بارسەلوناداعى تەراكت: انىقتالعان جايتتار

جۇك كولىگى تۋريستەر كوپ قاتىنايتىن الاڭداعى كوشە بويىمەن 530-دان استام مەتر قاشىقتىقتى ءجۇرىپ وتكەن. "يسلام مەملەكەتى" تەررورلىق توبى لاڭكەستىك اكتىگە جاۋاپكەرشىلىكتى ءوز موينىنا الىپ وتىر. كاتالونيا باسشىسى كارلەس پۋچدەمون 100 ادامنىڭ زارداپ شەككەندىگىن جەتكىزدى. قۇقىق قورعاۋ ورگانىنىڭ وكىلدەرى بۇل قايعىلى وقيعانى تەراكت دەپ سيپاتتادى. ال بيلىكتەگىلەر زارداپ شەككەندەردىڭ قاتارى ءالى دە ارتاتىنىن ايتتى.

قىلمىستىق ارەكەتتى جاسادى دەگەن كۇدىكپەن ەكى ازامات ۇستالدى. ولار ماروككالىق جانە ميليليا (سولتۇستىك افريكانىڭ يسپاندىق انكلاۆى) تۇرعىندارى. بىراق ۇستالعاندار مينيۆەننىڭ جۇرگىزۋشىلەرى بولماي شىقتى. ازىرگە بەلگىلى بولعانداي, قاشىپ قۇتىلعان كولىك جۇرگىزۋشىسىنە ىزدەۋ سالىندى.

ال جۇماعا قاراعان ءتۇنى يسپانيالىق پوليتسيا تاعى ءبىر لاڭكەستىك شابۋىلدىڭ الدىن الدى. بارسەلونادان 100 شاقىرىم جەردە ورنالاسقان كامبريلس قالاسىندا 5 كۇدىكتى مەرت بولىپ, بىرەۋى جاراقات الدى. شابۋىلداۋشىلار 7 ادامدى جاراقاتتادى.

وقيعا قالاي بولدى؟

جەرگىلىكتى ۋاقىت بويىنشا 16:50-دە (استانا ۋاقىتى بويىنشا 20:50) شابۋىل جاسالدى. جۇك كولىگى كاتالونيا الاڭى جاقتان ادام تولى رامبلا بۋلۆارىنا شىقتى. ورتالىق بۋلۆاردىڭ ۇزىندىعى 1,2 كم. بۇل الاڭ تۋريستەر اراسىندا ءوزىنىڭ بازار دۇكەندەرى مەن شاعىن رەستوراندارىمەن تانىمال.

مينيۆەن ادامداردى باسىپ ءوتىپ, 80 كم/ساع جىلدامدىقپەن 500 مەتردەي جول ءجۇردى.

قۇربان بولعاندار مەن جاراقات العاندار

قازىرگى تاڭدا 13 ادام قازا تاۋىپ, جۇزدەن استام ادام جاراقات العان, ونىڭ 15-ءى اۋىر حالدە. يسپانيالىق رەسمي وكىلدەردىڭ حابارلاۋىنشا, بارسەلونادا وتكەن تەراكتىدە 18 ەلدىڭ ازاماتى جاراقات الىپ, سونىڭ ىشىندە كوز جۇمعاندار دا بار.

ولاردىڭ ىشىندە: گەرمانيا, فرانتسيا, يسپانيا, نيدەرلاند, ارگەنتينا, ۆەنەسۋەلا, بەلگيا, اۋستراليا, ۆەنگريا, پەرۋ, رۋمىنيا, يرلانديا, گرەتسيا, كۋبا, ماكەدونيا, قىتاي, يتاليا جانە الجير.

كىم بۇل ارەكەتكە باردى؟

پوليتسيا ەكى كۇدىكتىنى ۇستاعانىن حابارلاعان بولاتىن.

باسىندا پوليتسيا ماگرەبي دريسس ۋكابيرا ەسىمدى ازاماتتى «فياتتىڭ»  جۇرگىزۋشىسى رەتىندە ىزدەۋگە سالدى.

كەيىن باق كوزىندە ول ازامات قۇجاتتارىن جوعالتىپ العاندىعى جاريالاندى. ۇرلانعان قۇجات ارقىلى لاڭكەستەر كولىكتى جالعا العاندىعى بەلگىلى بولدى.

