ساياسي قۋعىن-سۇرگىن قۇرباندارىنىڭ رۋحىنا ارنالعان كارتينا باس-اياعى 10 كۇن ىشىندە تۇسىرىلگەن. فيلم ستسەناريىن جازعان بەلگىلى جۋرناليست, «جەتىسۋ» تەلەارناسى ديرەكتورىنىڭ ورىنباسارى سەرىك ابىكەن ۇلىنىڭ ايتۋىنشا, ءفيلمدى جەرگىلىكتى ازاماتتاردىڭ قولداۋىمەن ءتۇسىرىپ شىققان.
– وسى ءبىر شاعىن اڭگىمەدە قازاق قاسىرەتى تۇگەل كورىنىس تاپقان. الماجاننىڭ قولىنداعى ءبىر ۋىس بيداي – قازاقتىڭ ءومىردى ۋىستاۋى. ماعان ەرەكشە اسەر ەتكەنى وسى. قازاقتىڭ ومىرگە دەگەن تالپىنىسى مەن ءومىردى ۋىسىنان شىعارىپ الماسا ەكەن دەگەن ۇمىتپەن بولاشاق ۇرپاققا وسى اڭگىمەنىڭ جەلىسىمەن تۇسىرىلگەن ءفيلمدى ۇسىنىپ وتىرمىز. ەل اۋىزىندا ايتىلىپ جۇرگەن ءبىراز وقيعالاردى قوسىپ, كورەرمەنگە اسەر ەتەتىندەي كومپوزيتسيالىق مازمۇنىن بايىتتىق, – دەگەن رەجيسسەر سەرىك ابىكەن ۇلى زۇلمات جىلدار زاردابى تۋرالى ناسيحات مەملەكەتتىك دەڭگەيدە قولعا الىنۋى ءتيىس ەكەندىگىن ايتادى.
فيلمدە رەجيسسەردىڭ ويپاڭدا ورنالاسقان اۋىلدىڭ جۇتاعان, اشتىق جالماعان ءومىرىن كورسەتۋىنەن, جالپى قيان-كەسكى ارپالىسقا تولى قازاق تاعدىرىن تانيمىز. جىرتىق كيمەشەگىمەن جۇرەلەي وتىرىپ تاڭ اتقالى ساباندى اقتارىپ, كۇن تاس توبەگە كوتەرىلگەنشە الماجاننىڭ بار جيناعانى ۋىسقا تولاتىن بيداي. قىرمان باسىندا بۇكشەڭدەپ جۇرگەن ايەلدى كورگەن شولاق بەلسەندىلەر «قوعام مۇلكىنە قاستاندىق جاسادىڭ» دەپ تەپكى استىنا الادى. زىڭگىتتەي جىگىتتەردىڭ جابىلىپ ءجۇرىپ ءبىر ۋىس بيداي جۇمىلعان الاقاندى اشا الماۋى فيلمدەگى دە, اڭگىمەدەگى دە ەڭ ءبىر اسەرلى تۇسى. فيلم سوڭىندا سالتاق-الماجان ەسكى قىرماندا شىرىگەن سابان اراسىنان ءبىر-بىرلەپ تەرىپ, كۇنۇزاق جيناعان ءبىر ۋىس بيدايىن وزىمەن بىرگە و دۇنيەگە الا كەتتى, ول جاقتا دا تىرشىلىك بولسا, بالالارىنا بىلامىق كوجە ءپىسىرىپ بەرەدى دەپ تۇيىندەلەدى.
فيلم الماتى وبلىسىنىڭ قاراتال اۋدانى ماڭىندا تۇسىرىلگەن. كارتيناعا كەرەك كيىز ءۇي مەن ەسكى جادىگەرلەردى م.تىنىشپاەۆ اتىنداعى ولكەتانۋ مۇراجايى ۇسىنعان. فيلم رەجيسسەرلەرى سەرىك ابىكەن ۇلى, دانيار مۇستافاەۆ, قويۋشى-وپەراتورى ايدوس قاليەۆ. فيلمگە الماتى وبلىستىق ب.ريموۆا اتىنداعى دراما تەاتردىڭ جانە ع.مۇسىرەپوۆ اتىنداعى بالالار جانە جاسوسپىرىمدەر تەاترىنىڭ اكتەرلارى قاتىسقان.
– ءفيلمدى تۇسىرۋگە ۇشتوبە قالاسىنىڭ اكىمدىگى مەن جەرگىلىكتى ازاماتتار قول ۇشىن سوزدى. ەشكىم بىزدەن ءبىر تيىن اقشا سۇراعان جوق, كەرىسىنشە قۇلشىنا كومەكتەستى. ۇيىمداستىرۋ جۇمىسىنا اتسالىسقان ماۋلەن نەسىپبەك, دوسان قىزايباي ۇلىنا, كارتينا ديرەكتورى گۇلجان قىزايبايعا العىس ايتامىن, – دەگەن سەرىك ابىكەن ۇلى الداعى جوسپارىمەن ءبولىستى. ءجۋرناليستىڭ ايتۋىنشا, ەندى شىعارماشىلىق ۇجىم جەتىسۋ ولكەسىندەگى «كىسى قىرىلعان», «ادام ولگەن», «بورشابۇلاق قىرعىنى» دەپ اتالعان تاريحي ورىندار تۋرالى دەرەكتى فيلمدەر تسيكلىن تۇسىرۋگە دايىندالىپ جاتقان كورىنەدى.
ايا ءومىرتاي,
«ەگەمەن قازاقستان»
