وزبەكستاندا رەسمي ەمەس دەرەكتەردە ءبىر ميلليوننان استام ەتنوستىق قازاقتار تۇرادى دەلىنەدى. ال وزبەك حالقىنىڭ بەس ءجۇز مىڭعا جۋىعى قازاقستان جەرىن جايلاپ جاتىر. بار تۇرمىستىق جاعدايى كەلىسكەن, وزبەك تىلىندە مەكتەپتەرى, دراما تەاترى بار دياسپورا وكىلدەرى وسىنداي مەملەكەتتىك قامقورلىق ءۇشىن ەلباسىنا ۇنەمى راحمەتىن ايتىپ وتىرادى.
جاقىندا قازاقستان حالقى اسسامبلەياسى وڭتۇستىك قازاقستان وبلىستىق فيليالىنىڭ ۇيىمداستىرۋىمەن وزبەكستانعا جول تارتقان «دوستىق كەرۋەنى» وڭتۇستىككە ورالدى.
– بۇل ساپار وزبەكستان رەسپۋبليكاسىنىڭ پرەزيدەنتى شاۆكات ميرزيوەۆتىڭ ناۋرىز ايىندا قازاقستانعا جاساعان رەسمي ساپارى كەزىندە قازاقستان حالقى اسسامبلەياسى مەن وزبەكستان ينتەرناتسيونالدى مادەني ورتالىعىنىڭ اراسىندا تۇزىلگەن ىنتىماقتاستىق تۋرالى مەموراندۋم اياسىندا ۇيىمداستىرىلىپ وتىر. مەموراندۋم ەكى ەل اراسىنداعى مادەني ىقپالداستىقتى ارتتىرىپ, قازاقستان حالقى اسسامبلەياسى مەن وزبەكستان ينتەرناتسيونالدى مادەني ورتالىعىنىڭ ارىپتەستىگىن نىعايتۋدى كوزدەيدى. سونىڭ اياسىندا ەتنوسارالىق بىرلىكتى قامتاماسىز ەتىپ وتىرعان ۇيىمداردىڭ قوس ەلگە ەتنوساياحات ۇيىمداستىرۋىنا مۇمكىندىك بەرىپ وتىر. «دوستىق كەرۋەنى» وڭتۇستىك قازاقستان وبلىسى قازاقستان حالقى اسسامبلەياسىنىڭ ۇيىمداستىرۋىمەن وزبەكستانعا ەكىنشى رەت جول تارتتى. دوستىق نيەتتەگى وزبەكستاندىق دەلەگاتتار دا وڭتۇستىك قازاقستان وبلىسىنىڭ تاريحي ورىندارىنا ساياحاتتار ۇيىمداستىرۋدا, – دەيدى كەرۋەندى باستاپ بارعان وبلىس اكىمى اپپاراتىنىڭ «قوعامدىق كەلىسىم» كمم باسشىسى ەربول بايقوناقوۆ.
قۇرامىندا وبلىستىڭ زيالى قاۋىمى, ەڭبەك ارداگەرلەرى, ەتنو-مادەني ورتالىق توراعالارى مەن باق وكىلدەرى بار كەرۋەن وزبەكستاندا كورشى ەلدىڭ تاريحي-مادەني ورىندارىن ارالادى. ساپار باسىن تاشكەنتتەگى تولە بي كەسەنەسىندەگى ۇلى ارۋاقتارعا زيارات ەتۋدەن باستاعان ازاماتتار سامارقانداعى ايگىلى رەگيستان تاريحي-ساۋلەتتىك كەشەنىمەن تانىسىپ, شاحي-زيندا تاريحي كەشەنىندە جەرلەنگەن وزبەكستاننىڭ ەكس-پرەزيدەنتى يسلام كاريموۆتىڭ رۋحىنا قۇران اياتتارىن باعىشتادى.
بۇحاراداعى باحاۋاددين ناكشباندي ماۆزولەيىن ارالاپ كوردى.
– وزبەكستان جەرىندە قازاقتىڭ ايتۋلى ەكى ءبيى تولە بي مەن ايتەكە ءبيدىڭ ءاز دەنەسى ماڭگى دەمالىپ جاتىر, – دەيدى قازاقستان حالقى اسسامبلەياسى وڭتۇستىك قازاقستان وبلىستىق فيليالى توراعاسىنىڭ ورىنباسارى ءمۇراتالى قالمۇراتوۆ. – ەكى تۋىسقان ەلدىڭ تامىرى ءبىر الىپ بايتەرەكتەن تارايتىندىعى قادىر اقىن ايتقانداي «تاريحى قالىڭ بولسا دا وقۋلىعى جۇپ-جۇقا» وتكەن داۋىرلەردەن بەلگىلى. ساپار بارىسىندا وزبەك اعايىنداردان ءتۇبى ءبىر تۋىسقانعا دەگەن جىلۋدى ايقىن سەزىندىك. ولار مەملەكەت باسشىسى نۇرسۇلتان نازارباەۆتىڭ الەمدە ورنى ەرەك قايراتكەر ەكەندىگىن, دۇنيە جۇزىندە بەيبىتشىلىكتى ساقتاۋدا ەرەن ەڭبەك ەتىپ جۇرگەنىن سۇيسىنىشپەن ايتادى. ءبىز دە ءوز كەزەگىمىزدە باۋىرلارىمىزعا جاقسى تىلەكتەر تىلەدىك. ءبىر كەزدەرى وزبەكستاننىڭ العاشقى پرەزيدەنتى يسلام كاريموۆ «قازاقپەن بىرگە جۇرسەڭ اداسپايسىڭ» دەگەن عيبراتتى ءسوز ايتىپ ەدى. سول ىزگى تىلەك ەكى ەل اراسىن بۇرىنعىدان بەتەر جاقىنداتىپ كەلەدى.
«دوستىق كەرۋەنى» وسىلايشا جاقسى نيەتكە قىزمەت ەتىپ جاتىر.
باقتيار تايجان,
«ەگەمەن قازاقستان»
وڭتۇستىك قازاقستان وبلىسى
