قازاقستان رەسپۋبليكاسى تاۋەلسىزدىگىنىڭ 20 جىلدىعى قارساڭىندا, قازاقستاننىڭ يسلام ىنتىماقتاستىعى ۇيىمىنا ءتوراعالىق ەتۋىنە وراي, سونداي-اق قاسيەتتى قۇران ءىلىمىن كەڭىرەك تاراتۋ ماقساتىندا يران يسلام رەسپۋبليكاسى ەلشىلىگىنىڭ جانە ەلورداداعى ۇلتتىق اكادەميالىق كىتاپحانانىڭ ۇيىمداستىرۋىمەن «قاسيەتتى قۇراننىڭ يران ونەرىندەگى كورىنىسى» اتتى كورمەنىڭ اشىلۋ سالتاناتى بولدى.
كورمەدە يراننىڭ راحيم چارحي (تازحيب – قۇران سۇرەلەرى مەن اياتتارىن ورنەكتەرمەن جيەكتەۋ, التىن جالاتۋ تەحنيكاسى), پارۆيز نازاري (مەتالدان ورنەك ويۋ) جانە حاسان موللاۆي (كالليگرافيا) سەكىلدى تانىمال شەبەرلەرىنىڭ يسلام, قۇران تاقىرىپتارىنداعى 75-تەن استام تۋىندىلارى كورەرمەن نازارىنا ۇسىنىلىپ, ونەردىڭ وسى سالاسىمەن كەڭىرەك تانىسامىن دەۋشىلەرگە شەبەرلىك سىنىپتار وتكىزىلدى.
كورمەگە قويىلعان ەكسپوناتتار اراسىندا ەرەكشە ورنەك-جازۋىمەن ورىندالعان قاسيەتتى قۇراننىڭ سيرەك باسىلىمدارى, شەت تىلدەردەگى اۋدارمالارى, يراندا شىعارىلعان قۇران تۋرالى اۋديو-ۆيدەو ديسكىلەرمەن قاتار, كوپشىلىكتى قىزىقتىرعان «سويلەيتىن قۇران دا» بار.
بەرىك سادىر.
سۋرەتتەردى تۇسىرگەن اعىباي اياپبەرگەنوۆ.
