كاسىبي-تەحنيكالىق بىلىمگە نازار اۋدارۋ كەرەك - ستارر

استانادا بۇگىن "قازاقستان رەسپۋبليكاسىنىڭ تاۋەلسىزدىگىنە 25 جىل: ناتيجەلەر, جەتىستىكتەر, كەلەشەك كوكجيەگى" اتتى حالىقارالىق كونفەرەنتسيا ءوتىپ جاتىر. وعان الەم ەلدەرىنىڭ جەتەكشى ساياساتكەرلەرى قاتىسۋدا. سولاردىڭ ءبىرى - فينليانديا پارلامەنتى تورعاسىنىڭ ءبىرىنشى ورىنباسارى ماۋري پەككارينەن ەكى ەل اراسىنداعى مادەني بايلانىستار تۋرالى ايتتى. "قازاقستان تاۋەلسىزدىك العان جىلداردان باستاپ ەكى ەل مادەني بايلانىستارىن كۇشەيتتى. تاۋەلسىز قازاقستان باسشىسى 1992 جىلى ءبىزدىڭ ەلگە العاشقى ساپارىمەن كەلگەن ەدى. سول كەزدە سىيلانعان جىلقى فينليانديادا ۇزاق ءومىر ءسۇردى. ونى كورىپ, كوپشىلىگى اتقا ءمىنۋدى ۇيرەنگىسى كەلدى. سول كەزدەن باستاپ ەكى ەل بىلىممەن دە, تاجىريبەمەن دە الماسىپ كەلە جاتىر", - دەدى ماۋري پەككارينەن.   فورۋم بارىسىندا دج. حوپكينس ۋنيۆەرسيتەتىنىڭ ورتالىق ازيا ءجان كاۆكاز بويىنشا ينستيتۋتتىڭ توراعاسى فرەدەريك ستارر قازاقستاننىڭ الداعى 25 جىلداعى دامۋ جولىن بولجادى. ساراپشىنىڭ ايتۋىنشا, تابىستى ەل بولۋ ءۇشىن ەكونوميكانى رەفورمالاۋ قاجەت. "قازاقستان تابىستى ەل بولۋ ءۇشىن ەكونوميكا مىقتى بولۋى كەرەك. مىسالى, 10 جىلدان كەيىن شاعىن جانە ورتا بيزنەس كوبەيسە, دۇكەندەر مەن "حان شاتىر" سەكىلدى ورىنداردىڭ يەسى شەتەلدىكتەر ەمەس, قازاقستانىقتار بولسا, جاقسى بولۋشى ەدى", دەدى ستارر. سونىمەن قاتار ول كاسىبي-تەحنيكالىق ماماندىقتاردى وقىتۋعا باسا نازار اۋدارۋ كەرەكتىگىن ايتتى. "قازاقستان قازىر ماڭىزدى ماسەلەلەردى كوتەرىپ جاتىر. سولاردىڭ ءبىرى - ءبىلىم. سونىڭ ىشىندە كاسبي-تەحنيكالىق بىلىمگە نازار اۋدارۋ كەرەك. ونىڭ قوعامعا بەرەرى كوپ", - دەدى ستارر.   سونىمەن قاتار ساراپشى مەملەكەت حالىقارالىق ارەنادا بەلسەندىلىك تانىتۋ كەرەكتىگىن ايتتى.