رەفورما ساتىمەن جۇرگىزىلۋدە

كەشە قازاقستان رەسپۋبليكاسىنىڭ مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىندە الماتى قالاسى بويىنشا مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل دەپارتامەنتىنىڭ ديرەكتورى ايگۇل بايحانوۆانىڭ قاتىسۋىمەن بەس ينستيتۋتتىق رەفورمانىڭ «كاسىبي مەملەكەتتىك اپپارات قۇرۋ» اتتى ءبىرىنشى باعىتىن جۇزەگە اسىرۋ بويىنشا بريفينگ ءوتتى. دەپارتامەنت ديرەكتورىنىڭ ءمالى­مەتىنە قاراعاندا, الماتى قالاسىندا ۇستىمىزدەگى جىلدا 241 كونكۋرس وتكىزىلىپ, وعان 207 بايقاۋشى قاتىسقان. بۇل رەتتە مەريتوكراتيا قاعيداسى بويىنشا 134 مەملەكەتتىك قىزمەتشى جوعارى لاۋازىمدارعا يە بولعاندىعىن ايتا كەتۋ كەرەك. جانە دە جاڭادان اكىم­شىلىك مەمقىزمەتكە قابىلدانعاندار­دىڭ قاتارى 294 ادام بولسا, مەملەكەت­تىك قىزمەتتەرىن توقتاتقاننان كەيىن قايتا تاعايىندالعاندار سانى 169-عا جەتكەن. قازىرگى تاڭدا ولاردىڭ بار­لىعىنا تالىمگەرلەر بەكىتىلىپ بەرىل­گەن. ا.بايحانوۆا­نىڭ ايتۋىنشا, توق­سان سايىن اكىمشىلىك مەملەكەتتىك قىز­مەتشىلەردىڭ قىزمەتىن باعالاۋ ءجۇر­گىزىلەدى. كەلتىرىل­گەن مالىمەتتەرگە قاراعاندا, ءۇشىنشى توقسانن­ىڭ قورى­تىندىسى بويىنشا جۇمىسى «وتە جاقسى» دەپ تابىلعان­داردىڭ قاتارى 18 پايىز, ال «ءتيىمدى» سانالعانداردىڭ دەنى 73 پايىز جانە «قاناعاتتانار­لىق» دەپ تابىلعاندار 9 پايىز بولىپ وتىر. سونداي-اق, جاڭا ادەپ كودەكسى نورمالارىنىڭ بۇزىلۋىنا دا دەپارتامەنت ەرەكشە نازار اۋدارۋدا. تارقاتىپ ايتقاندا, ادەپ نورما­لارىن ساقتاماعانى ءۇشىن 4 مەملەكەت­تىك قىزمەتشى جاۋاپقا تارتىلسا, بۇل جال­پى جاۋاپقا تارتىلعانداردىڭ 7 پايىزىن قۇرايدى. ا.بايحانوۆا ءسوز رەتى كەلگەندە جاڭا رەفورما حالىقارالىق جانە وتان­دىق ساراپشىلار تاراپىنان جوعارى باعاسىن العاندىعىن ورتاعا سالدى. قازاقستان ستراتەگيالىق ينستيتۋتىنىڭ زەرتتەۋ­لەرى كورسەتكەندەي, سۇراۋ سالىنعاندار­دىڭ 80 پايىزى اتالعان رەفورما­نى قولدايتىندىقتارىن بىلدىرگەن. جاڭا مودەلدىڭ ومىرگە كەلۋى مەملەكەتتىك قىز­مەتشىلەردىڭ لاۋازىمدىق وسۋىنە ءۇل­كەن مۇمكىندىك بەرىپ وتىر. ۇستىمىزدەگى جىلى الماتى قالاسىندا 4300 ادام تەستكە قاتىسقان. ولاردىڭ 45 پايىزى بەلگىلەنگەن دەڭگەيدى ەڭسەرسە, بۇل وتكەن جىلدىڭ وسى مەرزىمىمەن سالىستىرعاندا 52 پا­يىزعا ارتىق. ءبىر ورىنعا كونكۋرسقا تۇسۋشىلەر سانى ەكى ەسەگە ارتقانى ءمالىم بولدى. دەپارتامەنت ديرەكتورى الماتى قالاسىنىڭ بارلىق 201 مەكتەپ مەكەمەلەرىندە «ادال ۇرپاق» كلۋبتارى قۇرىلعاندىعىنان دا حاباردار ەتتى. اسقار تۇراپباي ۇلى, «ەگەمەن قازاقستان»