەۆ سوڭعى باعىتتا ەل وڭىرلەرىن گازبەن قامتۋعا ەرەكشە كوڭىل بولگەن. ءارى, ونىڭ 1,5 جىل ىشىندە شەشىمىن تابۋ كەرەك ەكەنىن باسا ايتتى. بەلگىلى بولعانداي, بۇل باستاما ەلوردادان باستاۋ الىپ, ەلىمىزدىڭ قالعان وڭىرلەرىنە جول تارتپاق. بۇل ءوز تۇرعىسىندا ەلدەگى جىلۋ ماسەلەسىن عانا ەمەس, بىرقاتار ەكولوگيالىق ماسەلەلەردىڭ دە شەشىم تاباتىندىعىن مەڭزەيدى.
ەلباسى ءسوز باسىندا بۇل باستامالاردىڭ كوپتەن كوكەيدە بولعانىن ايتىپ, ال بۇگىن سونى جۇزەگە اسىرۋعا جاعدايىمىزدىڭ تولىق مۇمكىنشىلىگى بار ەكەنىن العا تارتتى. وسىنىڭ ءوزى ءار نارسەگە سابىرمەن قاراپ, بايسالدىلىق تانىتساق مەملەكەت ءبىرىنشى مۇمكىنشىلىك تۋعاندا بىردەن حالىقتىڭ جاعدايىن جاساۋعا كىرىسەتىندىگىن كورسەتتى. بۇل جوسپارلاردىڭ بارلىعىنىڭ جۇزەگە اسۋى – ول ەلدەگى تۇراقتىلىقپەن تىنىشتىق, ۇلتارالىق كەلىسىممەن ەل بىرلىگىنىڭ جەمىستى ناتيجەسى. باستىسى وسى يگىلىكتەردى جۇزەگە اسىرۋ ءۇشىن بالتالاسا دا بۇزىلمايتىن بىرلىگىمىز بولۋى كەرەك.
كەز-كەلگەن دامىعان ەلدەردە مۇنداي الەۋمەتتىك ماسەلەلەر الدىڭعى قاتارعا قويىلىپ, شەشىمىن تاپقان. ال سول دامىعان ەلدەردىڭ ورتاسىنان ويىپ تۇرىپ ورىن الۋ ءۇشىن, وسى جولعى ۇندەۋ ەل تۇرعىندارىنىڭ الەۋمەتتىك ءال-اۋقاتىن ارتتىرۋعا باعىتتالىپ وتىر.
ءبىز بۇگىنگى بىرلىگىمىزدى, ەل رەتىندەگى ەلدىگىمىزدى ساقتاي الساق, ەلدىڭ ەرتەڭى ءۇشىن ايانباي قىزمەت ەتەتىن ۇلت بولا الساق وسى جوسپارلاردىڭ بارلىعى ءشۇباسىز بەلگىلەگەن ۋاقىتتا جۇزەگە اساتىندىعىنا سەنىم مول.
باعزات اقجولوۆ,
س.عىلماني مەشىتىنىڭ نايب يمامى