ەكىنشى لاڭكەستىك

كوشەدە جۇرگىزىلىپ جاتقان پوليتسيالىق ارەكەتتەرگە بايلانىستى كاتالونيا بيلىگى كامبريلس قالاشىعىنىڭ تۇرعىندارىن كوشەگە شىقپاۋىن ءوتىندى.

شابۋىل جاساعانداردىڭ ناقتى سانى بەلگىسىز بولىپ وتىر. يسپانيا پروكۋرورى حاۆەر ساراگوسا مىرزانىڭ حابارلاۋىنشا, ۇستالعان كۇدىكتىلەر تەررورلىق اكتىگە بايلانىستى بۇعان دەيىن سوتتالماعان.

بيلىك قالاي ارەكەت جاسادى؟

ءتۇرلى قۇرىلىمداردىڭ پوليتسەيلەرى بىرنەشە اۋداندى قورشاۋعا الىپ, ءار ءۇيدى ءتىنتىپ شىقتى.

مەترونىڭ ەكى جولى جابىلىپ, ورتالىق ستانتسيالار ق ۇلىپتالدى.

بيلىكتەگىلەر ۇيالى جەلىلەرگە جۇكتى ازايتۋ ماقساتىندا تۇرعىندارعا ۇيالى تەلەفون قولدانباي, الەۋمەتتىك جەلى ارقىلى بايلانىسۋلارىن سۇرادى. سونىمەن قاتار, پوليتسيا تەراكت بولعان ورىننان فوتو, ۆيدەو تاراتپاۋدى ءوتىندى.

جاۋاپكەرشىلىكتى كىم الدى؟

بيلىك بولعان وقيعانى تەراكت دەپ باعالادى, ال «يسلام مەملەكەتى» ەكسترەميستىك توبى شابۋىلعا كىنانى ءوز موينىنا الدى. الايدا ساراپشىلار يم-ءنىڭ حابارلامالارىنا كۇدىكپەن قاراۋعا شاقىردى.

جۇرت قالاي ارەكەت ەتتى؟

شابۋىل باستالعان كەزدە ادامدار جاقىن ماڭدا ورنالاسقان دۇكەن, كافە مەن وفيس ورتالىقتارىندا جاسىرىناتىن جەر ىزدەپ جۇگىردى. كەيىن ولاردى پوليتسيا وكىلدەرى ەۆاكۋاتسيالاپ, قاۋىپتى ايماقتان الىپ شىقتى.

كۋاگەرلەردىڭ ايتۋىنشا, بۋلۆاردا ادەتتەگىدەي ادام كوپ بولدى. تاكسي قىزمەتى ادامداردى ورتالىقتان تەگىن الىپ كەتىپ جاتتى.

«مەن ادامداردىڭ ءبىر مەزەتتە شىڭعىرعانىن ەستىدىم. بۇرىلىپ قاراسام, اق مينيۆەن كەتىپ بارا جاتىر ەكەن. باسىندا ءمان بەرمەدىم. كەيىن ونىڭ تىم جىلدام ءجۇرىپ, جان-جاققا بۇرىلىپ كەتىپ بارا جاتقانىن بايقادىم. ول جول جيەگىندە جۇرگەن ادامداردى ادەيى تاپايىن دەگەن پيعىلىن سول كەزدە ءبىلدىم», دەدى اتىن جاسىرىن ۇستاۋعا سۇراعان امەريكالىق تۋريست.

الەم نە دەدى؟

ءار مەملەكەتتە ورنالاسقان يسپانيا ەلشىلىكتەرىنىڭ الدىنا جەرگىلىكتى تۇرعىندار گۇل شوقتارىن قويىپ, ال ساياساتكەرلەر كوڭىلحاتتارىن جولداپ جاتىر. يسپانيا ۇكىمەتى ەلدە ءۇش تاۋلىك ازا تۇتۋ كۇنىن جاريالادى. پاريجدەگى ەيفەل مۇناراسى دا بارسەلوناداعى تەراكت قۇرباندارىنا تاعزىم ەتىپ, جارىعىن ءوشىردى.

دايىنداعان 

ايگۇل شەرنياز, 
«ەگەمەن قازاقستان»