كۋبا ەلشىسى قازاقستاندىقتارعا العىس ايتتى

قازاقستانداعى كۋبا ەلشىلىگىندە فيدەل كاسترونىڭ قايتىس بولۋىنا بايلانىستى كوڭىل ايتۋ كىتابىن اشتى, دەپ حابارلادى Today.kz. كۋبا رەسپۋبليكاسىنىڭ توتەنشە جانە وكىلەتتى ەلشىسى كارلوس ەنريكە ۆالدەس كونسەپسيون قازاقستاندىقتارعا ءوزىنىڭ العىس سوزدەرىن ءبىلدىردى. «ءبىزدىڭ باس قولباسشىمىز فيدەل كاستروعا دەگەن جىلى كوڭىلدەرى ءۇشىن قازاقستان حالقىنا ءوزىمنىڭ العىسىمدى بىلدىرگىم كەلەدى. قولباسشىمىز قايتىس بولعاننان كەيىن بىزگە جۇزدەگەن حاتتار كەلىپ ءتۇستى. ونىڭ العاشقىسى, نۇرسۇلتان نازارباەۆتان كەلگەن كوڭىل ايتۋ جەدەلحاتى. ال كوڭىل ايتۋ كىتابى 28 قاراشادان 4 جەلتوقسانعا دەيىن اشىق بولادى. 4 جەلتوقسان – فيدەل كاسترونى جەرلەۋ كۇنى», – دەدى ەلشى. اكادەميك, جازۋشى, «قازاقستان-كۋبا» دوستىق قوعامىنىڭ ءبىرىنشى ۆيتسە-پرەزيدەنتى, باقىت رۇستەموۆ ەلشىلىككە ارنايى كەلىپ, كۋبا حالقىنا كوڭىل ايتتى. ول بوستاندىق ارالى تۋرالى ءتورت كىتاپ جازعان. جازۋشىنىڭ ايتۋىنشا, كىتاپ جارىققا شىققاننان كەيىن, لاتىنامەريكالىقتار ونى قازاقتىڭ حريستوفور كولۋمبى دەگەن. «كۋبا باسشىسى راۋل كاستروعا, قازاقستانداعى كۋبا ەلشىلىگىنە, كۋبا حالقىنا, بۇكىل پروگرەسسيۆتى ادامزاتقا جانە ونىڭ وتباسىنا كوڭىل ايتامىن. ول سيرەك كەزدەسەتىن باسشىلاردىڭ ءبىرى. فيدەلدى يمپەرياليستەر 637 رەت ولتىرمەكشى بولىپ, دايىندىق جاساعان. كىشكەنتاي عانا بوستاندىق ارالى كۋبا حالقىن قاناۋعا جانە توناۋعا تىرىسقاندارعا قارسى تۇرىپ, ءوزىنىڭ مۇددەسىن, تاۋەلسىزدىگىن قورعاۋدا الەمگە ەرەن ۇلگىنىڭ بەلگىسىن كورسەتىپ جاتىر», – دەدى باقىت رۇستەموۆ.