ولار قاجەتىنشە قاتىنايتىن مەكەمەلەر, دۇكەندەر, ءدارىحانالار سياقتى كوپتەگەن نىسانداردا ءجۇرىپ-تۇرۋلارى ءۇشىن ارنالعان پاندۋستار تىم از نەمەسە مۇلدە جوق. بارلارىنىڭ ءوزى تالاپقا ساي ەمەس.
ءبىرى تىم بيىك بولسا, تاعى ءبىرى تارلاۋ ءارى تايعاق. مۇمكىندىگى شەكتەۋلى ازاماتتارعا مەملەكەت تاراپىنان ۇلكەن كوڭىل بولىنۋدە. سەمەيدە ءبىر جارىم مىڭداي دۇكەن بار دەسەك تە, ولاردىڭ كوبىنە ارنايى پاندۋستار ورناتىلماپتى. وسىعان وراي «نۇر وتان» پارتياسىنىڭ مۇشەلەرى شاعىن بيزنەس وكىلدەرىنە ءتۇسىندىرۋ جۇمىستارىن جۇرگىزىپ-اق جاتىر. بۇرىننان تۇرعىزىلىپ قويىلعاندارعا قوسالقى تۇردە پاندۋستار سالۋ قاجەت, دەيدى. ال جاڭادان سالىنىپ جاتقان نىساندارعا پاندۋستار سالۋ مىندەتتەلۋدە. بۇل قۇرىلىس باستالماي تۇرىپ, جوبادا قاراستىرىلۋى كەرەك. جۇمىسپەن قامتۋ جانە الەۋمەتتىك باعدارلامالار ءبولىمىنىڭ اقپاراتىنشا, بۇگىنگى تاڭدا سەمەي ءوڭىرى بويىنشا ءجۇرۋ قوزعالىسىندا كەدەرگىسى بار اربامەن قوزعالاتىن التى جۇزدەن استام ادام بار ەكەن. بارلىعىنا جەرگىلىكتى بيۋدجەت ەسەبىنەن تەگىن ينۆوتاكسي قىزمەت كورسەتىپ, قاجەتتى جەرلەرىنە تاسىمالدايدى. بىراق ولار بارعان جەرىنە جەتكەنمەن پاندۋستاردىڭ جوقتىعىنان ىشكە كىرە الماي جاتاتىن دا كورىنىستەر كوبەيگەن. بۇگىندە قالا باسشىسى ەرماك ءسالىموۆتىڭ تاپسىرۋىمەن قالاداعى 267 ءتۇرلى نىساندى تەكسەرۋ جۇمىسى باستالىپ وتىر.
– ءبىز رەيدكە I توپتاعى مۇگەدەك سەرگەي سترۋكوۆتى قاتىسۋعا شاقىردىق, – دەدى «نۇر وتان» پارتياسىنىڭ جەمقورلىققا قارسى قوعامدىق كەڭەسىنىڭ مۇشەسى رۋسلان كيبكە, – ول بالداقپەن سۇيەنىپ جۇرسە دە, وسىنداي قوعامدىق جۇمىستارعا بەلسەنە ارالاسادى. پاۋەرليفتينگپەن اينالىسادى. سەمەيدىڭ شەت اۋدانىنداعى شىعىس كەنتى ماڭىنداعى مەكتەپتەر مەن اۋرۋحانالارعا باردىق. بۇل جەردە اۋىلدان كوشىپ كەلگەن 20 مىڭعا جۋىق اعايىن جانە قالا تۇرعىندارى تۇرادى. 2 مەكتەپ, كوللەدج جانە ەمحانا ورنالاسقان. تەك وسىلاردىڭ بىرەۋىندە عانا قولايلى پاندۋس بار بولىپ شىقتى. ال №47,12 مەكتەپتەردەگى پاندۋستارعا قولدان جاسالعان «بىردەمەلەر» ەكەن. بۇل پاندۋستارعا سەرگەي سترۋكوۆ مۇلدە شىعا المادى. اياعى تايعاناپ, جۇرمەدى.
– ءبىز قاتارىنان نەشە جىل بويى پاندۋس قۇرىلىسى ءۇشىن ءبىلىم ءبولىمىنىڭ بيۋدجەتىنە تاپسىرىس بەرىپ كەلەمىز, – دەيدى №47 مەكتەپ ديرەكتورى احات ىدىرىسوۆ, – بىزگە بارلىق تالاپقا ساي پاندۋس ورناتۋ ءۇشىن 1,6 ملن.تەڭگە كەرەك. سوڭعى ءوتىنىشىمىز ءتىپتى وسىدان ءبىر-ەكى كۇن بۇرىن عانا بەرىلدى.
بۇنداي پروبلەمانى №12 مەكتەپ باسشىلىعى دا العا تارتتى. اتالمىش مەكتەپتە ءبىر ەمەس, ەكى پاندۋس ورناتۋ ءۇشىن 4 ملن تەڭگە قاجەت ەكەن. ال سەرگەي سترۋكوۆ بارعان №16 ەمحانادا پاندۋس دەگەنىمىزدىڭ نە ەكەنىن ءتىپتى بىلمەيتىن دە بولىپ شىققان. ەگەر ەمحانا قىزمەتكەرلەرى مۇگەدەك جاننىڭ قيىندىعىن تۇسىنبەسە, باسقالارىنا نە جورىق دەمەكپىز ءبىز.
راۋشان نۇعمانبەك,
جۋرناليست
سەمەي
سۋرەتتى تۇسىرگەن اۆتور
