بۇل تاۋەلسىز قازاقستان حالقىنا دامۋدىڭ جاڭا كەزەڭىندە جولباسشى سەكىلدى. دۇنيە جۇزىندەگى دامىعان, موينى وزىق ەلدەردىڭ قاتارىنان كورىنۋگە تالپىنىپ وتىرعان ەلىمىز ءۇشىن ەلباسىنىڭ ءار جىلعى جولداۋى الىس-جاقىن كەزەڭگە جاسالعان ناقتى جوسپار بولىپ كەلەدى. سوكولوۆ-سارىباي كەن ءوندىرۋ بىرلەستىگىنىڭ 18 مىڭ ادامنان تۇراتىن ۇجىمى نۇرسۇلتان نازارباەۆتىڭ قازاقستان حالقىنا جولداعان ء«تورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى كەزەكتى جولداۋىمەن ىجداعاتتى تۇردە تانىستى. ويتكەنى كەمەل بولاشاقتىڭ ءوز ەڭبەگىمەن كەلەتىنىن بىلەتىن جۇمىسشى حالىقتى ەلدىڭ جاڭا ساتىعا كوتەرىلۋى, قازاقستاندىقتاردىڭ الەۋمەتتىك يگىلىكتەرى نازاردان تىس قالدىرمايدى.
جولداۋدا ەلباسى ەلدىڭ الدىنا ون مىندەت قويادى. سولاردىڭ كوشىن باستاپ تۇرعان ءبىرىنشى مىندەت «يندۋستريالاندىرۋ جاڭا تەحنولوگيالاردى ەنگىزۋدىڭ كوشباسشىسىنا اينالۋى ءتيىس» دەپ اتالادى. ءوندىرىس قاشاندا ەكونوميكانىڭ كوشباسشىسى ەكەنى ايان. كەن الىبى سانالاتىن, بۇگىندە دۇنيە جۇزىندەگى ساناۋلى ءىرى كەن ورىندارىنىڭ ءبىرى, ەۋرازيا توبىنا كىرەتىن سوكولوۆ-سارىباي كەن ءوندىرۋ بىرلەستىگى ەلىمىز ءوندىرىسىنىڭ فلاگمانى سانالادى. بارلىعىن جاھاندىق باسەكە تارازىلاپ تۇرعان كەزەڭدە يننوۆاتسيالىق تەحنولوگيالاردى ەنگىزبەي كوشتەن قالاتىنىمىز ايقىن. سەبەبى وندىرگەن ءونىم وتپەسە ول شىعىنعا اينالاتىنى ەكونوميكاداعى دالەلدەۋدى قاجەت ەتپەيتىن اكسيوما. ال يننوۆاتسيالىق وزىق تەحنولوگيالار ەنگىزىلمەي, كاسىپورىننىڭ ەكسپورتتىق الەۋەتى جوعارىلامايدى.
وتكەن عاسىردىڭ ورتاسىندا ىرگەسى قالانىپ, تەمىر كەنىنىڭ العاشقى تونناسىن بەرگەن الىپ كەنىشتىڭ ءححى عاسىردا ماقسات-مۇددەسى جاڭا سيپاتقا يە بولىپ وتىر. ماقسات بۇرىنعىداي كورسەتكىش قۋ ەمەس, اڭگىمە ساپاعا كەلىپ تىرەلەدى. ساپانىڭ بولۋى جانە جاھاندىق باسەكەگە توتەپ بەرۋ ءۇشىن نۇرسۇلتان نازارباەۆ جولداۋدا قويىپ وتىرعان مىندەتتەر تۇرعىسىنان كورىنۋىمىز قاجەت. ءححى عاسىر يندۋستريا 4.0, ءتورتىنشى ونەركاسىپتىك رەۆوليۋتسياسىن العا تارتىپ وتىر. وسى مىندەت الدىمەن ءوندىرىستى اينالىپ وتپەيدى. مىسالى, جىل اياعىندا سوكولوۆ-سارىباي كەن ءوندىرۋ بىرلەستىگىنە قاراستى قاشار كەن باسقارماسىندا امەريكالىق «مودۋلار ماينينگ سيستەمس» كومپانياسىنىڭ DISPATCH جۇيەسىن ەنگىزدىك. سونىڭ ارقاسىندا قاشار «اقىلدى كەنىش» اتالدى.
