بۇگىن ارال اۋدانىندا قىزىلوردا وبلىسى اكىمدىگىنىڭ كوشپەلى وتىرىسى ءوتتى. جيىندا اۋداندى دامىتۋعا باعىتتالعان «جول كارتاسىن» ىسكە اسىرۋ بارىسى تالقىلاندى.
ءماجىلىستى اشقان وبلىس اكىمى قىرىمبەك كوشەرباەۆ ءوڭىردىڭ 2016 جىلى جەتكەن جەتىستىكتەرى تۋرالى باياندادى. سىر ءوڭىرى ءتورتىنشى جىل قاتارىنان كۇرىشتەن رەكوردتىق ءونىم جيناپ كەلەدى. 2013-2016 جىلدار ارالىعىندا قىزىلوردادا 11 جاڭا مولتەك اۋدان بوي تۇزەدى. ايماق تۇرعىندارىنىڭ 95 پايىزى ورتالىقتاندىرىلعان سۋ جۇيەسىنە قوسىلعان, ال وبلىس ورتالىعىنىڭ تۇرعىندارى قىزىلجارما جەراستى تازا اۋىز سۋىن پايدالانىپ وتىر.
- مۇناي ءوندىرۋ كولەمىنىڭ ازايۋى وبلىس ەكونوميكاسىنا كەرى اسەرىن تيگىزەتىنى ءسوزسىز. سوندىقتان ءبىز جاڭا ءوندىرىس ورىندارىن اشۋ ارقىلى ەكونوميكانى ءارتاراپتاندىرۋ شارالارىن قولعا الۋدامىز. مىسالعا, شيەلى اۋدانىندا ۆانادي زاۋىتىن سالۋ تۋرالى وسىدان ەكى كۇن بۇرىن لوندون قالاسىندا كەلىسىمگە قول قويدىق. الدا اتقارىلار جۇمىس وراسان, سول ءۇشىن توقمەيىلسۋگە بولمايدى,- دەپ اتاپ ءوتتى قىرىمبەك كوشەرباەۆ.
كوشپەلى وتىرىس بارىسىندا ارال اۋدانىنىڭ اكىمى مۇحتار ورازباەۆ اۋداننىڭ الەۋمەتتىك-ەكونوميكالىق دامۋى تۋرالى باياندادى. وڭدەۋ ونەركاسىبىندە ءوسىم بايقالادى, اسىرەسە بالىق وڭدەۋ كولەمىن ارتتىرۋ جانە ونى الىس-جاقىن شەت مەملەكەتتەرگە ەكسپورتتاۋدا ىلگەرىلەۋ بار. سونىمەن قاتار, اۋدان اكىمى شاعىن جانە ورتا كاسىپكەرلىكتى دامىتۋدا دا جاقسى كورسەتكىشتەرگە قول جەتكىزگەندىكتەرىن ايتتى.
وبلىس اكىمىنىڭ ورىنباسارى قۋانىشبەك ىسقاقوۆ 50-دەن استام شارانى قامتيتىن ارال اۋدانىن دامىتۋعا باعىتتالعان جول كارتاسىن تانىستىردى. جول كارتاسىنا ەنگەن جوبالار رەسپۋبليكالىق, وبلىستىق جانە اۋداندىق بيۋدجەتتەردەن قارجىلاندىرىلاتىن بولادى. وبلىس اكىمى قىرىمبەك كوشەرباەۆ قارجى ماسەلەسى شەشىلمەگەن جوبالار جول كارتاسىنا ەنگىزىلمەسىن جانە ەل ۇكىمەتىنەن بولىنەتىن قوسىمشا قاراجات ارال, قارماقشى, جالاعاش اۋداندارىنداعى كاسىپكەرلىكتى دامىتۋعا باعىتتالسىن دەگەن تاپسىرما بەردى.
