كيىكتەردى زاڭسىز اۋلاۋ تىيىلماي وتىر

2010-2016 جىلدارى كيىك اتۋدىڭ جانە ولاردىڭ مۇيىزدەرىن ساتۋدىڭ 318 فاكتىسى تىركەلدى.  بۇل تۋرالى بۇگىن قر پارلامەنتى ماجىلىسىندە ءوتىپ جاتقان «وسىمدىكتەر مەن جانۋارلار دۇنيەسىن قورعاۋدىڭ, ءوسىمىن مولايتۋدىڭ جانە ولاردىڭ وبەكتىلەرىن ورنىقتى پايدالانۋدىڭ وزەكتى ماسەلەلەرى» تاقىرىبىندا ءوتىپ جاتقان «دوڭگەلەك ۇستەل» بارىسىندا قر اۋىل شارۋاشىلىعى ۆيتسە-ءمينيسترى ەرلان نىسانباەۆ ءمالىم ەتتى. «جابايى تۇياقتى جانۋارلاردىڭ سيرەك كەزدەسەتىن جانە جويىلىپ بارا جاتقان تۇرلەرى مەن كيىكتەردى ساقتاۋ, ولاردىڭ سانىن قالپىنا كەلتىرۋ بويىنشا جۇمىستار جۇرگىزىلىپ جاتىر. الاڭداۋشىلىق تۋعىزاتىن باستى اڭداردىڭ ءبىرى جابايى دالا انتيلوپاسىنىڭ بىرەگەي ءتۇرى كيىكتەر بولىپ وتىر. بۇل جانۋارلاردىڭ دۇنيەجۇزىلىك تارالىمىنىڭ 95 پايىزى  قازاقستان اۋماعىندا مەكەندەيدى. كيىكتەردى قورعاۋدىڭ ناتيجەسىندە ولاردىڭ سانى 21 مىڭ باستان 295 مىڭ باسقا دەيىن كوبەيگەن بولاتىن. بىراق وكىنىشكە وراي, 2015 جىلى كيىكتەر قىرىلدى. ۇستىمىزدەگى جىل ەسەبى بويىنشا, ولاردىڭ سانى شامامەن 108 مىڭ باس. قىرىلۋ سەبەبى  جۇقپالى اۋرۋ - پاستەرەللەز. جاپپاي ءولىم-جىتىمگە ۇشىراۋدىڭ مۇنداي فاكتىسى بۇرىن دا بولعان», - دەدى ۆيتسە-مينيستر. ونىڭ ايتۋىنشا, كيىكتەر سانىنىڭ ازايۋىنا بروكەنەرلىكتىڭ دە اسەرى بار. «2010-2016 جىلدارى كيىك اتۋدىڭ جانە ولاردىڭ مۇيىزدەرىن ساتۋدىڭ 318 فاكتىسى تىركەلدى. جابايى جانۋارلاردىڭ سيرەك كەزدەسەتىن جانە جويىلىپ بارا جاتقان تۇرلەرى مەن كيىكتەردى قورعاۋمەن «اڭشىلىقزووونەركاسىپ»  ۇيىمى اينالىسادى. مونيتورينگ ۇيىمداستىرۋ جانە كيىكتەردى سپۋتنيكتىك راديوماياكتارمەن تاڭبالاۋ پايدالانىلادى. قورعاۋ شارالارىن ۇيىمداستىرۋ ينسپەكتورلاردىڭ كولىكتەرىندە ورناتىلعان سپۋتنيكتەرمەن باقىلانادى. قولدانىلعان شارالاردىڭ ناتيجەسىندە جابايى تۇياقتى جانۋارلاردىڭ سيرەك كەزدەسەتىن جانە جويىلىپ بارا جاتقان تۇرلەرى مەن كيىكتەر سانىنىڭ كوبەيىپ كەلە جاتقانى بايقالادى», - دەدى نىسانباەۆ.