ونىڭ ءمانىسى مىنادا, اۋىسىم سايىن قاشاردان كەن ارتۋ ءۇشىن 14 ەكسكاۆاتور, 30 تەحنولوگيالىق اۆتوموبيل جۇمىس ىستەيدى. وسى تەحنيكالاردى دۇرىس پايدالانۋ, ولاردى ورنالاستىرۋ, تاسىلاتىن كەننىڭ كولەمى, ساپاسى تۋرالى اقپارات الۋ ءۇشىن قانشاما ۋاقىت كەتەتىن ەدى. ال كەز كەلگەن بيزنەستە, كەز كەلگەن سالادا ۋاقىت رەسۋرس, قارجى, تابىس بولىپ سانالادى. قازىر وسى جۇمىستارعا قاتىستى تولىپ جاتقان اقپاراتتىڭ بارلىعى ديسپەتچەردىڭ باسىندا ەمەس, اسا دالدىكپەن جۇيەدە تۇرادى, ماماندار ونى كومپيۋتەردەن باقىلاپ, كورىپ وتىرادى. ءبىز وسى باعىتتا دامي بەرەتىن بولامىز. ايتپاقشى, جىل اياعىندا وتكەن جالپىۇلتتىق تەلەكوپىردە قاشار كەنىشىنىڭ الاڭىندا وسى «اقىلدى كەنىش» جوباسىن ىسكە قوسقانىمىزدا, نۇرسۇلتان ءابىش ۇلى كەنشىلەر مەن مەتاللۋرگتەر باستاماسىنا ريزا بولىپ, «بۇل «تسيفرلى قازاقستان» باعدارلاماسىنىڭ العاشقى قارلىعاشى» دەپ باعالاعان بولاتىن.
نۇرسۇلتان نازارباەۆ جولداۋدا ەكىنشى قويىپ وتىرعان مىندەتتى دە ءبىز ءوز جۇمىسىمىزدا باستى نازارعا الاتىن بولامىز. ەلباسى «تابيعي رەسۋرستاردى باسقارۋعا قاتىستى ۇستانىمداردى سىني تۇرعىدان قايتا پىسىقتاۋدى» تاپسىرىپ وتىر. وتە دۇرىس. جەرىمىز تابيعي رەسۋرستارعا باي, بىراق كەلەر ۇرپاقتىڭ قامىن ويلاساق, بارلىق شيكىزات ءتۇرىن ماقساتسىز وڭدى-سولدى ءوندىرۋدى, شاشۋدى ۋاقىت سيپاتى كوتەرمەيدى, وعان ۇنەمشىلدىكپەن قاراۋعا ءتيىسپىز. سول ءۇشىن مەملەكەت باسشىسى ءوندىرۋدىڭ وزىق تەحنولوگيالارىن, كەشەندى اقپاراتتىق-تەحنولوگيالىق پلاتفورمالارىن بارىنشا بەلسەندى ەنگىزۋدى تاپسىردى. ۇنەمى دامۋ ۇستىندە كەلە جاتقان كەن الىبى بۇل مىندەتتەر ۇدەسىنەن دە تابىلادى دەپ ويلايمىز.
پرەزيدەنت نۇرسۇلتان نازارباەۆتىڭ العا قويىپ وتىرعان مىندەتتەرى انىق ءارى ءار قازاقستاندىققا تۇسىنىكتى. ءححى عاسىردا باستالعان جاھاندانۋ داۋىرىندە قازاقستان دا ء«تورتىنشى ونەركاسىپتىك رەۆوليۋتسيا» جەتىستىكتەرىن بارىنشا ەنگىزۋى جانە ونى پايدالانۋى ءتيىس. بۇل ورايدا كەنشىلەر قاشاندا كوش باسىنان كورىنبەك.
بەرەكە مۇحامەتقاليەۆ,
«سسكوب» اق پرەزيدەنتى
قوستاناي وبلىسى,
رۋدنىي قالاسى
